នាយករដ្ឋមន្ត្រីកូរ៉េខាងត្បូង លោក ហាន់ ដាក់ស៊ូ (Han Duck-soo) នៅថ្ងៃចន្ទនេះ បានសន្យាថានឹងស៊ើបអង្កេតយ៉ាងហ្មត់ចត់ចំពោះព្រឹត្តិការណ៍រត់ជាន់គ្នានៅក្នុងពិធីបុណ្យ Halloween កាលពីចុងសប្តាហ៍ នៅតំបន់អ៊ីថេវ៉ុន (Itaewon) ទីក្រុងសេអ៊ូល ដែលបានសម្លាប់មនុស្សជាង១៥០នាក់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣១ ខែតុលា ឆ្នាំ២០២២នេះ។
ក្រុមមន្ត្រីកូរ៉េខាងត្បូង បាននិយាយថា ចំនួនអ្នកស្លាប់បានកើនឡើងដល់១៥៤នាក់ អ្នករងរបួសចំនួន១៤៩នាក់ ក្នុងនោះ ៣៣នាក់ស្ថិតក្នុងស្ថានភាពធ្ងន់ធ្ងរ។
យោងតាមទីភ្នាក់ងារសារព័ត៌មាន Yonhap របស់កូរ៉េខាងត្បូង បានឱ្យដឹងថា ក្នុងចំណោមជនរងគ្រោះដែលបានស្លាប់ក្នុងព្រឹត្តិការណ៍នេះ មានជនបរទេសចំនួន២៦នាក់ រួមមាន ជនជាតិអ៊ីរ៉ង់៥នាក់ ជនជាតិចិន៤នាក់ ជនជាតិរុស្ស៊ី៤នាក់ ជនជាតិអាមេរិក២នាក់ ជនជាតិជប៉ុន២នាក់ ជនជាតិបារាំងម្នាក់ ជនជាតិអូស្ត្រាលីម្នាក់ ជនជាតិន័រវែសម្នាក់ ជនជាតិអូទ្រីសម្នាក់ ជនជាតិវៀតណាមម្នាក់ ជនជាតិថៃម្នាក់ ជនជាតិកាហ្សាក់ស្ថានម្នាក់ ជនជាតិអ៊ូសបេគីស្ថានម្នាក់ និងជនជាតិស្រីលង្កាម្នាក់។
នាយករដ្ឋមន្ត្រីកូរ៉េខាងត្បូង លោក Han Duck-soo បាននិយាយថា៖ «រដ្ឋាភិបាលនឹងធ្វើការស៊ើបអង្កេតឱ្យបានហ្មត់ចត់អំពីមូលហេតុដែលបណ្តាលឱ្យមានឧបទ្ទវហេតុនេះ និងព្យាយាមឱ្យអស់ពីសមត្ថភាពដើម្បីធ្វើការផ្លាស់ប្តូរដែលចាំបាច់ ដើម្បីកុំឱ្យឧបទ្ទវហេតុបែបនេះកើតឡើងម្តងទៀត»។
លោកបន្ថែមថា៖ «អ្នកស្លាប់ទាំង១៥៤នាក់ត្រូវបានកំណត់អត្តសញ្ញាណ ហើយខ្ញុំជឿថាដល់ពេលសម្រាប់ចាត់វិធានការតាមដាន ដូចជា នីតិវិធីបុណ្យសពដែលត្រូវបានអនុវត្តដោយស្មោះត្រង់។ យើងនឹងប្រឹងប្រែងឱ្យអស់ពីសមត្ថភាព ដើម្បីផ្តល់ការគាំទ្រជាចាំបាច់ដោយឆ្លុះបញ្ចាំងពីមតិរបស់គ្រួសារសព តាមដែលអាចធ្វើទៅបាន»។
គួរបញ្ជាក់ថា សោកនាដកម្មនេះបានកើតឡើងនៅយប់ថ្ងៃសៅរ៍ [ទី២៩ ខែតុលា ឆ្នាំ២០២២] នៅពេលដែលហ្វូងមនុស្សដ៏ច្រើនចូលរួមក្នុងពិធីបុណ្យ Halloween បានប្រជ្រៀតគ្នានៅលើផ្លូវចុះចំណោទដ៏តូចចង្អៀតមួយដែលមានទទឹងប្រវែង៣,២ម៉ែត្រ និងបណ្តោយប្រវែង៤០ម៉ែត្រ តភ្ជាប់ពីតំបន់ភោជនីយដ្ឋានដ៏មមាញឹកទៅនឹងផ្លូវធំនៅក្នុងតំបន់កម្សាន្ត ក្នុងសង្កាត់អ៊ីថេវ៉ុន (Itaewon) ទីក្រុងសេអ៊ូល។
សោកនាដកម្មនេះ គឺជាសោកនាដកម្មដ៏សោកសៅបំផុតក្នុងប្រវត្តិសាស្ត្ររបស់កូរ៉េខាងត្បូង និងជាមហន្តរាយដ៏អាក្រក់បំផុតដែលមិនធ្លាប់មានក្នុងប្រទេសនេះចាប់តាំងពីឆ្នាំ២០១៤ នៅពេលដែលសាឡាង Sewol បានលិចនៅក្បែរឆ្នេរភាគខាងត្បូង និងបានសម្លាប់មនុស្ស៣០៤នាក់ដែលភាគច្រើនជាសិស្សវិទ្យាល័យ។
មនុស្សរាប់ម៉ឺននាក់បានទៅលេងតំបន់ Itaewon ក្នុងពិធីបុណ្យ Halloween បន្ទាប់ពីរដ្ឋាភិបាលបានលុបចោលកាតព្វកិច្ចពាក់ម៉ាស់នៅខាងក្រៅ ដើម្បីទប់ស្កាត់ការរីករាលដាលនៃជំងឺកូវីដ-១៩ កាលពីដើមឆ្នាំនេះ៕