មេធាវីការពារក្តីឱ្យសកម្មជនបក្សប្រឆាំង បានទាមទារឱ្យនគរបាលយុត្តិធម៌ បង្ហាញទីកន្លែងដែលកូនក្ដីរបស់ខ្លួន បានបង្ហោះសារលើបណ្ដាញសង្គមហ្វេសប៊ុក ហើយត្រូវបានសមត្ថកិច្ចដកស្រង់យកមកធ្វើជាភស្ដុតាងដាក់បន្ទុក។
សាលាដំបូងរាជធានីភ្នំពេញ នៅព្រឹកថ្ងៃព្រហស្បតិ៍នេះ បន្តសវនាការលើសំណុំរឿង «រួមគំនិតក្បត់» ពាក់ព័ន្ធនឹងគម្រោងដំណើរវិលត្រឡប់មកកម្ពុជា កាលពីដើមខែមករា ឆ្នាំ២០២១ របស់លោកស្រី មូរ សុខហួរ និងថ្នាក់ដឹកនាំ ព្រមទាំងសកម្មជនបក្សសង្គ្រោះជាតិដែលត្រូវតុលាការរំលាយ។
ក្នុងសវនាការ មេធាវីការពារក្ដីឱ្យថ្នាក់ដឹកនាំ និងសកម្មជនបក្សប្រឆាំង សួរដេញដោលទៅមន្ត្រីនគរបាលយុត្តិធម៌ ចំនួន ២នាក់ ដោយទាមទារឱ្យបង្ហាញទីកន្លែងដែលកូនក្ដីបង្ហោះសារ និងអំពីនីតិវិធីនៃស៊ើបអង្កេតខំមិន(Comment) នៅលើបណ្ដាញសង្គមហ្វេសប៊ុក។
ឆ្លើយតបនឹងសំណួរមេធាវីការពារក្ដីឱ្យថ្នាក់ដឹកនាំ និងសកម្មជនបក្សប្រឆាំងនោះ អនុប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការនគរបាលជាតិ លោក ពេជ្រ សុថារ័ត្ន បានរៀបរាប់ពីអំដំណើរនៃការកសាងសំណុំរឿង និងឆ្លើយសំណួរជាច្រើន អំឡុងសវនាការ ខណៈមន្ត្រីនគរបាលមួយរូបទៀត គឺលោក ប៊ិន សម្បត្តិធារ៉ា មិនបានឆ្លើយនឹងសំណួរអ្វីច្រើនទេ ។
លោក ពេជ្រ សុថារ័ត្ន បានលើកឡើងថា តាមរយៈការស៊ើបអង្កេតរបស់សមត្ថកិច្ច គឺបន្ទាប់ពីខកខានមិនបានចូលកម្ពុជានៅថ្ងៃទី៩ ខែវិច្ឆិកា ឆ្នាំ២០១៩ របស់លោក សម រង្ស៊ី នោះក្រុមឧទ្ទាមក្រៅច្បាប់បានបើកកិច្ចប្រជុំគណៈកម្មាធិការដោយខុសច្បាប់នៅថ្ងៃទី២៧-២៩ ខែវិច្ឆិកា ឆ្នាំ២០២០ ក្នុងគោលបំណងវិលត្រឡប់មកកម្ពុជាលើកទី២ ដែលដឹកនាំដោយអនុប្រធានគណបក្សសង្គ្រោះជាតិដែលត្រូវតុលាការរំលាយ លោកស្រី មូរ សុខហួរ។
អំឡុងពេលសាកសួរ លោក សុថារ័ត្ន បាននិយាយថា សមត្ថកិច្ចចាប់ផ្ដើមស៊ើបអង្កេត មន្ត្រីជាន់ខ្ពស់បក្សប្រឆាំង ១០នាក់ ដែលបានបង្ហោះសារ ញុះញង់បង្កឱ្យប្រជាពលរដ្ឋខឹងសម្បាររដ្ឋាភិបាលកម្ពុជា។ ករណីនេះ លោកថា សមត្ថកិច្ចបានពង្រីកការស៊ើបអង្កេតរបស់ខ្លួន ដោយឈានទៅចោទប្រកាន់លើថ្នាក់ដឹកនាំ និងសកម្មជន ៣៩នាក់។
លោកបន្តថា នេះជាផែនការទី២ ដែលក្រុមនេះ បានបន្តមហិច្ឆតារបស់ខ្លួន ដោយពួកគេបានផ្លាស់ប្ដូរសេណារ៉ូ ដែលដឹកនាំដោយលោកស្រី មូរ សុខហួរ ។
លោក សុថារ័ត្ន បន្ថែមថា នៅឆ្នាំ២០២៣ ក្រុមនេះបានព្យាយាមប៉ុនប៉ងត្រឡប់មកកម្ពុជាវិញជាថ្មីទៀត ក្រោមហេតុផល សិទ្ធិមនុស្ស និងលទ្ធិប្រជាធិបតេយ្យជាខែល ដើម្បីបិទបាំងសកម្មភាពរបស់ខ្លួន។
មន្ត្រីនគរបាលរូបនេះ ក៏បាននិយាយអំពីគណនីហ្វេសប៊ុកមួយដែលមានឈ្មោះថា “Veung Samnang National Rescue Phnom Penh Capital” ដែលការបង្ហោះនោះ ត្រូវបានគេប្រើប្រាស់ ដើម្បីចោទប្រកាន់លើជនជាប់ចោទឈ្មោះ វឿង សំណាង ដែលត្រូវសមត្ថកិច្ចថៃចាប់បញ្ជូនមកកម្ពុជាវិញ កាលពីឆ្នាំ២០២១។
លោកជឿថា គណនីហ្វេសប៊ុក Veung Samnang National Rescue Phnom Penh Capital ជារបស់ឈ្មោះ វឿង សំណាង ដោយសារជនជាប់ចោទរូបនេះ បានផ្សាយវីដេអូលើគណនីហ្វេសប៊ុករបស់ខ្លួន។
យ៉ាងណាក្ដី លោក ឡោ ជុនធី មេធាវីការពារក្ដីឱ្យជនជាប់ចោទដែលជាសកម្មជនបក្សប្រឆាំង បានស្នើឱ្យលោក សុថារ័ត្ន បញ្ជាក់ពីទីតាំងដែលថាកូនក្តីរបស់ខ្លួនបានបង្ហោះសារ និងឡាយលើហ្វេសប៊ុកនោះ។
លោក ញ៉ ញេន មេធាវីការពារក្តីសកម្មជនបក្សប្រឆាំង ក៏បានចោទសួរទៅមន្ត្រីនគរបាលយុត្តិធម៌ លោក សុថារ័ត្ន អំពីរបៀបដែលលោកផ្ទៀងផ្ទាត់ថា តើមាននរណាម្នាក់ជាម្ចាស់គណនី Facebookមួយនោះឱ្យពិតប្រាកដ។
លោកក៏បានសួរផងដែរអំពីរបៀបដែលសមត្ថកិច្ចបានដឹងអំពីកន្លែងជាក់លាក់នៃការបង្ហោះសារ និងបញ្ជាក់ពីទីតាំង ព្រមទាំងខំមិននៅលើហ្វេសប៊ុកដែលបានបង្ហោះ។
ឆ្លើយនឹងសំណួរមេធាវី លោក សុថារ័ត្ន បាននិយាយថា លោកមិនអាចបញ្ជាក់បានទេ ទាល់តែក្រុមបច្ចេកទេសព័ត៌មានរបស់អគ្គស្នងការដ្ឋាននគរបាលជាតិ។
ក្រោយពីបើកសវនាការពេញមួយព្រឹកនេះ ប្រធានក្រុមប្រឹក្សាជំនុំជម្រះ លោកស្រី អ៊ុក រ៉េតគន្ធា បានប្រកាសផ្អាកសវនាការ ដោយគ្រោងនឹងបន្តនៅថ្ងៃទី១៧ ខែវិច្ឆិកា ឆ្នាំ២០២២ ដោយសាកសួរមន្ត្រីនគរបាលបច្ចេកទេស៕