អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកអតីតដៃគូប្រកួតដែលមានសក្ដានុពល គឺលោក សម រង្ស៊ី ថាជាអ្នកធ្វើនយោបាយបែបអត្តឃាត ខណៈអ្នកឃ្លាំមើលថា ទីលានប្រកួតនយោបាយបច្ចុប្បន្ន អ្នកនយោបាយបានប្រើកលល្បិចកម្ចាត់គ្នាដើម្បីបន្តគ្រប់គ្រងអំណាច ដោយមិនអនុលោមតាមរដ្ឋធម្មនុញ្ញ។
ការថ្លែងរបស់លោក សុខ ឥសាន បែបនេះ ធ្វើឡើងក្នុងកម្មវិធីតុមូលរបស់វីអូឌី នៅព្រឹកថ្ងៃសុក្រនេះ ដែលមានវាគ្មិនពីររូបផ្សេងទៀតចូលរួម គឺលោកបណ្ឌិត ប៉ា ចន្ទរឿន និងលោកបណ្ឌិត សូ ណារ៉ូ។
លោក សុខ ឥសាន បានលើកឡើងថា លោក សម រង្ស៊ី ដែលកំពុងនិរទេស ជាអ្នកបង្កើតបញ្ហាដើម្បីបិទផ្លូវចូលកម្ពុជាដោយខ្លួនឯង មិនមែនមកពីភាគីគណបក្សកាន់អំណាចរបស់លោកទេ។
ក្នុងន័យនេះ លោកសម្អាងថា បុគ្គល សម រង្ស៊ី ដែលប្រកួតប្រជែងអំណាចតាមយន្តការប្រជាធិបតេយ្យមិនឈ្នះគណបក្សប្រជាជនកម្ពុជា ហើយបែរជាទៅប្រតិដ្ឋរឿងក្រុមគ្រួសារនាយករដ្ឋមន្ត្រី ហើយវាយប្រហារជាលក្ខណៈបុគ្គល ដែលលោកថា ទង្វើប្រមាថនេះជាការបិទផ្លូវនយោបាយដោយខ្លួនឯង។
បញ្ហាមួយទៀត លោកថា ការដែលលោក សម រង្ស៊ី រិះគន់មេដឹកនាំបារាំងថ្មីៗនេះ ក្រោយប្រធានាធិបតីបារាំង ជួបសន្ទនាជាលោកនាយករដ្ឋមន្ត្រី ហ៊ុន សែន អំឡុងទៅចូលរួមកិច្ចប្រជុំអាស៊ាន-អឺរ៉ុបនោះ ភាគីបារំាងអាចនឹងបណ្ដេញលោក សម រង្ស៊ី ចេញពីប្រទេសនេះក៏ថាបាន ខណៈលោក សម រង្ស៊ី មានសញ្ជាតិបារាំង។
បន្ថែមពីនេះ លោកថា ការដែលមិនអាចសម្របសម្រួលនយោបាយបាននោះ ដោយសារតែលោក សម រង្ស៊ី បានប្រកាសឱ្យកងទ័ពបែរកាណុងចង់ផ្ដួលរំលំរដ្ឋាភិបាល ពាក់ព័ន្ធផែនការចង់វិលចូលកម្ពុជាកាលពីចុងឆ្នាំ២០១៩ ការប្រកាសថា មានស៊ី(សម រង្ស៊ី) អត់សែន(ហ៊ុន សែន) រួមទាំងសន្យាដកកម្មសិទ្ធិអ្នកមានចែកឱ្យអ្នកក្រ និងការសន្យាលុបបំណុលអ្នកដែលជំពាក់លុយធនាគារ ពេលលោកឡើងកាន់អំណាចជាដើម។
លោក សុខ ឥសាន ថ្លែងថា៖ «អ៊ីចឹងហើយ អានេះជានយោបាយអត្តឃាតខ្លួនឯង ហើយឯកោខ្លួនឯងពីសង្គម មិនមែនចេញតែពីសង្គមកម្ពុជាទេ វាចេញពីសង្គមពិភពលោកទៅទៀត។ ឥលូវចេញពីស្រុកខ្មែរចូលអត់បាន ឥលូវមកនៅស្រុកបារាំង ទីបំផុតទៅវាយប្រហារប្រធានាធិបតីបារាំងទៅទៀត អ៊ីចឹងប្រហែលជាបន្តិចទៀតអត់បាននៅស្រុកបារាំងទៀត»។
វីអូឌី មិនអាចទាក់ទងលោក សម រង្ស៊ី ដើម្បីសុំការឆ្លើយតប ជុំវិញការលើកឡើងរបស់លោក សុខ ឥសាន នេះបានទេ នៅថ្ងៃសុក្រនេះ។
ប៉ុន្តែអនុប្រធានគណបក្សសង្គ្រោះជាតិដែលត្រូវបានតុលាការរំលាយ និងជាមនុស្សស្និទ្ធនឹងលោក សម រង្ស៊ី ម្នាក់ដែរនោះ គឺលោកស្រី មូរ សុខហួរ បានបដិសេធការលើកឡើងនេះ។
លោកស្រី មូរ សុខហួរ ដែលកំពុងនិរទេសខ្លួននៅក្រៅប្រទេសផងដែរនោះ បានគូសបញ្ជាក់ថា ការនិរទេសខ្លួនជាការស្វែងរកច្រក ដើម្បីរកកិច្ចអន្តរាគមន៍ពីប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ឱ្យជួយសង្គ្រោះប្រជាធិបតេយ្យនៅកម្ពុជា ក្រោយពីបក្សកាន់អំណាចប្រើតុលាការរំលាយគណបក្សសង្គ្រោះជាតិ ចេញពីឆាកនយោបាយទំាងអយុត្តិធម៌ ខណៈគណបក្សនេះទទួលបានសំឡេងឆ្នោត ជិតពាក់កណ្តាលប្រទេស។
លោកស្រីថា ប្រទេសបារាំងដែលមានមេដឹកនាំគោរពច្បាប់ និងប្រជាធិបតេយ្យ នឹងមិនប្រើអំណាច ឬប្រើតុលាការជាឧបករណ៍ ដើម្បីបណ្ដេញពលរដ្ឋខ្លួនចេញពីប្រទេសដោយសារតែការបញ្ចេញមតិ ដូចដែលមេដឹកនាំកម្ពុជាធ្លាប់ធ្វើនោះទេ។
លោកស្រីថា៖ «លោក សុខ ឥសាន អត់យល់ថាអ្វីដែលជាច្បាប់នៃប្រទេសដែលឯករាជ្យ ប្រទេសដែលមានប្រជាធិបតេយ្យ [..] មិនមែនដឹកនាំបែបផ្ដាច់ការដូចលោក ហ៊ុន សែន ពាក្យមួយមាត់ត្រូវចូលគុក ខុសឬត្រូវទៅលើការកាត់សេចក្ដី[របស់]លោក ហ៊ុន សែន សុទ្ធសាធហ្នឹង»។
ប្រធានវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ចន្ទរឿន មើលឃើញថា សង្វៀននយោបាយបច្ចុប្បន្ន ហាក់បានចាត់ទុកដៃគូប្រកួតជាសត្រូវ ដែលមិនអនុលោមទៅតាមគន្លងប្រជាធិបតេយ្យ ដូចមានចែងក្នុងរដ្ឋធម្មនុញ្ញទេ ដែលការណ៍នេះ លោកគិតថា ជាល្បែងនយោបាយកំពុងបង្កហានិភ័យដល់ប្រទេសជាតិ។
លោកថា៖ «កាលណាចាត់ទុកគ្នាជាសត្រូវហើយ វាមិនអាចទៅផ្សះផ្សាធ្វើការជាមួយគ្នាដោយសុខដុមរមនាកើតទេ ទាល់តែចាត់ទុកគ្នាជាគូប្រកួតប្រជែង ជាខ្មែរដូចគ្នា មានសាច់ឈាមដូចគ្នា ហើយខុសត្រូវអីគួរតែនិយាយគ្នា ទៅរឿងគំនិត រឿងគោលនយោបាយ វិធីដោះស្រាយបញ្ហាសង្គម ជាជាងផ្ដោតទៅលើបញ្ហាផ្ទាល់ខ្លួន ឬក៏ប្រើប្រាស់មធ្យោបាយស្មោកគ្រោកអសីលធម៌ ក្នុងការយកឈ្នះដៃគូប្រកួតរបស់ខ្លួន ឬសត្រូវរបស់ខ្លួននោះ»។
ដោយឡែក អតីតទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី លោក សូ ណារ៉ូ យល់ថា ការតស៊ូនយោបាយខ្វះវិជ្ជាជីវៈ នឹងនាំឱ្យជាតិជួបគ្រោះអន្តរាយ។ បញ្ហានេះ លោកចង់ឃើញអ្នកនយោបាយខ្មែរងាកមកប្រកួតគ្នាតាមគោលនយោបាយ ឈរលើស្មារតីរដ្ឋធម្មនុញ្ញ បើទោះចំណុចខ្លះ លោកគិតថា សកម្មភាពលោក សម រង្ស៊ី មិនអាក្រក់ទាំងអស់ទេ។
លោកថា៖ «ដូចរាល់ថ្ងៃនេះ គណបក្សប្រជាជនកម្ពុជាចាត់ទុកលោក សម រង្ស៊ី ដូចសត្រូវ ជូរចត់ ស៊ីសាច់ហុតឈាម ប៉ុន្តែតាមពិត ខ្ញុំនិយាយស្មោះត្រង់ គ្មាននរណាជួយគណបក្សប្រជាជនច្រើនជាងលោក សម រង្ស៊ី ទេ ខ្ញុំនិយាយឱ្យអស់មួយម៉ាត់អ៊ីចឹងចុះ។ គណបក្សប្រជាជនកម្ពុជា អាចកាន់អំណាចបានជាង៣០-៤០ឆ្នាំនេះ ក៏ដោយសារ សម រង្ស៊ី ដែរ! ខ្ញុំនិយាយមួយម៉ាត់ អស់លោកពិចារណាទៅ! បើអត់លោក សម រង្ស៊ី អ្នកប្រជាធិបតេយ្យអាចរួបរួមគ្នាបានច្រើនជាងហ្នឹងឆ្ងាយណាស់ ហើយអាចធ្វើការបានច្រើនជាងហ្នឹងដែរ»។
យ៉ាងណា ក្រោយពីតុលាការកំពូលរំលាយគណបក្សសង្គ្រោះជាតិ គេសង្កេតឃើញប្លុកប្រទេសលោកសេរី បានកាត់ផ្តាច់ជំនួយពី គ.ជ.ប, ផ្តាច់ប្រព័ន្ធអនុគ្រោះពន្ធ EBA ២០ភាគរយ មុនកាលកំណត់, បិទទិដ្ឋាការមន្ត្រីជាន់ខ្ពស់នៅក្រសួងការបរទេស, ដាក់ទណ្ឌកម្មមន្ត្រីជាន់ខ្ពស់មួយចំនួន រួមទាំងឧកញ៉ា ដែលស្និទ្ធនឹងនាយករដ្ឋមន្ត្រី ក្នុងនោះរួមទាំងលោក ហ៊ីង ប៊ុនហៀង មេបញ្ជាការកងអង្គរក្សនាយករដ្ឋមន្ត្រី ដែលជាការឆ្លើយតបទៅនឹងការធ្លាក់ចុះដំណើរការប្រជាធិបតេយ្យនៅកម្ពុជា។
ដោយឡែក គណបក្សភ្លើងទៀន ដែលអតីតជាគណបក្សសមរង្ស៊ី ពេលនេះបានធ្វើសកម្មភាពនយោបាយឡើងវិញ និងកំពុងត្រៀមខ្លួនដើម្បីការបោះឆ្នោតជាតិឆ្នាំ២០២៣ខាងមុខ ជាមួយបក្សកាន់អំណាច ខណៈគណបក្សសង្គ្រោះជាតិ ត្រូវបានគេបន្តបិទខ្ទប់ពីសង្វៀននយោបាយនៅឡើយ ហើយមេដឹកនាំគណបក្សនេះមួយចំនួនកំពុងជាប់បណ្តឹងនៅតុលាការ។
របត់ថ្មីនេះត្រូវបានអ្នកវិភាគនយោបាយមើលឃើញថា ជាការចង់បានរបស់បក្សកាន់អំណាច ដើម្បីបំបែកសំឡេងប្រឆាំងដែលធ្លាប់អះអាងថានិយមប្រជាធិបតេយ្យ៕
