អាជ្ញាធរខេត្តកោះកុង អះអាងថា ករណីចាក់ដីលុបព្រៃកោងកាង និងការសាងសង់សំណង់រឹងចូលសមុទ្ទ ស្ថិតនៅភូមិខ្សាច់ក្រហម ឃុំជីខក្រោម ស្រុកស្រែអំបិល គឺមានច្បាប់អនុញ្ញាតត្រឹមត្រូវ។
កាលពីថ្ងៃទី៨ ខែវិច្ឆិកា ឆ្នាំ២០២២ មានការផ្សព្វផ្សាយតាមបណ្ដាញសង្គម និងតាមសារព័ត៌មានមួយចំនួនជាបន្តបន្ទាប់ អំពីសកម្មភាពចាក់ដីលុបព្រៃកោងកាង និងសាងសង់សំណង់រឹងចូលសមុទ្ទ ស្ថិតនៅភូមិសាស្ត្រឃុំជីខក្រោម ដោយគ្មានការទប់ស្កាត់ពីអាជ្ញាធរ។
អភិបាលរងខេត្ត និងជាអ្នកនាំពាក្យរដ្ឋបាលខេត្តកោះកុង លោក សុខ សុទ្ធី ប្រាប់វីអូឌីនៅថ្ងៃសុក្រនេះថា ករណីចាក់ដីលុបព្រៃកោងកាង និងសាងសង់សំណង់រឹងចូលសមុទ្រនោះ គឺមានច្បាប់អនុញ្ញាតត្រឹមត្រូវ។
អ្នកនាំពាក្យរូបនេះអះអាងថា ដីតំបន់នោះត្រូវបានរដ្ឋាភិបាលកាត់ចេញពីតំបន់ការពារធម្មជាតិ តាមរយៈអនុក្រឹត្យលេខ៣០ កាលពីខែមីនា ឆ្នាំ២០២១ ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋរួចទៅហើយ។
លោកបន្ថែមថា៖ «ដីកន្លែងហ្នឹងជាដីដែលរដ្ឋាភិបាលបានកាត់ចេញពីអនុក្រឹត្យលេខ៣០ សម្រាប់ឱ្យប្រជាពលរដ្ឋធ្វើជាកម្មសិទ្ធិ។ ហើយកន្លែងខ្លះ គាត់កំពុងសាងសង់ចំណតទូត និងធ្វើអ្វីផ្សេងៗទៀត»។
បើតាមវីដេអូឃ្លីបជាង៧នាទីដែលត្រូវបានផ្សព្វផ្សាយលើបណ្ដាញសង្គម កាលពីថ្ងៃទី៨ ខែវិច្ឆិកា ឆ្នាំ២០២២ បានបង្ហាញពីសកម្មភាពឡានដឹកដីចាក់លុបព្រៃកោងកាង លុបសមុទ្ទជាច្រើនហិកតា និងការសាងសង់សំណង់រឹងចាស់ថ្មី ចូលសមុទ្ទជាច្រើនកន្លែងទៀតផងដែរ។
បើតាមអនុក្រឹត្យស្តីពីការគ្រប់គ្រងអាងទន្លេ ដែលរដ្ឋាភិបាលចេញកាលពីឆ្នាំ២០១៥ ត្រង់មាត្រា៨ បានកំណត់ថា ឆ្នេរនិងពាមសមុទ្ទ ត្រូវទុកចម្ងាយ១០០ម៉ែត្រ (ពេលទឹកជោរអតិបរមា) ដោយគិតពីមាត់ឆ្នេរ និងមាត់ពាមសមុទ្ទ។
អ្នកសម្របសម្រួលសមាគមអាដហុកប្រចាំខេត្តកោះកុង លោក ថោង ច័ន្ទតារា អះអាងថា ក្នុងខេត្តកោះកុង បទល្មើសរំលោភយកដីក្នុងដែនសមុទ្ទបានកើតឡើងស្ទើរគ្រប់ទីកន្លែង ដែលប្រព្រឹត្តឡើងដោយអ្នកមានលុយមានអំណាច ហើយពុំសូវមានចំណាត់ការណាមួយពីមន្ត្រីជំនាញឡើយ ខណៈពលរដ្ឋក្រីក្រមានការល្មើសតិចតួច អាជ្ញាធរមានចំណាត់ការលឿន។
មន្ត្រីសិទ្ធិមនុស្សរូបនេះបានដាក់ការសង្ស័យថា បញ្ហានេះកើតឡើងដោយសារការប្រព្រឹត្តអំពើពុករលួយជាប្រព័ន្ធរវាងអាជ្ញាធរ និងជនល្មើសដែលជាអ្នកមានលុយមានអំណាច។ លោកបារម្ភពីការបាត់បង់ធនធានធម្មជាតិសមុទ្ទឆាប់រហ័ស និងរាលដាលទៅកន្លែងផ្សេងៗទៀតកាន់តែច្រើន ប្រសិនបើមន្ត្រីជំនាញ និងអាជ្ញាធរថ្នាក់ជាតិ មិនចុះស៊ើបអង្កេត និងពង្រឹងការអនុវត្តច្បាប់ ឬចាត់វិធានការច្បាប់តឹងរ៉ឹងចំពោះជនល្មើស និងអ្នកពាក់ព័ន្ធជាមួយបទល្មើសនោះ។
លោកបន្ថែមថា៖ «អ៊ីចឹងមន្ត្រីជំនាញ និងអាជ្ញាធរ ត្រូវតែពង្រឹងការអនុវត្តច្បាប់ ដោយចុះបង្ក្រាបឱ្យបានតឹងរ៉ឹង និងម៉ឺងម៉ាត់ ហើយអាជ្ញាធរថ្នាក់ជាតិ ត្រូវសកម្មចុះធ្វើអធិការកិច្ចពិនិត្យមើលករណីនេះ និងទប់ស្កាត់កុំឱ្យមានការប្រព្រឹត្តអំពើពុករលួយជុំវិញបទល្មើសធនធានសមុទ្ទនេះ»។
មាត្រា៩៨ នៃច្បាប់ស្ដីពីជលផល ចែងថា ការកាប់ឆ្ការ គាស់រាន ឈូសឆាយព្រៃលិចទឹក និងព្រៃកោងកាង ឬហ៊ុមព័ទ្ធកាន់កាប់ព្រៃលិចទឹក និងព្រៃកោងកាង ត្រូវផ្ដន្ទាទោសពី៣ឆ្នាំ ទៅ៥ឆ្នាំ ហើយវត្ថុតាងទាំងអស់ត្រូវរឹបអូសជាសម្បត្តិរដ្ឋ ឬបំផ្លាញចោល។
ចំណែកមាត្រា១០២ នៃច្បាប់ដដែលនេះ បញ្ជាក់ថា បើបទល្មើសនោះប្រព្រឹត្តឡើងដោយអាជ្ញាធរដែនដី មន្ត្រីនគរបាល មន្ត្រីយោធា និងមន្ត្រីពាក់ព័ន្ធផ្សេងទៀត ត្រូវផ្ដន្ទាទោសពី១ឆ្នាំ ទៅ៣ឆ្នាំ និងពិន័យជាប្រាក់ពី៥លានរៀល ទៅ៥០លានរៀល៕