កូដករណាហ្គាវើលដ៏ ប្រមាណ៣០នាក់ បាននាំគ្នាទៅប្រមូលផ្តុំនៅមុខសាលាដំបូងរាជធានីភ្នំពេញ ខណៈកូដករ២នាក់ ត្រូវចូលបំភ្លឺនៅចំពោះមុខតុលាការ ក្រោមបណ្តឹងរបស់ក្រុមហ៊ុន នៅព្រឹកថ្ងៃចន្ទនេះ។
ការប្រមូលផ្តុំនោះ កូដករក៏បានកាន់បដា ដោយសរសេរថា «ខ្ញុំមកធ្វើជាសាក្សី» ក្នុងគោលបំណងលើកទឹកចិត្ត និងគាំទ្រដល់សមាជិករបស់ខ្លួន ដែលកំពុងចូលបំភ្លឺ ក្រោមការឃ្លាំមើលពីសំណាក់អាជ្ញាធរផងដែរ។
កូដករណាហ្គាវើលដ៏ អ្នកនាង ម៉ម សុវឌ្ឍិន បានឱ្យដឹងថា កូដករណាហ្គាវើលដ៍ដែលត្រូវចូលទៅបំភ្លឺនៅតុលាការនោះ រួមមាន កញ្ញា សុខ ថាវុធ និងអ្នកស្រី នេត ចរិយ៉ា ក្នុងនោះ មានកូដករម្នាក់ចូលបំភ្លឺនៅម៉ោង៩កន្លះព្រឹកនេះ និងម្នាក់ទៀតនៅម៉ោង ២កន្លះរសៀល ក្រោមបណ្តឹងរបស់ក្រុមហ៊ុន ពីបទ «រំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់»។
សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ អ្នកនាង ណុប ទិត្យបូរ៉ាវី បានឱ្យដឹងកាលពីថ្ងៃម្សិលមិញថា ដើមចមដែលស្ត្រីទាំង២រូបនោះ ចូលបំភ្លឺនៅតុលាការ ដោយសារពួកគេមិនបានធ្វើខុសដូចការចោទប្រកាន់នោះទេ។
អ្នកនាងចាត់ទុកដីកាកោះហៅរបស់តុលាការជាលើកទី២ទៅកាន់កូដករណាហ្គានេះថា ជាសារគំរាមកំហែងដល់កម្មករ មិនឱ្យពួកគេធ្វើកូដកម្មទាមទារលក្ខខណ្ឌការងារស្របតាមច្បាប់ ។ ប៉ុន្តែអ្នកនាងថា ទោះជាមានការកោះហៅ ឬចោទប្រកាន់ក្រុមកូដករយ៉ាងណា ក៏ពួកគេនៅតែបន្តធ្វើកូដកម្មទាមទារលក្ខខណ្ឌការងាររហូតមានដំណោះស្រាយ។
អ្នកនាង ណុប ទិត្យបូរ៉ាវី បញ្ជាក់ថា៖ «ក្រុមហ៊ុនប្រើប្រព័ន្ធតុលាការ ដើម្បីដាក់សម្ពាធមកលើក្រុមកូដករ ក្រុមគ្រួសារ ឱ្យគាត់ផ្អាកធ្វើកូដកម្ម។ អ៊ីចឹងជាអំពើមួយដែលធ្វើឱ្យប្រទេសកម្ពុជាយើងអាម៉ាស់មុខបំផុត។ អ៊ីចឹង ទោះបីជាមានដីកាកោះហៅជាបន្តបន្ទាប់ក៏ពួកខ្ញុំបន្តធ្វើកូដកម្មរហូតមានដំណោះស្រាយ ព្រោះយើងប្រើប្រាស់សិទ្ធិរបស់យើងធ្វើកូដកម្ម ហើយយើងប្រើប្រាស់អស់នីតិវិធច្បាប់ ហើយពួកយើងអត់មានធ្វើអ្វីខុសផង»។
ក្រោយពីការធ្វើកូដកម្មជាង១០ខែមកនេះ កូដករណាហ្គាវើលដ៍ជិត ១០រូបហើយ ត្រូវបានសាលាដំបូងរាជធានីភ្នំពេញ កោះហៅឱ្យចូលបំភ្លឺ ក្រោមបណ្តឹងរបស់ក្រុមហ៊ុន ក្នុងនោះមានឈ្មោះ សៀក បញ្ញា, ជួប សោភ័ណ្ឌ, សុខ ថាវុធ, នេត ចរិយា, ឆាន បូរ៉ា, សាំង សុផល និង ម៉ម សុវឌ្ឍិន ជាដើម។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុន កាស៊ីណូមួយនេះ បានបញ្ឈប់បុគ្គលិកចំនួន ១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។
យ៉ាងណា បុគ្គលិកដែលចេញធ្វើកូដកម្មរយៈពេល១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕
