បេសកជន​ពិសេស​ចាត់​ទុក​ការ​ដោះលែង​អ្នកទោស​ទ្រង់ទ្រាយ​ធំ​នៅ​មីយ៉ាន់ម៉ា​ធ្វើឡើង​ក្នុង​ទិសដៅ​ត្រឹមត្រូវ

លោកប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា ចូលជួបសវនាការចំពោះលោកនាយឧត្ដមសេនីយ៍ជាន់ខ្ពស់ មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា នៅព្រឹកថ្ងៃទី២១ ខែមីនា ឆ្នាំ២០២២។ (ហ្វេសប៊ុក៖ ក្រសួងការបរទេស)

បេសកជនពិសេសនៃប្រធានអាស៊ាន ប្រកាស​ស្វាគមន៍​ចំពោះការ​ដោះ​លែង​អ្នក​ទោសទ្រង់​ទ្រាយ​ធំ​នា​ពេលថ្មីៗ​នេះនៅប្រទេសមីយ៉ាងម៉ា​ ថា​ធ្វើឡើ​ង​ក្នុ​ង​ទិសដៅត្រឹមត្រូវ ដើម្បីបង្កើតបរិយា​កាស​អំណោយ​ផល​សម្រាប់​ការចាប់​ផ្តើម​ដំណើរ​ការ​សន្ទនាក្នុង​ចំណោម​ភាគី​ពាក់​ព័ន្ធ​ទាំងអស់​នៅ​ប្រទេស​មីយ៉ាន់ម៉ា។

សេចក្ដីថ្លែងការណ៍រ​បស់​បេសកជនពិសេសនៃប្រធានអាស៊ាន ស្ដីពីការដោះលែងអ្នកទោសទ្រង់ទ្រាយ​ធំនៅប្រទេសមីយ៉ាន់ម៉ា ចេញកាលពីថ្ងៃទី១៧ ខែវិច្ឆិកា ឆ្នាំ២០២២ បាន​ឱ្យដឹងថា អ្នក​នយោបាយដែលត្រូវបានដោះលែង ក្នុងនោះមាន​លោក ច ទិនស្វេ អតីតរដ្ឋមន្ត្រីការិយា​ល័យ​ទី​ប្រឹក្សារដ្ឋ, អ្នក​ស្រី ឡី ឡី​ម៉ អតីត​អភិបាល​តំបន់​តានីន​តាយី (Tanintharyi), លោក ម្ញា អៃ សកម្មជន​គាំទ្រលទ្ធិប្រជាធិបតេយ្យជំនាន់៨៨៨៨ និងបណ្ឌិត ម្ញោ ញុនត៍ សមាជិកគណៈកម្មាធិការកណ្ដាល និងជាអ្នកនាំពាក្យនៃបក្សសម្ពន្ធជាតិដើម្បីប្រជាធិបតេយ្យ (NLD)។

ក្រៅពីនោះក៏មាន​​លោក ថេន អ៊ូ សមាជិកគណៈកម្មាធិការ​កណ្ដាល​បក្ស NLD, លោក ច ហូ ទីប្រឹក្សា​ច្បាប់​បក្ស NLD, សាស្រ្តាចារ្យ ម៉ោង តាឆូ, ព្រះតេជគុណ ស្វ៊ែ ញ៉ាវ៉ារ, លោកស្រី វីគី បូម៉ែន អតីតឯកអគ្គរាជទូតចក្រភពអង់គ្លេសប្រចាំនៅមីយ៉ាន់ម៉ា និង​ស្វាមី, លោក​សាស្រ្តាចារ្យ សន ធើណែល អតីតទីប្រឹក្សានយោបាយសេដ្ឋកិច្ចរបស់លោកស្រី អ៊ុងសាន ស៊ូជី, លោក តូរូ គូបូតា ជាអ្នកកាសែតនិងផលិតករភាពយន្តជប៉ុន និងលោក ច ថេ អ៊ូ ជាពលរដ្ឋអាមេរិក ក៏ត្រូវបានដោះលែងដែរ។

បេសកជនពិសេស​ ចាត់ទុកការដោះលែងអ្នកទោសទ្រង់ទ្រាយធំថាជា​សញ្ញាប​ង្ហាញ​ពី​សុឆន្ទៈក្នុង​ការ​ស្វែង​រក​ដំណោះ​ស្រាយ​ដោយ​សន្តិវិធី​ចំពោះ​វិបត្តិ​បច្ចុប្បន្ន និង​ជា​ការ​វិវត្តវិជ្ជមាន ស្របតាម​ស្មារតី និង​បំណង​ប្រាថ្នានៃ​កិច្ចព្រម​ព្រៀង​ជា​ឯកច្ឆន្ទ​៥​ចំណុច ដែល​សម្រេច​ក្នុង​កិច្ច​ប្រជុំ​មេដឹក​នាំ​អាស៊ាន នៅថ្ងៃទី​២៤ ខែ​មេសា ឆ្នាំ២០២១។

ការចេញសេចក្ដីថ្លែងការណ៍របស់បេសកជនពិសេស​នៃ​ប្រធាន​អាស៊ាន ធ្វើឡើ​ង​បន្ទាប់​ពី​មេដឹក​នាំ​យោធា​មីយ៉ាន់ម៉ា​ បាន​​​ដោះ​​លែង​​លោក សៀន ថឺនែល (Sean Turnell) សេដ្ឋវិទូអូស្ត្រាលី និងជាអតីតទីប្រឹក្សា​លោកស្រី អ៊ុងសាន ស៊ូជី (Aung San Suu Kyi) និងអ្នកទោសជិត៦ ០០០​នាក់​ផ្សេងទៀត​ពីពន្ធនាគារ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered