សហជីពអះអាងថា កងរាជអាវុធហត្ថខេត្តតាកែវ បានហៅតំណាងសហជីពនៅរោងចក្រ ស៊ូព្រីមៀធូ ស្ថិតនៅឃុំពពេល ស្រុកត្រាំកក់ ទៅសួរនាំ ក្រោយពីពួកគេចូលរួមរៀនវគ្គបណ្ដុះបណ្ដាលពាក់ព័ន្ធសិទ្ធិរបស់កម្មករ។
ប្រធានសហជីពចលនាកម្មករប្រចាំរោងចក្រ ស៊ូព្រីមៀធូ លោក ឆាន សាម៉ឺន ប្រាប់វីអូឌីនៅថ្ងៃសុក្រនេះថា រូបលោកនិងថ្នាក់ដឹកនាំសហជីពផ្សេងទៀត ទៅចូលរួមរៀនវគ្គបណ្តុះបណ្តាលពាក់ព័ន្ធនឹងកិច្ចការពារសង្គម សិទ្ធិកន្លែងការងារ យេនឌ័រ ការបៀតបៀន និងផ្សេងៗទៀត។
ប្រធានសហជីពរូបនេះបន្តថា ក្រោយពួកគាត់រៀនចប់ នៅថ្ងៃទី១៦ ខែវិច្ឆិកា ឆ្នាំ២០២២ កងរាជអាវុធហត្ថខេត្តតាកែវ បានហៅរូបលោក និងតំណាងសហជីពផ្សេងៗទៀត ទៅសួរនាំជុំវិញការទាមទារផ្សេងៗនៅក្នុងរោងចក្រ គោលបំណងនៃការចូលរួមរៀនវគ្គបណ្តុះបណ្តាល និងទាមទារយកឯកសារនៃការរៀនវគ្គបណ្តុះបណ្តាលនោះផងដែរ។
លោកបន្ថែមថា៖ «ខ្ញុំមិនមានការព្រួយបារម្ភអីទេ ព្រោះខ្ញុំមិនបានទៅរំលោភបំពានផ្លូវច្បាប់ ឬធ្វើអីជាមួយអាជ្ញាធរផង ព្រោះយើងរៀននេះដើម្បីយកបទពិសោធមកបង្រៀនកម្មករបន្ត ដើម្បីឱ្យគាត់យល់ដឹងពីការបៀតបៀនផ្លូវភេទ ទាក់ទងយេនឌ័រ និងទាក់ទងរឿង ប.ស.ស។ វាអត់មានខុសផង អ៊ីចឹងយើងមានអីត្រូវខ្លាចផង។ តែខ្ញុំឆ្ងល់ដែរ គ្រាន់តែយើងទៅរៀនអ៊ីចឹង ហេតុអីបានជាកងរាជអាវុធហត្ថគាត់ចុះមកសួរនាំអ៊ីចឹង?»
លេខាសហជីពសេរីកម្មករប្រចាំរោងចក្រ ស៊ូព្រីមៀធូ អ្នកស្រី ង៉ែត រ៉េម និយាយថា អ្នកស្រីមិនបានចូលរៀនវគ្គបណ្តុះបណ្តាលនោះទេ ប៉ុន្តែថ្នាក់ដឹកនាំសហជីពរបស់អ្នកស្រីផ្សេងទៀតបានចូលវគ្គបណ្តុះបណ្តាលមួយនៅរាជធានីភ្នំពេញ ហើយអ្នកស្រីដែលជាតំណាងសហជីព ក៏ត្រូវបានកងរាជអាវុធហត្ថខេត្តតាកែវ ហៅទៅសួរនាំផងដែរ។
ថ្នាក់ដឹកនាំសេរីកម្មកររូបនេះ ឱ្យដឹងថា អាវុធហត្ថបានសួរនាំអ្នកស្រី ជុំវិញការចង់បានឬការចង់ទាមទារអត្ថប្រយោជន៍ផ្សេងៗរបស់កម្មករពីរោងចក្រ ហើយរោងចក្រនោះធ្លាប់មានបញ្ហាអ្វីកើតឡើងឬក៏អត់ និងមានអង្គការសង្គមស៊ីវិលណានៅពីក្រោយសហជីពនេះឬក៏អត់ ជាដើម។ អ្នកស្រីថា អាវុធហត្ថក៏ហាមកម្មករធ្វើការតវ៉ាណាមួយដោយខុសច្បាប់នៅក្នុងរោងចក្រនេះផងដែរ។
អ្នកស្រីបន្ថែមថា៖ «គាត់ [កងរាជអាវុធហត្ថ] បន្ថែមថា យើង [ក្រុមសហជីព] ចេះតែធ្វើអីតាមតែអំពើចិត្តទេ បើមានបញ្ហាអីកើតឡើង អ្នកណាជាអ្នកទទួលខុសត្រូវ? គាត់និយាយមករបៀបថា គាត់មិនឱ្យយើងមានការតវ៉ាអីនៅក្នុងរោងចក្រ នេះន័យរបស់ពួកគាត់ចង់លើកឡើងអ៊ីចឹង»។
វីអូឌី មិនអាចសុំការបញ្ជាក់ពីមេបញ្ជាការកងរាជអាវុធហត្ថខេត្តតាកែវ លោក ឡា ឡៃ បានទេ នៅថ្ងៃសុក្រនេះ។
បើតាមកំណត់ហេតុកងរាជអាវុធហត្ថខេត្តតាកែវ កាលពីថ្ងៃទី១៦ ខែវិច្ឆិកា ឆ្នាំ២០២២ បានឱ្យដឹងថា មានសហជីពចំនួន៣ ប្រចាំរោងចក្រ ស៊ូព្រីមៀធូ ត្រូវបានអាវុធហត្ថហៅមកសួរនាំ រួមមាន សហជីពចលនាកម្មករ សហជីពសេរីកម្មករ និងសហជីពក្ដីសង្ឃឹមកម្មករកម្ពុជា។
ប្រធានសម្ព័ន្ធសហជីពចលនាកម្មករ (CUMW) លោក ប៉ាវ ស៊ីណា បានចាត់ទុកទង្វើនេះថាជាការគំរាមកំហែងផ្នែកស្មារតី និងការបំភិតបំភ័យយ៉ាងធ្ងន់ធ្ងរ ដោយថា ពួកគាត់ជាតំណាងសហជីពដែលស្របច្បាប់ ទទួលស្គាល់ដោយក្រសួងការងារ និងច្បាប់សហជីពផ្អែកលើអនុសញ្ញាអន្តរជាតិ ILO ជាដើម។
មេសហជីពរូបនេះបន្ដថា គោលបំណងនៃវគ្គបណ្តុះបណ្តាលនេះ គឺបណ្ដុះបណ្ដាលតំណាងសហជីព សកម្មជន សមាជិកសហជីព ដើម្បីឱ្យពួកគាត់មានការយល់ដឹងពីច្បាប់ស្ដីពីការងារ និងប្រធានបទផ្សេងទៀតទាក់ទងទៅនឹងការការពារសិទ្ធិរបស់ពួកគាត់ តាមរយៈកម្មវិធីបណ្ដុះបណ្ដាលរបស់អង្គការដៃគូ ដែលស្របទៅតាមលក្ខន្ដិកៈសហជីព និងស្របទៅតាមច្បាប់របស់កម្ពុជា។
លោកបន្ថែមថា៖ «សកម្មភាពរបស់កងរាជអាវុធហត្ថខេត្ដតាកែវ ក្នុងការកោះហៅពួកគាត់ឱ្យចូលបំភ្លឺខាងលើនេះ គឺជាទង្វើ និងសកម្មភាពមួយបង្ហាញពីការគំរាមកំហែង និងបំភិតបំភ័យដល់តំណាងសហជីពរបស់យើង ដែលគ្រាន់តែទៅចូលរួមវគ្គបណ្ដុះបណ្ដាល ដើម្បីបង្កើនចំណេះដឹង ប្រយោជន៍យកទៅប្រើប្រាស់ក្នុងការការពារសិទ្ធិ និងដោះស្រាយវិវាទជាមួយភាគីនិយោជកតែប៉ុណ្ណោះ»។
ប្រធានសមាគមអភិវឌ្ឍន៍ជីវភាពពលរដ្ឋកម្ពុជា លោក ព្រុំ ប៊ុនថន ដែលតាមដានរឿងនេះ មានប្រសាសន៍ថា ករណីកងរាជអាវុធហត្ថហៅតំណាងសហជីពសួរនាំដោយគ្រាន់តែពួកគេចូលវគ្គបណ្តុះបណ្តាលនោះ គឺជាការគំរាមកំហែង ការបំភិតបំភ័យ និងរំលោភសិទ្ធិកម្មករឬពលរដ្ឋ ដែលធានាដោយច្បាប់រដ្ឋធម្មនុញ្ញ។
មន្ត្រីសង្គមស៊ីវិលផ្នែកសិទ្ធិការងាររូបនេះបន្តថា ករណីរបៀបនេះបានកើតច្រើនក្នុងសង្គមកម្ពុជា ជាពិសេសទៅលើសកម្មជនសហជីពឯករាជ្យ សកម្មជនសិទ្ធិមនុស្ស និងសកម្មជនសង្គមផ្សេងទៀត។
លោក ព្រុំ ប៊ុនថន បន្ថែមថា ប្រសិនបើសកម្មភាពទាំងនេះនៅតែបន្តកើតមានទៀត នឹងធ្វើឱ្យប៉ះពាល់ដល់មុខមាត់រដ្ឋាភិបាលលើឆាកអន្តរជាតិ ពាក់ព័ន្ធការរំលោភសិទ្ធិមនុស្ស និងមួយវិញទៀតអាចប៉ះពាល់ដល់ការទទួលបានសន្លឹកឆ្នោតពីប្រជាពលរដ្ឋផងដែរ។
លោកបន្ថែមថា៖ «អាជ្ញាធរពេលដែលបង្ហាញសញ្ញាណបែបហ្នឹង ខ្ញុំថាវាអត់ល្អអីទាល់តែសោះសម្រាប់រដ្ឋាភិបាល ព្រោះរដ្ឋាភិបាលខិតខំធ្វើកំណែទម្រង់បើកលំហសេរីភាពដល់ពលរដ្ឋ ប៉ុន្តែផ្ទុយទៅវិញ អាជ្ញាធរមូលដ្ឋានបានធ្វើផ្ទុយពីរដ្ឋាភិបាលចង់បានហ្នឹង។ អ៊ីចឹងធ្វើឱ្យមានការថ្នាំងថ្នាក់ជាមួយប្រជាពលរដ្ឋ។ អាជ្ញាធរគួរតែកែឥរិយាបថ បើនៅតែបន្តធ្វើបែបហ្នឹងទៀត ហើយធ្វើឱ្យពលរដ្ឋថ្នាំងថ្នាក់ ហើយការបោះឆ្នោតឆ្នាំ២០២៣ វាកៀកដែរ។ អ៊ីចឹងចង់មិនចង់ វាធ្វើឱ្យប៉ះពាល់ដល់មុខមាត់រដ្ឋាភិបាលដែរ»។
មេដឹកនាំសហជីពបានអំពាវនាវដល់ថ្នាក់ដឹកនាំខេត្តតាកែវ ពិនិត្យតាមដានមើលរាល់ការអនុវត្ដមិនត្រឹមត្រូវរបស់កងកម្លាំងមានសមត្ថកិច្ច និងបញ្ឈប់នូវរាល់ចេតនាបំភិតបំភ័យផ្លូវអារម្មណ៍ដល់ថ្នាក់ដឹកនាំសហជីពចលនាកម្មករ ដែលជាអង្គការវិជ្ជាជីវៈតំណាងរបស់កម្មករនិយោជិត ក្នុងការធ្វើជាដៃគូសហការជាមួយភាគីនិយោជក ដើម្បីលើកកម្ពស់លក្ខខណ្ឌការងារសម្រាប់កម្មករនិយោជិតក្នុងមូលដ្ឋាន៕