បាតុករ និងនគរបាលរាប់រយនាក់បានប៉ះទង្គិចគ្នាក្នុងទីក្រុងសៀងហៃ កាលពីយប់ថ្ងៃអាទិត្យម្សិលមិញនេះ ខណៈការតវ៉ាជុំវិញវិធានការទប់ស្កាត់ជំងឺកូវីដ-១៩ ដ៏តឹងរ៉ឹងរបស់ប្រទេសចិន បានផ្ទុះកាន់តែខ្លាំងឡើងនៅថ្ងៃទីបី ហើយបានរាលដាលដល់ទីក្រុងជាច្រើន បន្ទាប់មានអគ្គិភ័យដ៏សន្ធោសន្ធៅនៅភាគខាងលិចប្រទេសចិន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៨ ខែវិច្ឆិកា ឆ្នាំ២០២២ នេះ។
បាតុកម្មទ្រង់ទ្រាយធំ មិនធ្លាប់មានពីមុនមកនៅក្នុងប្រទេសចិន ចាប់តាំងពីប្រធានាធិបតីចិន លោក ស៊ី ជីនពីង (Xi Jinping) ឡើងកាន់អំណាចអស់រយៈពេលមួយទសវត្សរ៍ ប្រឆាំងនឹងវិធានការ «សូន្យកូវីដ» ដែលត្រូវបានដាក់ចេញជិតបីឆ្នាំ ចាប់តាំងការរីករាលដាលនៃជំងឺកូវីដ-១៩។
បាតុករម្នាក់នៅក្នុងមជ្ឈមណ្ឌលហិរញ្ញវត្ថុ ដែលមានឈ្មោះថា ហ្ស័ន ហ្សៅ (Shaun Xiao) បាននិយាយ «ខ្ញុំនៅទីនេះ ព្រោះខ្ញុំស្រឡាញ់ប្រទេសរបស់ខ្ញុំ ប៉ុន្តែខ្ញុំមិនស្រឡាញ់រដ្ឋាភិបាលរបស់ខ្ញុំទេ… ខ្ញុំចង់មានសេរីភាពក្នុងការចេញទៅក្រៅ»។
ក្រុមបាតុករក៏បានដើរតាមផ្លូវក្នុងទីក្រុងវូហាន (Wuhan) និងទីក្រុង ចេងឌូ (Chengdu) កាលពីថ្ងៃអាទិត្យ ខណៈនិស្សិត នៅតាមសាកលវិទ្យាល័យជាច្រើន ជុំវិញប្រទេសចិនបានប្រមូលផ្តុំគ្នាធ្វើបាតុកម្មកាលពីចុងសប្តាហ៍។
នៅព្រឹកថ្ងៃចន្ទនេះ ក្នុងទីក្រុងប៉េកាំង ក្រុមបាតុករពីរក្រុមដែលមានមនុស្សសរុបយ៉ាងតិច ១ ០០០ នាក់ បានប្រមូលផ្តុំគ្នានៅតាមបណ្តោយផ្លូវក្រវ៉ាត់ក្រុងទី៣ នៃរដ្ឋធានីក្នុងប្រទេចិន ក្បែរទន្លេលៀងម៉ា (Liangma) ដោយបដិសេធមិនព្រមបំបែក។
បាតុករម្នាក់បានស្រែកឡើងថា៖ «យើងមិនចង់ពាក់ម៉ាស់ទេ យើងចង់មានសេរីភាព។ យើងមិនចង់ធ្វើតេស្តរកជំងឺកូវីដ-១៩ឡើយ យើងចង់បានសេរីភាព»។
អគ្គិភ័យកាលពីថ្ងៃព្រហស្បតិ៍ [ទី២៤ ខែវិច្ឆិកា ឆ្នាំ២០២២] នៅឯអគារលំនៅដ្ឋានដ៏ខ្ពស់មួយកន្លែង នៅរដ្ឋធានីអ៊ុយរូគឺ (Urumqi) នៃតំបន់ស៊ីជាំង (Xinjiang) បានបង្កឱ្យមានការតវ៉ា បន្ទាប់ពីវីដេអូបង្ហាញអំពីឧបទ្ទវហេតុនេះ ដែលត្រូវបានបង្ហោះនៅលើ ប្រព័ន្ធផ្សព្វផ្សាយសង្គមបាននាំឱ្យមានការចោទប្រកាន់ថា ការបិទខ្ទប់គឺជាមូលហេតុបង្កឱ្យមានអគ្គិភ័យដែលបានសម្លាប់មនុស្ស១០នាក់។ គួរបញ្ជាក់ថា ប្រទេសចិន នៅតែបន្តអនុវត្តគោលនយោបាយ «សូន្យកូវីដ» របស់លោក ស៊ី ជីនពីង (Xi Jinping) បើទោះបីជាប្រទេសជាច្រើននៅលើពិភពលោក បានដកចេញនូវវិធានការទប់ស្កាត់ជំងឺកូវីដ-១៩ក៏ដោយ។ កាលពីថ្ងៃសៅរ៍ ចំនួនអ្នកឆ្លងកូវីដថ្មីនៅក្នុងប្រទេសចិនមានចំនួន ៤០ ០០០នាក់ ដែលជាចំនួនឆ្លងក្នុងកម្រិតដ៏ខ្ពស់ និងបានជំរុញឱ្យរដ្ឋាភិបាលក្រុងប៉េកាំងបន្តបិទខ្ទប់នៅក្នុងទីក្រុងនានាទូទាំងប្រទេស៕
