ប្រធានគណបក្សសង្គ្រោះជាតិដែលត្រូវបានតុលាការរំលាយ បានអះអាងថា មាតុភូមិកម្ពុជា ជាផ្ទះ និងជាជម្រកដង្ហើមនៃជីវិតរបស់លោក ដូច្នេះមិនមានហេតុផលណាមួយសម្រាប់លោកដើម្បីនាំឱ្យជាតិសាសន៍ផ្សេងមកត្រួតត្រា ឬឈ្លានពានប្រឆាំងកម្ពុជានោះឡើយ។
ការអះអាងនេះត្រូវបានសរសេរបង្ហោះនៅលើទំព័រហ្វេសប៊ុករបស់លោក នៅថ្ងៃអង្គារនេះ បន្ទាប់ពីរូបលោកបានជួបជាមួយឯកអគ្គរដ្ឋទូតនៃសាធារណរដ្ឋឆែក (ឆេកូ) ប្រចាំកម្ពុជា នៅគេហដ្ឋានរបស់លោក ក្នុងរាជធានីភ្នំពេញ។
លោកបន្តថា សាធារណរដ្ឋឆែក គឺជាប្រទេសសមាជិកសហភាពអឺរ៉ុប ដែលផ្លាស់ប្តូរពីរបបសង្គមនិយមមកជាប្រទេសសេរី ដែលកាន់លទ្ធិប្រជាធិបតេយ្យវិញ និងមានការរីកចម្រើនមិនមែនតែសេដ្ឋកិច្ចទេ សិទ្ធិសេរីភាពរបស់ប្រជាពលរដ្ឋឆែកក៏ប្រសើរជាងមុនច្រើនដែរ។
លោក កឹម សុខា បន្ថែមថា ការរស់នៅរបស់លោកក្នុងប្រទេសកម្ពុជាប្រមាណ៧០ឆ្នាំមកនេះ លោកបានឆ្លងកាត់ និងស្គាល់ច្បាស់អំពីការដឹកនាំ មេដឹកនាំ សង្គមកម្ពុជា ប្រជាពលរដ្ឋខ្មែរជាច្រើនរបបនយោបាយ ច្រើនស្រទាប់ ទាំងទីក្រុងនិងជនបទ អភិជននិងអ្នកក្រីក្រ មន្ត្រីធំនិងមន្ត្រីមូលដ្ឋាន ជាដើម។
ករណីនេះ លោក កឹម សុខា អះអាងថា ការសម្រេចចិត្តដែលជាចេតនាពិតរបស់លោក ដោយមិនក្លែងបន្លំ តាមរយៈការប្តេជ្ញារស់នៅក្នុងមាតុភូមិកម្ពុជា ជាផ្ទះ ជាជម្រក ជាដង្ហើមនៃជីវិត ហើយត្រូវតែថែរក្សាការពារឱ្យបានសុខដុមរមនា គង់វង្ស គឺមិនមានហេតុផលអ្វីទាល់តែសោះ ដែលលោកត្រូវនាំជាតិសាសន៍ដទៃមកត្រួតត្រា បំផ្លិចបំផ្លាញ ឬឈ្លានពានប្រឆាំងនឹងកម្ពុជា។
លោក កឹម សុខា បន្តថា ទោះបីមាននិន្នាការនយោបាយ ឬសង្គមផ្សេងគ្នាក៏ដោយ គឺលោកត្រូវតែរួមសុខ រួមទុក្ខជាមួយពលរដ្ឋខ្មែរគ្រប់រូប ដោយមិនយកខ្មែរណាជាសត្រូវ មិនគុំកួនសងសឹកគ្នាជាដាច់ខាត។
ទំព័រហ្វេសប៊ុកលោក កឹម សុខា សរសេរថា៖ «ប្រជាពលរដ្ឋខ្មែរ ជាបងប្អូន ជាសាច់ឈាមរបស់ខ្ញុំ ទោះបីមាននិន្នាការនយោបាយ ឬសង្គមផ្សេងគ្នាក៏ដោយ គឺខ្ញុំត្រូវតែរួមសុខ រួមទុក្ខជាមួយគ្នា អត់ឱនឱ្យគ្នា មិនយកខ្មែរណាជាសត្រូវ មិនគុំកួនសងសឹកគ្នាជាដាច់ខាត។ គឺមិនមានហេតុផលអ្វីដែលខ្ញុំនាំជាតិសាសន៍ដទៃមកបង្កើតឱ្យមានអំពើប្រទូសរ៉ាយ សង្គ្រាមបង្ហូរឈាមខ្មែរជាឈាមរបស់ខ្ញុំដែរសោះឡើយ»។
វីអូឌី មិនអាចសុំការឆ្លើយតបពីអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេ នៅរសៀលថ្ងៃអង្គារនេះ ខណៈសហមេធាវីការពារសិទ្ធិរបស់លោក កឹម សុខា មួយរូប គឺអ្នកស្រី ម៉េង សុភារី ក៏មិនអាចសុំការឆ្លើយតបបានដែរ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា ការជួបពិភាក្សាគ្នារវាងថ្នាក់ដឹកនាំកម្ពុជា ជាមួយនឹងបរទេសណាមួយ ដើម្បីចែករំលែកបទពិសោធន៍គ្នា ក្នុងនាមជាប្រទេសប្រកាន់នូវរបបលទ្ធិប្រជាធិបតេយ្យ ហើយមិនមានការរៀបចំផែនការបង្កើតក្រុមប្រដាប់អាវុធបំផ្លាញ ឬរំលោភអធិបតេយ្យប្រទេសណាមួយ មិនអាចចោទប្រកាន់ឬដាក់ទោសបុគ្គលនោះបានទេ។
ករណីនេះ លោក សេក សុជាតិ ចាត់ទុកការលើកឡើងរបស់លោក កឹម សុខា ពេលនេះ ទំនងជាលោកចង់បង្ហាញសារទៅកាន់តុលាការថា ការចោទប្រកាន់មកលើរូបលោកកន្លងមក ថាបានគប់គិតជាមួយបរទេសផ្តួលរំលំរដ្ឋាភិបាល គឺជារឿងមិនពិតនោះទេ ។
លោកមានប្រសាសន៍ថា៖ «អ្វីដែលយើងស្តាប់មើល គឺគាត់ចង់បង្ហាញទៅសមភាគីដែលមកសួរសុខទុក្ខគាត់ថា គាត់ពិតជាមិនបានគប់គិតជាមួយនឹងប្រទេសណាមួយទេ។ ជាសារមួយដែលគាត់ចង់បង្ហាញពីភាពស្អាតស្អំរបស់គាត់ ដើម្បីឱ្យសហគមន៍អន្តរជាតិមើលឃើញអំពីគោលជំហររបស់គាត់ ក៏ដូចជាផ្ញើសារទៅឱ្យរដ្ឋាភិបាល តុលាការដែលកំពុងតែកាត់សេចក្តីទៅលើករណីរបស់គាត់នៅក្នុងប្រព័ន្ធតុលាការ ថាអ្វីដែលគាត់ធ្វើនេះ គាត់បានតតាំងតាមផ្លូវច្បាប់ ហើយមិនមានចេតនាណាមួយ ឬក៏មិនមានការគប់គិតណាមួយកើតចេញដូចការចោទប្រកាន់នោះទេ»។
គិតពីថ្ងៃដែលសមត្ថកិច្ចចាប់ខ្លួនទាំងពាក់កណ្ដាលអធ្រាត្រ កាលពីដើមខែកញ្ញា ឆ្នាំ២០១៧ អ្នកនយោបាយចាស់វស្សារូបនេះ ត្រូវបានតុលាការដកសិទ្ធិធ្វើនយោបាយប្រមាណ៥ឆ្នាំមកហើយ។ តុលាការក្រុងភ្នំពេញ ទើបបានបិទបញ្ចប់នីតិវិធីនៃការសួរដេញដោលលើអង្គសេចក្តី កាលពីថ្ងៃទី១៩ ខែតុលា កន្លងទៅ លើសំណុំរឿងដែលចោទប្រកាន់ពីបទ «គប់គិតជាមួយបរទេសចង់ផ្ដួលរំលំរដ្ឋាភិបាល» និងកំណត់ឱ្យភាគីក្នុងរឿងក្ដី ធ្វើសេចក្តីសន្និដ្ឋានជាលាយលក្ខណ៍អក្សរ និងទាញហេតុផលផ្ទាល់មាត់ នៅថ្ងៃទី២១ ខែធ្នូ ខាងមុខនេះ។
ក្នុងជំនួបរវាងលោក កឹម សុខា ជាមួយឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក ផាទ្រីក មើហ្វ៊ី (Patrick Murphy) កាលពីថ្ងៃទី២៤ ខែតុលា ឆ្នាំ២០២២ ដោយលោក មើហ្វ៊ី បានបង្ហោះសារនៅលើបណ្តាញសង្គម Twitter ថាសហរដ្ឋអាមេរិកប្តេជ្ញាចិត្តក្នុងការគាំទ្រចំពោះគោលបំណងរបស់ពលរដ្ឋកម្ពុជាដែលចង់បានប្រទេសកំពុងអភិវឌ្ឍន៍មួយនេះមានភាពថ្កុំថ្កើង រុងរឿង និងប្រជាធិបតេយ្យ។ ជាងនេះទៀត លោកថា សិទ្ធិធ្វើនយោបាយរបស់លោក កឹម សុខា គួរត្រូវបានផ្តល់សម្បទាឡើងវិញដោយពេញលេញ ក្រោយពីការឃុំខ្លួននិងបន្តនីតិវិធីនៅតុលាការប្រមាណ៥ឆ្នាំមកនេះ៕
