រដ្ឋាភិបាលកម្ពុជាបានចុះហត្ថលេខាទទួលនិងប្រគល់រួចហើយនូវទឹកប្រាក់ជាង ២៤៥លានដុល្លារអាមេរិក ក្នុងការសាងសង់ស្ពានមិត្តភាពកម្ពុជា-កូរ៉េ ដែលគម្រោងនេះនឹងត្រូវចាប់អនុវត្តនៅក្នុងឆ្នាំ២០២៣ ក្រោមកម្ចីឥណទានសម្បទានពីរដ្ឋាភិបាលកូរ៉េខាងត្បូង។
លោកនាយករដ្ឋមន្រ្តី ហ៊ុន សែន ដែលជាតំណាងភាគីកម្ពុជា និងឯកអគ្គរដ្ឋទូតកូរ៉េប្រចាំកម្ពុជា ជាតំណាងឱ្យភាគីរដ្ឋាភិបាលកូរ៉េ បានធ្វើពិធីប្រគល់និងទទួលរួចហើយនូវទឹកប្រាក់ក្នុងទំហំជិត ២ពាន់លានដុល្លារអាមេរិក នៅព្រឹកថ្ងៃទី៩ ខែធ្នូនេះ នៅវិមានសន្តិភាព រាជធានីភ្នំពេញ។
ដោយឡែក ក្រសួងការបរទេស និងសហប្រតិបត្តិការអន្តរជាតិកម្ពុជា បានជូនដំណឹងកាលពីថ្ងៃទី៨ ខែធ្នូ ម្សិលមិញ ថាក្នុងចំណោមឥណទានសម្បទានជិត២ពាន់លានដុល្លារនេះ កម្ពុជាបានយកថវិកាជាង២៤៥លានដុល្លារអាមេរិក ទៅប្រើប្រាស់មួយផ្នែកក្នុងការសាងសង់ស្ពានមិត្តភាពកម្ពុជា-កូរ៉េ ដែលតភ្ជាប់ពីផ្សាររាត្រី ទៅជ្រោយចង្វារ ដោយឆ្លងកាត់បឹងទន្លេសាប និងពីជ្រោយចង្វារ ទៅអរិយក្សត្រ ដែលឆ្លងកាត់ទន្លេមេគង្គ។
ប្រភពដដែលបញ្ជាក់ថា ក្រៅពីនេះ ៧០លានដុល្លារ សម្រាប់ការប្រើប្រាស់ទៅលើគម្រោងពង្រឹងសមត្ថភាពប្រព័ន្ធបណ្ដាញបញ្ជូនអគ្គិសនីនៅខេត្តព្រះសីហនុ និង ១ ៥០០លានដុល្លារអាមេរិកទៀត សម្រាប់មូលនិធិសហប្រតិបត្តិការអភិវឌ្ឍន៍សេដ្ឋកិច្ចសម្រាប់ឆ្នាំ២០២២-២០២៦។
កម្ពុជាចាត់ទុកឥណទានសម្បទានដែលផ្ដល់ដោយរដ្ឋាភិបាលនៃសាធារណរដ្ឋកូរ៉េខាងត្បូងនៅពេលនេះ គឺជាផ្នែកមួយក្នុងការចូលរួមចំណែកដ៏សំខាន់ដល់កិច្ចខិតខំប្រឹងប្រែងរបស់រដ្ឋាភិបាល ដែលជួយពន្លឿនការអភិវឌ្ឍសេដ្ឋកិច្ច ជាពិសេសពង្រឹងនូវកិច្ចសហប្រតិបត្តិការ និងទំនាក់ទំនងល្អរវាប្រទេសទាំងពីរ៕
