ក្រោមពាក្យស្លោក«ចែករំលែកក្តីស្រលាញ់ ចែករំលែកសៀវភៅ» បានជំរុញឆន្ទៈព្រះសង្ឃ អ្នកនិពន្ធ យុវជនមួយក្រុមឱ្យធ្វើយុទ្ធនាការមួយដែលមានឈ្មោះថា«មនុស្ស១នាក់ សៀវភៅ១ក្បាល ឬជាភាសាអង់គ្លេសថា One Person One Book» ក្នុងគោលបំណងកៀរគរប្រមូលសៀវភៅឱ្យបានមួយសែនក្បាល ដើម្បីផ្តល់ទៅឱ្យបណ្ណាល័យចំនួន ១០ក្នុងប្រទេសកម្ពុជា។
ព្រះតេជព្រះគុណ រឹម ណាំឈាវ ប្រធានបណ្ណាល័យគំនិត មានថេរដីកាថា យុទ្ធនាការ មនុស្ស១នាក់ សៀវភៅ១ក្បាល គឺជាការកៀរគរសៀវភៅដ៏ធំមួយ ដែលរៀបចំឡើងក្នុងគោលបំណងសំខាន់ គឺលើកស្ទួយវិស័យអំណាន និងលើកកម្ពស់សមត្ថភាពអំណាចនៅកម្ពុជា។
ព្រះតេជព្រះគុណមានថេរដីកាថា៖ «បណ្ណាល័យគំនិតបានកំណត់ផែកការសកម្មភាព ក្នុងការកៀរគរប្រមូលសៀវភៅពីគ្រប់មជ្ឈដ្ឋានឱ្យបាន១សែនក្បាល និងចែករំលែកបន្តសៀវភៅទាំងនោះ ទៅកាន់បណ្ណាល័យចំនួន១០ខេត្តផ្សេងគ្នា»។
ព្រះតេជព្រះគុណមានថេរដីកាបន្ថែមថា យុទ្ធនាកានេះនឹងបណ្តុះយុវជនឱ្យមានសមត្ថភាពផ្នែកអំណាន និងផ្តល់ឱកាសឱ្យពួកគាត់ចូលរួមអភិវឌ្ឃន៍សង្គមតាមរយៈអំណាន និងផ្សព្វផ្សាយទៅដល់យុវជនផ្សេងទៀត ដើម្បីជំរុញ និងលើកទឹកចិត្តឱ្យប្រជាជនខ្មែរគ្រប់ស្រទាប់វណ្ណៈ បែរមកស្រឡាញ់ការអានវិញ។
ព្រះតេជព្រះគុណបញ្ជាក់ថា៖«បណ្ណាល័យគំនិតមិនមែនមានគម្រោងត្រឹមតែយុទ្ធនាកានេះទេ ថែមទាំងមានគម្រោងគំនិតអ្នកនិពន្ធ និងសហគមន៍គំនិតអ្នកអាន ដើម្បីបំផុសសកម្មភាពអំណានក្នុងស្រុក»។
លោក លី តារា អ្នកនិពន្ធ និងម្ចាស់ស្នាដៃសៀវភៅជិត៣០ចំណងជើង លើកឡើងថា យុទ្ធនាកានេះជាកម្លាំងជំរុញមួយនៃវប្បធម៌អំណានក្នុងសង្គម និងយុវជនខ្លួនឯងបានឱកាសបង្កើតទម្លាប់នៃការអានសៀវភៅឱ្យកាន់តែផុសផុលឡើង។
អ្នកនិពន្ធរូបនេះរំពឹងថា៖«ឆ្នាំនេះការពិព័រណ៍សៀវភៅនឹងមានអ្នកចូលរួម១០ម៉ឺននាក់។ កន្លែងពិព័រណ៍ហ្នឹង ក៏ជាឱកាសមួយសម្រាប់យើងទៅផ្សព្វផ្សាយពីយុទ្ធនាការរបស់យើងហ្នឹង ក៏ដូចជាយើងអាចទៅ(Standby)ឈរចាំដើម្បីទទួលយកសៀវភៅពីសាធារណជន ដែលគាត់បានដឹងព័ត៌មាន»។
កន្លងមករូបលោកក៏បានធ្វើយុទ្ធនាការបរិច្ចាគសៀវភៅផងដែរ ដូចជានៅខេត្តកំពង់ចាម កាលពីឆ្នាំ២០១៨ មានចំនួន៨ ០០០ក្បាល ខេត្តកំពង់ធំ កាលពីឆ្នាំ២០១៩ មានចំនួន ៥ ០០០ក្បាល និងខេត្តត្បូងឃ្មុំ មានចំនួនជិត ៤ ០០០ក្បាល។
លោកបន្ថែមថា៖«មិនត្រឹមតែសកម្មភាពប្រមូលសៀវភៅទេ តែខ្ញុំព្យាយាមប្រមូលផ្តុំក្រុមយុវជន ដែលគាត់មានគំនិតចង់ហ៊ានផង ចង់អភិវឌ្ឍន៍សង្គមផង។ ប៉ុន្តែយើងព្យាយាមផ្សារភ្ជាប់ ការស្រឡាញ់ចំណង់ចំណូលចិត្តរបស់គាត់ហ្នឹង ជាមួយសៀវភៅផងដែរ»។
កញ្ញា រ៉ាន គា ជាអ្នកចូលរួមយុទ្ធនាការមនុស្ស១នាក់ សៀវភៅ១ក្បាល លើកឡើងថា យុវជនគួរតែចូលរួមយុទ្ធនាការនេះដើម្បីជាឱកាសសម្រាប់ពួកគាត់ បានជួប និងស្គាល់អ្នកនិពន្ធច្រើនរូប។ លើសពីនេះបានជួបមនុស្សថ្មីៗដែលចូលចិត្តអានសៀវភៅដូចគ្នា និងបានឱកាសចែករំលែកបទពិសោធន៍ដល់គ្នានឹងគ្នា ហើយយកមេរៀនទាំងអស់នោះ មកអភិវឌ្ឃន៍ខ្លួនឯង។
និស្សិតរូបនេះបន្ថែមថា៖ «អ្វីខ្ញុំរំពឹងថានឹងបានទទួលពីយុទ្ធនាការ One Book One Person គឺក្នុងគោលបំណងចង់បានសៀវភៅទៅដាក់នៅក្នុងបណ្ណាល័យនៅខេត្តខ្ញុំ ព្រោះជាខេត្តមួយនៅដាច់ស្រយាល អត់សូវមានសៀវភៅ ហើយសម្បូរក្មេងៗដែលអត់សូវបានអានសៀវភៅ»។
តាមរយៈទិវាជាតិអំណានលើកទី៧ កាលពីថ្ងៃទី១១ ខែមីនា ឆ្នាំ២០២២ ក្រោមប្រធានបទ «អំណានជួយលើក កម្ពស់គុណភាពជីវិតក្នុងសង្គមឌីជីថល។ ក្នុងឱកាសនោះ លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ទិវាជាតិអំណានលើកទី៧ មានគោលបំណងរំលេចឱ្យឃើញអំពីតួនាទីរបស់អំណាន និងភាពពាក់ព័ន្ធរបស់អំណាន ជាមួយនឹងគុណភាពជីវិតលើគ្រប់ទិដ្ឋភាពនៅក្នុងដំណាក់កាលនៃការវិវឌ្ឍន៍ឈានឆ្ពោះទៅរកសង្គមឌីជីថល។
ជាមួយគ្នានេះ នៅក្នុងកម្មវិធីកំណែទម្រង់របស់ក្រសួងអប់រំ យុវជន និងកីឡា បានចាត់ទុក ការលើកកម្ពស់សមត្ថភាពអានរបស់សិស្ស ជាពិសេសនៅកម្រិតថ្នាក់ដំបូង ជាការងារអាទិភាព។
យោងតាមសេចក្តីជូនដំណឹងបណ្ណាល័យជាតិឱ្យដឹងថា កម្ពុជានឹងរៀបចំពិព័រណ៍សៀវភៅកម្ពុជាលើកទី៩ នឹងប្រព្រឹត្តទៅចាប់ពីថ្ងៃទី ៩ ដល់ថ្ងៃទី ១១ ខែធ្នូ ឆ្នាំ ២០២២ ជាមួយនឹងប្រធានបទ «១ ថ្ងៃអាន ១ ថ្ងៃដឹង» ក្នុងគោលបំណងលើកស្ទួយការអាន និងការសរសេរ ព្រមទាំងលើកស្ទួយឧស្សាហ៍កម្មសៀវភៅនៅកម្ពុជាផងដែរ៕
