សន្តិសុខខណ្ឌដូនពេញពីរនាក់រារាំងសកម្មជនយុវជនម្នាក់ រួមជាមួយនឹងក្រុមយុវជនខ្មែរថាវរៈ មិនឱ្យរៀបចំបណ្ណាល័យចល័តតូចមួយនៅលើសួនច្បារមុខវត្តបទុមវតី រាជធានីភ្នំពេញ។
កញ្ញា ឆែម ស្រីគា ដែលជានិស្សិតសាកលវិទ្យាល័យ និងបានធ្វើការជាមួយក្រុមសកម្មជនតាំងពីឆ្នាំ២០២២ បានបង្ហោះវីដេអូផ្សាយផ្ទាល់លើបណ្ដាញសង្គមហ្វេសប៊ុកកាលពីល្ងាចថ្ងៃទី៥ ខែកុម្ភៈ ឆ្នាំ២០២៣ បង្ហាញពីបុរសពីរនាក់ជាសន្តិសុខខណ្ឌដូនពេញ ឱ្យកញ្ញារើសៀវភៅដែលដាក់តាំងបង្ហាញនៅសួនច្បារចេញ។
បណ្ណាល័យចល័តនេះ គឺជាផ្ទាំងក្រណាត់ពណ៌បៃតងតូចមួយដែលមានទំហំត្រឹមតែមួយម៉ែត្រការ៉េប៉ុណ្ណោះ ដោយមានសៀវភៅរាប់សិបក្បាលដាក់បង្ហាញសម្រាប់អ្នកដែលចង់អាន ឬខ្ចី។
នៅក្នុងវីដេអូនោះ គេឃើញបុរសពីរនាក់ដែលជាសន្តិសុខឈរក្បែរ ស្រីគា ហើយមានព្រះសង្ឃពីរបីអង្គដែលទៅមើលសៀភៅនៅទីនោះជាញឹកញាប់ និងអ្នកឈរមើលផ្សេងទៀត ខណៈពួកគេកំពុងតែរើសៀវភៅដើម្បីយកចេញ។ ស្រីគា បាននិយាយកាលពីថ្ងៃអង្គារថា កញ្ញាសង្ស័យថា ពួកគេរារាំងកញ្ញា ដោយសារតែកញ្ញាជាសមាជិកក្រុមយុវជនខ្មែរថាវរៈ ដែលបានតស៊ូមតិការពារបរិស្ថាន សិទ្ធិកូនបំណុល កិច្ចការពលរដ្ឋ និងបញ្ហាសង្គមផ្សេងៗទៀត។
កញ្ញាបន្តថា៖ «សួនច្បារសាធារណៈនេះជាកម្មសិទ្ធិរបស់សាធារណជនទូទៅ រួមទាំងរូបខ្ញុំផងដែរ ហើយខ្ញុំសុំកុំឱ្យគេរើសអើងខ្ញុំ ដោយសារតែខ្ញុំជាសមាជិកខ្មែរថាវរៈ»។
ស្រីគា បាននិយាយថា កញ្ញាធ្លាប់បង្កើតបណ្ណាល័យស្រដៀងគ្នានេះនៅខេត្តប៉ៃលិន ដែលជាស្រុកកំណើតរបស់កញ្ញា ហើយកញ្ញាចង់បង្កើតបណ្ណាល័យនេះនៅក្នុងរាជធានីភ្នំពេញដែរ។ ចំពោះបណ្ណាល័យនេះ កញ្ញាបានដាក់តាំងសៀវភៅប្រលោមលោក និងសៀវភៅបំផុសគំនិត ហើយសង្ឃឹមថានឹងទាក់ទាញអ្នកអានវ័យក្មេងដោយប្រើប្រាស់សួនច្បារនេះ។
កញ្ញាបន្តថា៖ «ខ្ញុំឃើញយុវជនដែលមកទីនេះដើម្បីដើរលេង ផឹកស្រា ឬថើបគ្នា។ ប៉ុន្តែនៅពេលដែលខ្ញុំបង្កើតបណ្ណាល័យសាធារណៈបែបនេះ វាអាចទាក់ទាញពួកគេ […] យ៉ាងហោចណាស់ ពួកគេអាចមើលឃើញ ឬប៉ះសៀវភៅដែលជាប្រភពនៃចំណេះដឹង»។
កញ្ញាបានបង្កើតបណ្ណាល័យដូចគ្នានេះដែរ កាលពីខែកញ្ញា ឆ្នាំមុន ហើយត្រូវបានបញ្ឈប់ដោយសន្តិសុខក្នុងតំបន់នៅខែវិច្ឆិកា ប៉ុន្តែមិនមានការរារាំងឡើយ បន្ទាប់ពីកញ្ញាបានរើទៅកន្លែងផ្សេងទៀតនៃសួនច្បារ។
ស្រីគា បាននិយាយថា បណ្ណាល័យតូចនោះទទួលបានជោគជ័យក្នុងការទាក់ទាញអ្នកអាន ហើយកញ្ញាចង់ទទួលបានការយល់ព្រមពីអាជ្ញាធរមូលដ្ឋាន ដើម្បីបន្តដំណើរការបណ្ណាល័យមួយនេះ។
កញ្ញាបាននិយាយថា៖ «ខ្ញុំនឹងបន្ត ទោះបីជាមានការរារាំងក៏ដោយ»។
លោក គឹម វុត្ថា ប្រធានសន្តិសុខខណ្ឌដូនពេញ មិនអាចទាក់ទងបានទេ កាលពីថ្ងៃអង្គារ។
លោក ជា ខេមា អភិបាលខណ្ឌដូនពេញ មានប្រសាសន៍ថា លោកមិនបានដឹងពីករណីនេះទេ ហើយគ្មានមន្ត្រី ឬសន្តិសុខណាម្នាក់បានប្រាប់លោកអំពីហេតុការណ៍នេះទេ។
លោកថា ការដាក់របស់របរនៅតាមចិញ្ចើមផ្លូវ ឬផ្លូវដើរ ត្រូវបានហាមឃាត់ ព្រោះវាបាំងផ្លូវអ្នកថ្មើរជើង ហើយបណ្ណាល័យគួរដាក់នៅកន្លែងដែលមិនសូវមានមនុស្ស។
លោកបន្តថា៖ «ពួកគេគួរតែរកកន្លែងត្រឹមត្រូវ ដែលគ្មានអ្នកថ្មើរជើង […] ហើយនៅពេលដែលពួកគេដាក់សៀវភៅលើសួន វានឹងប៉ះពាល់ដល់ភ្ញៀវទេសចរ និងអ្នកដែលទៅហាត់ប្រាណ។
កញ្ញា ឆែម ស្រីគា ត្រូវបានចាប់ខ្លួន រួមជាមួយនឹងសកម្មជនខ្មែរថាវរៈ និងអ្នកកាសែតផ្សេងទៀត ចំពោះការព្យាយាមតាមដានការកាប់បំផ្លាញព្រៃឈើភ្នំតាម៉ៅ កាលពីឆ្នាំមុន ដែលក្រោយមកត្រូវបានលោកនាយករដ្ឋមន្ត្រី ហ៊ុន សែន លុបចោលគម្រោងអភិវឌ្ឍន៍នៅតំបន់នោះ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Daun Penh Guards Ask Youth Activist to Dismantle Makeshift Library
