មន្រ្តីជាន់ខ្ពស់ គ.ជ.ប. ឱ្យដឹងថា ចំពោះលទ្ធផលនៃការស្នើឱ្យកែតម្រូវនៅត្រង់ខ្លឹមសារខ្លះនេះ គឺគណៈកម្មាធិការជាតិរៀបចំការបោះឆ្នោត ត្រូវការឆ្លងកាត់ពេលវេលាសមរម្យមួយ ដើម្បីពិនិត្យនិងសម្រេចថាតើការទាមទាររបស់គណបក្សខ្មែររួបរួមជាតិនេះ គួរដោះស្រាយតាមវិធីណា ហើយថាតើអ្វីដែលស្នើឡើងនេះ វាមានផលប្រយោជន៍រួមដែលបម្រើឱ្យការបោះឆ្នោតទាំងស្រុងដែរទេ។
ការឆ្លើយតបរបស់មន្រ្តីនាំពាក្យ គ.ជ.ប. នៅថ្ងៃទី១៣ ខែធ្នូនេះ ក្រោយពីតំណាងគណបក្សខ្មែររួបរួមជាតិ ដែលដឹកនាំដោយលោក ញឹក ប៊ុនឆៃ បានជួបជាមួយស្ថាប័នជាតិរៀបចំការបោះឆ្នោតនេះ នៅទីស្តីការ គ.ជ.ប. ក្នុងរាជធានីភ្នំពេញ។
លោក យ៉ែម បុញ្ញឫទ្ធិ អនុប្រធានគណបក្សខ្មែររួបរួមជាតិ បញ្ជាក់នៅថ្ងៃនេះថា មូលហេតុដែលគណបក្សក្រៅរដ្ឋាភិបាលទាមទារឱ្យកែសម្រួលខ្លឹមសារ នៃបទបញ្ជា និងនីតិវិធីនេះ ព្រោះមានចំណុចខ្លះ វាមិនបានបម្រើឱ្យសេចក្តីត្រូវការពិតប្រាកដ បម្រើឱ្យការបោះឆ្នោតទេ។ ជាងនេះទៀត ក្នុងនាមជាអ្នកនយោបាយ លោកមានសុទិដ្ឋិនិយមថា អ្វីដែលគណបក្សក្រៅរដ្ឋាភិបាលជំរុញឱ្យមានការឆ្លើយតបជាវិជ្ជមាននេះ ស្ថាប័នជាតិរៀបចំការបោះឆ្នោតនឹងយល់ពីគោលបំណងរួម ដែលចង់ឱ្យដំណើរការបោះឆ្នោតមួយប្រព្រឹត្តទៅដោយសេរី និងមានយុត្តិធម៌ដូចគ្នា។
លោកបន្តថា៖ «យើងរក្សាក្ដីសង្ឃឹម យើងយល់ឃើញការតស៊ូមតិក្នុងការបោះឆ្នោតឃុំ–សង្កាត់ អំពីទម្រង់១១០២នេះ ជាការតស៊ូលើកទី១។ នេះជាការតស៊ូមតិលើកទី២របស់យើង ហើយយើងនៅតែបន្តតស៊ូមតិ ដើម្បីទាមទារឱ្យចែកទម្រង់១១០២ហ្នឹង។ លទ្ធផលបោះឆ្នោត កើតចេញពីការិយាល័យបោះឆ្នោត ដូច្នេះភ្នាក់ងារសង្កេតការណ៍របស់គណបក្សនយោបាយនីមួយៗជាកត្តាសំខាន់ ដែលយើងឱ្យឈ្មោះថាជាឯកសារមូលដ្ឋាន និងជាបទដ្ឋានគតិយុត្តច្បាប់របស់ភ្នាក់ងារសង្កេតការណ៍ដែលចុះហត្ថលេខា នៅលើទម្រង់១១០២ ត្រូវតែបានមួយដើម្បីបានជាមូលដ្ឋាន »។
ជាអ្នកនយោបាយចាស់វស្សា លោក យ៉ែម បុញ្ញឫទ្ធិ ឱ្យដឹងថា អ្វីដែលគណបក្សខ្មែររួបរួមជាតិចង់ឱ្យកែសម្រួលសម្រាប់បទបញ្ជានិងនីតិវិធីនេះ ដូចជា ត្រូវរក្សាការចែកទម្រង់១១០២ ដូចមុន ឱ្យភ្នាក់ងារគណបក្សនយោបាយ និងភាគីពាក់ព័ន្ធ នៅនឹងការិយាល័យបោះឆ្នោត។ ក្រៅពីនេះ មិនតម្រូវឱ្យភ្នាក់ងារសង្កេតការណ៍ប្រើប្រាស់ឯកសណ្ឋាន ឬអត្តសញ្ញាណរបស់អង្គភាពដែលមិនមែនចេញដោយស្ថាប័នជាតិរៀបចំការបោះឆ្នោត ដើម្បីចុះសង្កេតការណ៍អំឡុងពេលបោះឆ្នោត ជាដើមម។
ការបើកផ្លូវឱ្យមានជំនួបទ្វេភាគី នៅថ្ងៃអង្គារនេះ នៅបន្ទាប់ពី គ.ជ.ប. បានជូនដំណឹងកាលពីថ្ងៃសុក្រ ទី៩ ខែធ្នូ ថាតំណាងគណបក្សនយោបាយអាចជួបសន្ទនាបានសម្រាប់ដំណើរការនៃការពិគ្រោះយោបល់ អំពីបទបញ្ជា និងនីតិវិធីនេះ។
យ៉ាងនេះក្តី សម្រាប់លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត និងជាប្រធាននៃកិច្ចប្រជុំនៅថ្ងៃអង្គារនេះ បានបដិសេធភ្លាមៗចំពោះលទ្ធផលនេះថាគួរឆ្លើយតបបែបណានោះ គឺមិនទាន់មានចម្លើយជាក់លាក់នៅឡើយទេ។ លោកបន្តថា ការស្នើឱ្យមានការកែសម្រួលខ្លឹមសារខ្លះនៃបទបញ្ជា និងនីតិវិធី បម្រើឱ្យការបោះឆ្នោតជ្រើសតាំងតំណាងរាស្រ្តនេះ វាមិនមែនជារឿងងាយស្រួលទេ។ បើតាមលោក ហង្ស ពុទ្ធា ចំណុចដែលបានស្នើឡើងទាំងនេះ គឺភាគី គ.ជ.ប. ត្រូវការថ្លឹងថ្លែង និងពិគ្រោះយោបល់ឱ្យបានល្អិតល្អន់ជាមុនសិន។
លោកបន្តថា៖ «សំណើទាំងនេះក៏តំណាងក្រុម គ.ជ.ប. មិនធ្វើការអនុម័តយ៉ាងណាដែរ នឹងពាំនាំដើម្បីយកទៅសិក្សា ទី១ យើងសិក្សាទៅលើទិដ្ឋភាពច្បាប់ ហើយទី២ សិក្សាទៅលើការអនុវត្ត ហើយទី៣ សិក្សាទៅលើផលប្រយោជន៍ និងឧត្តមភាពនៃការបោះឆ្នោត។ ហើយប្រសិនបើមានចំណុចដែលត្រូវទទួលយកបាន នឹងដាក់បញ្ចូលទៅក្នុងសេចក្តីព្រាងបទបញ្ជា និងនីតិវិធីនៃការបោះឆ្នោតឆ្នាំ២០២៣ »។
កាលពីថ្ងៃទី១ ខែវិច្ឆិកា ឆ្នាំ២០២២ កន្លងទៅនេះ គ.ជ.ប. បានចេញសេចក្តីជូនដំណឹង ដោយទុកពេលឱ្យភាគីពាក់ព័ន្ធ មានពេលត្រួតពិនិត្យ និងផ្តល់យោបល់ត្រលប់មកវិញ អំពីបទបញ្ជា និងនីតិវិធី បម្រើឱ្យការបោះឆ្នោតជ្រើសតាំងតំណាងរាស្រ្តនេះ ចាប់ពីថ្ងៃជូនដំណឹង រហូតដល់ថ្ងៃទី១៩ ខែវិច្ឆិកា។ សេចក្តីព្រាងបទបញ្ជា និងនីតិវិធី សម្រាប់ការបោះឆ្នោតនេះ មានកម្រាស់ ៣៣៧ទំព័រ ដែលមាន១០ជំពូក និងឧបសម្ពន្ធរួមបញ្ចូលផង។ មកដល់ថ្ងៃនេះ គេសង្កេតឃើញមានតែគណបក្សខ្មែររួបរួមជាតិមួយទេ ដែលបានប្រកាសជាចំហផ្តល់ធាតុចូលទៅ គ.ជ.ប. វិញ ដើម្បីឱ្យមានការកែតម្រូវអំពីបទបញ្ជា និងនីតិវិធីនេះ។
ចំណែក គ.ជ.ប. ក៏បានកំណត់យកថ្ងៃទី១៦ ខែធ្នូ ខាងមុខនេះ ជាពេលវេលាមួយ ដើម្បីណាត់ជួបជាមួយតួអង្គពាក់ព័ន្ធ រួមមាន តំណាងគណបក្សនយោបាយ អង្គការ និងសមាគម ដើម្បីពិនិត្យទៅលើការផ្តល់យោបល់មួយចំនួនអំពីបទបញ្ជា និងនីតិវិធី បម្រើឱ្យការបោះឆ្នោតជាតិ ឆ្នាំ២០២៣នេះ។ ចំពោះលទ្ធផល នៃជំនួបទ្វេភាគី ជាមួយតំណាងគណបក្សខ្មែររួបរួមជាតិ នៅពេលនេះ អាចនឹងត្រូវប្រកាសឱ្យដឹងនៅក្នុងជំនួបជាមួយតួអង្គពាក់ព័ន្ធ ដែលគ្រោងនឹងរៀបចំនៅថ្ងៃទី១៦ ខែធ្នូ ខាងមុខនេះដែរ។
លោក សំ គន្ធាមី នាយកប្រតិបត្តិអង្គការនិចហ្វិក យល់ឃើញថា អ្វីដែលតំណាងគណបក្សខ្មែររួបរួមជាតិ ទាមទារឱ្យស្ថាប័ន គ.ជ.ប. កែសម្រួល និងរក្សាទុកខ្លឹមសារខ្លះដូចដើមវិញ វាជាជម្រើសមួយដ៏ល្អ។ លោកបន្តថា មានតែធ្វើដូច្នេះ ទើបអាចធានាពីដំណើរការបោះឆ្នោតមួយដែលសេរី ត្រឹមត្រូវ និងមានយុត្តិធម៌បាន។
លោកបន្តថា៖ «បើយើងប្រៀបលើកមុន ជម្រើសល្អជាង។ វាធ្វើឱ្យយើងមានភាពងាយស្រួល រឿងទម្រង់រាប់សន្លឹកឆ្នោត និងបានលទ្ធផលអីហ្នឹង»។
បើតាមលោក ហង្ស ពុទ្ធា អ្នកនាំពាក្យ គ.ជ.ប. ឱ្យដឹងថា នៅថ្ងៃទី១៣ ខែមករា ខាងមុខនេះ ក្នុងនាមស្ថាប័នជាតិរៀបចំការបោះឆ្នោត គ្រោងនឹងប្រកាសលទ្ធផលរួមគ្នាអំពីបញ្ជីបោះឆ្នោតដំបូង និងបញ្ជីឈ្មោះដែលត្រូវលុបចេញ។
ដោយឡែក សម្រាប់បញ្ជីបោះឆ្នោតថ្មី ដែលនឹងត្រូវយកទៅប្រើប្រាស់សម្រាប់ការបោះឆ្នោតជ្រើសតាំងតំណាងរាស្រ្ត លើកទី៧ ឆ្នាំ២០២៣ ខាងមុខនេះ អង្គបោះឆ្នោតមានជាង ៩លាន ៨០នាក់៕