រដ្ឋមន្ត្រីក្រសួងការពារជាតិឥណ្ឌា បានឱ្យដឹងនៅថ្ងៃអង្គារថា កងទ័ពឥណ្ឌាបានរារាំងទាហានចិនមិនឱ្យចូលទឹកដីឥណ្ឌាកាលពីសប្តាហ៍មុន ក្នុងអំឡុងពេលការប៉ះទង្គិចគ្នានៅព្រំដែន ដែលបណ្តាលឱ្យភាគីទាំងសងខាងរងរបួស។
ការប៉ះទង្គិចគ្នានេះបានកើតឡើងនៅថ្ងៃទី៩ ខែធ្នូ ឆ្នាំ២០២២ នៅក្នុងទីក្រុងតាវ៉ាង (Tawang) តំបន់ហិម៉ាឡៃយ៉ាន (Himalayan) ភាគឦសាននៃរដ្ឋ Arunachal Pradesh ដែលមានព្រំប្រទល់ជាប់ភាគខាងត្បូងប្រទេសចិន និងត្រូវបានទាមទារដោយទីក្រុងប៉េកាំង។
ពាក់ព័ន្ធនឹងករណីនេះ អ្នកនាំពាក្យកងទ័ពរំដោះប្រជាជនចិន (PLA) បានថ្លែងថា កងទ័ពឥណ្ឌាបានឆ្លងកាត់ខ្សែបន្ទាត់ដោយខុសច្បាប់។
អ្នកនាំពាក្យរូបនេះបាននិយាយថា៖ «យើងជំរុញឱ្យភាគីឥណ្ឌាគ្រប់គ្រងឱ្យបានហ្មត់ចត់ និងរឹតបន្តឹងកងទ័ពជួរមុខ ហើយធ្វើការជាមួយប្រទេសចិន ដើម្បីរក្សាសន្តិភាព និងសន្តិសុខនៅតាមព្រំដែន»។
ឆ្លើយតបនឹងករណីនេះ ប្រភពពីក្រសួងការពារជាតិឥណ្ឌាបានប្រាប់ទីភ្នាក់ងារសារព័ត៌មាន Reuters ថាក្រុមល្បាតពីភាគីទាំងសងខាងបានប្រឈមមុខដាក់គ្នានៅកំពូលភ្នំ និងបានវាយតប់គ្នាដោយដៃ។ ប្រភពដដែលបន្តថា ទាហានមួយចំនួនដួលទៅលើថ្ម និងរងរបួសដោយខ្លួនឯង។ ប្រភពពីរផ្សេងទៀតបាននិយាយថា ទាហានឥណ្ឌាចំនួន៦នាក់បានរងរបួសស្រាល។
លោក រ៉ាចណាត សីង (Rajnath Singh) រដ្ឋមន្ត្រីក្រសួងការពារជាតិឥណ្ឌា បាននិយាយថា៖ «កងទ័ពរំដោះប្រជាជនចិន [PLA] បានព្យាយាមបំពានខ្សែត្រៀមគ្រប់គ្រង [LAC] នៅក្នុងតំបន់យ៉ាងស៊ី [Yangtse] នៃទីក្រុងតាវ៉ាង [Tawang] និងផ្លាស់ប្តូរស្ថានភាពជាឯកតោភាគី»។
លោកបន្ថែមថា៖ «ការប៉ុនប៉ងរបស់ចិនត្រូវបានរារាំងដោយកងទ័ពរបស់យើងដោយរឹងមាំ និងម៉ឺងម៉ាត់។ ការប្រឈមមុខដាក់គ្នាបាននាំឱ្យមានការប៉ះទង្គិចដោយដៃ ដែលកងទ័ពឥណ្ឌាបានរារាំងកងទ័ពរំដោះប្រជាជនចិនដោយក្លាហានពីការរំលោភបំពានទឹកដីរបស់យើង និងបង្ខំពួកគេឱ្យត្រលប់ទៅកាន់ទីតាំងរបស់ពួកគេវិញ»។
សូមរម្លឹកថា ប្រទេសចិន និងឥណ្ឌា ធ្លាប់បានប្រយុទ្ធក្នុងសង្គ្រាមកាលពីឆ្នាំ១៩៦២ ជុំវិញបញ្ហាជម្លោះព្រំដែន។
កាលពីឆ្នាំ២០២០ កងទ័ពល្បាតព្រំដែននៃប្រទេសទាំងពីរបានប៉ះទង្គិចគ្នាដោយការបង្ហូរឈាម ដែលបណ្តាលឱ្យកងទ័ពឥណ្ឌាចំនួន២០នាក់ និងកងទ័ពចិនយ៉ាងហោចណាស់៤នាក់បានស្លាប់៕
