គ្រាប់បែកដៃមួយគ្រាប់ត្រូវបានស្ត្រីអ្នកបោសសំរាមម្នាក់ប្រទះឃើញនៅលើសួនច្បារ មុខក្រុមហ៊ុនណាហ្គាវើលដ៍២ និងក្បែររដ្ឋសភា ក្នុងខណ្ឌចំការមន រាជធានីភ្នំពេញ។
ស្រ្តីជាអ្នកបោសសំរាមដែលបានប្រទះឃើញគ្រាប់បែកនោះ អ្នកស្រី ពៅ សាវី បានរៀបរាប់ប្រាប់អ្នកសារព័ត៌មាននៅកន្លែងកើតហេតុនោះថា នៅម៉ោងប្រមាណ៦ព្រឹក ថ្ងៃទី១៥ ខែធ្នូ ឆ្នាំ២០២២នេះ អ្នកស្រីបានទៅបោសសំរាមដូចសពដងនៅតាមដងវិថីរដ្ឋសភា ស្រាប់តែពេលនោះ អ្នកស្រីបានប្រទះឃើញវត្ថុម្យ៉ាងពណ៌ស និងមានសភាពស្អិត ហើយអ្នកស្រីក៏បានកាយមើល ស្រាប់តែប្រទះឃើញគ្រាប់បែកនោះតែម្តង ទើបអ្នកស្រីប្រញាប់រាយការណ៍ទៅសមត្ថកិច្ច។
អ្នកស្រីថា៖ «ខ្ញុំកាយមើលសង្ស័យ សង្ស័យគ្រាប់ស្អីគេ ក៏កាយមើល ដល់កាយចេញជារូបគ្រាប់ ខ្ញុំនៅ[មិនអស់ចិត្ត]នេះទៀត ស្មានតែដបទឹកអប់ ខ្ញុំកាយទៀត កាយទៅឃើញខ្សែភ្លើង។ វាអត់មានថង់ទេ វានៅស្អិតៗដូចនំខេក ឬរបៀបថង់ប្លាស្ទិក»។
វីអូឌី ពុំអាចសុំការបញ្ជាក់បន្ថែមពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បាននៅឡើយទេ។
ចំណែកប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) លោក ហេង រតនា នៅពុំទាន់អាចបញ្ជាក់លម្អិតជុំវិញហេតុការណ៍នេះបាននៅឡើយទេ ដោយគ្រាន់តែបញ្ជាក់ថា គ្រាប់បែកដែលត្រូវបានប្រទះឃើញនោះជាប្រភេទគ្រាប់បែកដៃ ហើយវាបានផ្ទុះខណៈមន្ត្រីជំនាញកំពុងឆែកប្រព័ន្ធសុវត្ថិភាព។
លោកថា៖ «គ្រាប់បែកដៃ[…]យើងចូលទៅធ្វើការទៅ ឆែកសុវត្ថិភាព គេដាក់ខ្សែទាញមើលអីទៅ វាក៏ផ្ទុះ»។
ទោះជាយ៉ាងណា ហេតុការណ៍នេះពុំបានបណ្ដាលឱ្យនរណាម្នាក់រងរបួសឬគ្រោះថ្នាក់ឡើយ ខណៈសមត្ថកិច្ចជំនាញកំពុងស្រាវជ្រាវលើករណីនេះ៕