លោកនាយករដ្ឋមន្ត្រី ហ៊ុន សែន បានឱ្យដឹងថា បញ្ហានយោបាយ និងសិទ្ធិមនុស្ស មិនគួរក្លាយជាឧបសគ្គរាំងខ្ទប់ដល់កិច្ចព្រមព្រៀងពាណិជ្ជកម្មសេរីអាស៊ាន-អឺរ៉ុបឡើយ ខណៈបាតុករកម្ពុជាប្រមាណជា១០០ទៅ២០០នាក់បានធ្វើបាតុកម្មនៅទីក្រុងព្រុចសែល ដោយទាមទារឱ្យមានការដោះលែងអ្នកទោសនយោបាយ និងអ្នកការពារសិទ្ធិមនុស្ស។
ការលើកឡើងរបស់លោកនាយករដ្ឋមន្ត្រី ហ៊ុន សែន ត្រូវបានធ្វើឡើង ខណៈលោកចូលរួមកិច្ចប្រជុំរំឮកខួបអនុស្សាវរីយ៍អាស៊ាន-សហភាពអឺរ៉ុប និងអបអរសាទរខួប៤៥ឆ្នាំ នៃដៃគូសន្ទនាអាស៊ាន-សហគមន៍អឺរ៉ុប កាលពីថ្ងៃពុធម្សិលមិញនេះ នៅទីក្រុងព្រុចសែល ក្នុងដំណើរទស្សនកិច្ចទៅកាន់អឺរ៉ុបក្នុងសប្តាហ៍នេះ។
នៅក្នុងសន្និសីទរួមនៃកិច្ចប្រជុំនោះ លោកនាយករដ្ឋមន្ត្រី ហ៊ុន សែន មានប្រសាសន៍ថា កិច្ចខិតខំប្រឹងប្រែងជាមួយនឹងការបង្កើតឱ្យមានពាណិជ្ជកម្មសេរីរវាងតំបន់ទាំងពីរ មិនគួរត្រូវបានរំខានដោយសភាពការណ៍នៅមីយ៉ាន់ម៉ា បញ្ហានយោបាយ ឬបញ្ហាសិទ្ធិមនុស្សផ្សេងទៀតឡើយ។
លោកថា៖ «ទាក់ទិននឹងសិទ្ធិមនុស្ស ទាក់ទិននឹងបញ្ហានេះ បញ្ហានោះ ខ្ញុំចង់សួរថាតើអឺរ៉ុបបានចុះហត្ថលេខាជាមួយប្រទេសណាខ្លះនៅក្នុងអាស៊ាន? ហើយតើបញ្ហាសិទ្ធិមនុស្សនៅទីនោះវាយ៉ាងម៉េច?»
លោកបន្ថែមថា៖ «ខ្ញុំសង្ឃឹមថា ចំណុចនេះគឺជាចំណុចដាស់តឿនអាស៊ានរបស់យើងឱ្យខិតខំប្រឹងប្រែងដើម្បីងើបឈរឡើង ធ្វើជាដៃគូស្មើភាព និងស្មើសិទ្ធិជាមួយសហភាពអឺរ៉ុប»។
នៅក្រៅកិច្ចប្រជុំ ពលរដ្ឋកម្ពុជានៅអឺរ៉ុប រួមទាំងអ្នកនយោបាយបក្សប្រឆាំងដែលនិរទេសខ្លួន ក៏បានធ្វើបាតុកម្មទាមទារឱ្យកម្ពុជាគោរពសិទ្ធិមនុស្ស លទ្ធិប្រជាធិបតេយ្យ និងដោះលែងអ្នកទោសនយោបាយផងដែរ។
យោងតាមវីដេអូនៃការធ្វើបាតុកម្មនោះ គឺមានបាតុករប្រមាណជា១០០នាក់ ប៉ុន្តែអតីតតំណាងរាស្រ្តគណបក្សសង្គ្រោះជាតិដែលតុលាការបានរំលាយ លោក ម៉ែន សុថាវរិន្ទ្រ បានលើកឡើងថា បាតុករដែលចូលរួមមានប្រមាណជា២០០នាក់ បើទោះបីជាមានបញ្ហាអាកាសធាតុមករំខានយ៉ាងណាក៏ដោយ។
ទោះជាយ៉ាងណា លោកមិនបានបញ្ជាក់លម្អិតពីមូលហេតុដែលអតីតប្រធានគណបក្សប្រឆាំង លោក សម រង្ស៊ី ដែលអំពាវនាវឱ្យមានការតវ៉ានោះ អវត្តមាននោះទេ ដោយលោកគ្រាន់តែប្រាប់ថា លោក សម រង្ស៊ី បានទៅកាន់សហរដ្ឋអាមេរិកតាំងពីកន្លះខែមុន។
ខណៈអះអាងថា ក្រុមអ្នកតវ៉ាបានដាក់ញត្តិលើបញ្ហាទាំងឡាយទៅកាន់សហភាពអឺរ៉ុប លោក ម៉ែន សុថាវរិន្ទ្រ បន្ថែមថា៖ «យើងទាមទារឱ្យសហភាពអឺរ៉ុបជួយនាំយកលទ្ធិប្រជាធិបតេយ្យមកកាន់កម្ពុជាវិញ និងជាពិសេសឱ្យកម្ពុជាខ្លួនឯងគោរពសិទ្ធិមនុស្ស ដោះលែងអ្នកទោសនយោបាយ និងបញ្ឈប់ការរំលោភបំពានលើអ្នកដែលបញ្ចេញមតិ»។
ព្រះតេជគុណ លួន សុវ៉ាត ដែលបានចូលរួមបាតុកម្មនោះដែរ មានសង្ឃដីកាថា ព្រះអង្គបានធ្វើដំណើរពីប្រទេសស្វីស ទៅកាន់ប្រទេសបែលហ្ស៊ិក ដើម្បីចូលរួម ដោយព្រះតេជគុណបន្ថែមថា នេះជាកាតព្វកិច្ចរបស់ព្រះអង្គ ក្នុងនាមជាពលរដ្ឋកម្ពុជាមួយរូបក្នុងការប្រឆាំងនឹងការគាបសង្កត់សិទ្ធិនានា។
ព្រះតេជគុណបន្តថា៖ «អាត្មាគឺជាព្រះសង្ឃមួយអង្គ ក្នុងចំណោមព្រះសង្ឃរាប់រយអង្គផ្សេងទៀតដែលជាជនរងគ្រោះ និងជាជនជាតិខ្មែរម្នាក់ក្នុងចំណោមជនរងគ្រោះរាប់លាននាក់»។
ជាមួយគ្នានេះ ព្រះសង្ឃមួយអង្គទៀត ព្រះនាម បូរ បេត ក៏មានសង្ឃដីកាឱ្យដឹងផងដែរថា ព្រះអង្គក៏មានការព្រួយបារម្ភចំពោះក្រុមគ្រួសាររបស់ព្រះអង្គផងដែរ បន្ទាប់ពីមានការព្រមានពីលោក ហ៊ុន សែន ប៉ុន្តែព្រះអង្គនៅតែចង់មកចូលរួមធ្វើបាតុកម្ម។
ទាក់ទិននឹងករណីនេះ ព្រះអង្គបន្ថែមថា៖ «បើសិនជាគាត់ [លោក ហ៊ុន សែន] ខឹង សូមខឹងអាត្មាបានហើយ ប៉ុន្តែសូមកុំខឹងជាមួយនឹងគ្រួសាររបស់អាត្មាអី។ គ្រួសាររបស់អាត្មាមិនបានធ្វើអ្វីនោះទេ។ ពួកគាត់គ្រាន់តែជាកសិករដែលធ្វើស្រែ ដើម្បីរកបានមួយថ្ងៃសម្រាប់មួយថ្ងៃប៉ុណ្ណោះ»។
ព្រះអង្គ បូរ បេត មានសង្ឃដីកាបន្តថា បាតុកម្មនេះមានរយៈពេលប្រមាណជា២ម៉ោង ដែលមានអ្នកចូលរួមមកពីប្រទេសបារាំង ស្វីស និងបែលហ្ស៊ិក៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Protesters in Brussels Demand Human Rights as Hun Sen Pushes Free Trade
