រដ្ឋបាលរាជធានីភ្នំពេញ អនុញ្ញាតឱ្យក្រុមយុវជនធ្វើបាតុកម្មនៅទីលានប្រជាធិបតេយ្យ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតដេប៉ាតឺម៉ង់សិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ នៅចុងខែធ្នូនេះ។
យុវជន អ៊ំ ឈុម ដែលជាអ្នកយកលិខិតជូនដំណឹងទៅសាលារាជធានីភ្នំពេញ បានឱ្យវីអូឌីដឹងនៅថ្ងៃអាទិត្យនេះថា រដ្ឋបាលរាជធានីភ្នំពេញបានសម្រេចអនុញ្ញាតឱ្យក្រុមយុវជនធ្វើបាតុកម្មនៅទីលានប្រជាធិបតេយ្យ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ នៅថ្ងៃទី២៤ និង២៥ ខែធ្នូ ឆ្នាំ២០២២ វេលាម៉ោង៦ព្រឹក រហូតដល់ម៉ោង៦ល្ងាច ដោយដាក់កំហិតឱ្យអ្នកចូលរួមក្រោម២០០នាក់។
ទោះជាយ៉ាងណា លោក អ៊ំ ឈុម បន្តថា បច្ចុប្បន្ននេះ ក្រុមការងាររបស់លោកកំពុងស្រង់ស្ថិតិនៃចំនួនប្រជាពលរដ្ឋដែលគាត់គាំទ្រការធ្វើបាតុកម្មឱ្យបានជាក់លាក់ ខណៈលោកអំពាវនាវឱ្យប្រជាពលរដ្ឋគ្រប់រូប ជាពិសេសយុវជនចូលរួមបាតុកម្មនៅចុងខែធ្នូនេះឱ្យបានច្រើនកុះករ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ។
លោកមានប្រសាសន៍ថា៖ «សូមឱ្យមានការចូលរួមឱ្យបានច្រើន ព្រោះនេះជាឱកាសតែមួយគត់សម្រាប់ប្រជាពលរដ្ឋ» ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍ថា សាលារាជធានីអនុញ្ញាតឱ្យក្រុមយុវជនធ្វើបាតុកម្មនៅទីលានប្រជាធិបតេយ្យ ប៉ុន្តែពួកគេត្រូវផ្តល់ចំនួនជាក់លាក់ដល់សាលារាជធានីភ្នំពេញ ដើម្បីងាយស្រួលអាជ្ញាធរចាត់កម្លាំងជួយរក្សាសណ្តាប់ធ្នាប់សាធារណៈ និងការពារសុវត្ថិភាពជូនប្រជាពលរដ្ឋ។
លោកមានប្រសាសន៍ថា៖ «យើងអនុញ្ញាតឱ្យធ្វើនៅសប្តាហ៍ក្រោយ យើងចង់ឱ្យកំណត់ចំនួនជាក់លាក់ ដើម្បីឱ្យសមត្ថកិច្ថរបស់យើងអាចជួយមើលខុសត្រូវ ឬការពាក់ព័ន្ធផ្សេងៗលើចំនួនអ្នកចូលរួមហ្នឹង ដូចជា ការងារសណ្ដាប់ធ្នាប់ ចំណត ឬក៏ករណីផ្សេងៗទៀតជាដើម។ អ៊ីចឹងចំនួនសុំ [ឱ្យអ្នកចូលរួមបាតុកម្ម] វាចំហខ្លាំងពេក ពី១០នាក់ ទៅ២០០នាក់។ យើងមិនអាចយកជាការបាន ដូចយើងស្នើឱ្យគាត់ពិចារណា ហើយជូននូវចំនួនជាក់លាក់មួយ មុនពេលធ្វើបាតុកម្មនៅសប្តាហ៍ក្រោយនេះ»។
លោក ម៉េត មាសភក្ដី សង្ឃឹមថា ក្រុមយុវជននឹងជូនព័ត៌មានអ្នកចូលរួមធ្វើបាតុកម្មនៅទីលានប្រជាធិបតេយ្យឱ្យបានជាក់លាក់ ហើយធ្វើតាមច្បាប់កំណត់មិនឱ្យលើស២០០នាក់។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា នៅក្នុងច្បាប់ ការជួបជុំ ប្រមូលផ្ដុំដោយសន្តិវិធីក្រោម២០០នាក់ គ្រាន់តែជូនដំណឹងទៅសាលារាជធានីភ្នំពេញ គឺប្រជាពលរដ្ឋគ្រប់រូបអាចធ្វើការជួបជុំសម្តែងមតិបែបអហិង្សាស្របតាមច្បាប់។ ប៉ុន្តែលោកថា បើសាលារាជធានីភ្នំពេញអនុញ្ញាតឱ្យពលរដ្ឋធ្វើបាតុកម្មដោយសន្តិវីធី ដោយដាក់កំហិតចំនួនក្រោម២០០នាក់ មានន័យថា ស្មើនឹងសុំច្បាប់ជួបជុំគ្នា ដែលការណ៍នេះ ផ្ទុយពីច្បាប់ដែលបានចែងទៅវិញ ។
លោកមានប្រសាសន៍ថា៖ «ការសម្តែងមតិនៅទីលានប្រជាធិបតេយ្យ ជាការជូនដំណឹង គឺពលរដ្ឋអាចធ្វើការជួបជុំបានហើយ មិនមែនជាការអនុញ្ញាតនោះទេ។ បើយើងប្រើសាលារាជធានីភ្នំពេញអនុញ្ញាត ស្មើនឹងការសុំច្បាប់ វាផ្ទុយពីច្បាប់បាតុកម្មដោយសន្តិវិធី។ ហើយទី២ ការឱ្យកំណត់ចំនួនជាក់លាក់ មិនមែនជារឿងធ្ងន់ធ្ងរទេ។ បើក្នុងការជូនដំណឹងពី១០នាក់ទៅ២០០នាក់ ខ្ញុំគិតថា ចំនួននេះ វាមិនមែនជាបញ្ហាធំដែលធ្វើឱ្យរាំងស្ទះនៅក្នុងការជួបជុំនិងការប្រមូលផ្តុំនេះទេ»។
លោកបន្ថែមថា៖ «បើសិនជាមានការចូលរួមសម្តែងមតិ មានចំនួនលើសតិចតួច ឬខ្វះតិចតួច ហើយមានការចាប់ទោស រារាំង មិនអនុញ្ញាតឱ្យធ្វើការជួបជុំវិញ មានន័យថា ស្មើនឹងមិនឱ្យធ្វើដដែល»។
ការស្នើសុំធ្វើបាតុកម្មរបស់ក្រុមយុវជនទាំងនេះធ្វើឡើងក្រោយពីក្រសួងអប់រំ យុវជន និងកីឡា គ្រោងបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ខណៈក្រសួងមហាផ្ទៃបានក្រើនរំឭកដល់មន្ត្រីក្រោមឱវាទ និងវិស័យឯកជនទទួលស្គាល់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្តសម្រាប់បម្រើក្នុងជីវភាពប្រចាំថ្ងៃ បន្ទាប់ពីរកឃើញថា មន្ត្រីថ្នាក់ក្រោមជាតិ និងវិស័យឯកជនមួយចំនួន មិនទាន់ទទួលស្គាល់តម្លៃក្នុងការប្រើប្រាស់បណ្ណស្នាក់នៅអចិន្ត្រៃយ៍របស់ជនបរទេសអន្តោប្រវេសន្តទាំងនោះ។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំង២ភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យនិងដោះស្រាយយ៉ាងហ្មត់ចត់ពីអង្គការរដ្ឋ។
ចំណែកមាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខណ្ឌនៃច្បាប់ ខណៈមាត្រា៤១ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម៕