អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានឱ្យដឹងនៅថ្ងៃចន្ទម្សិលមិញនេះថា អាមេរិកសង្ឃឹមថា ប្រទេសចិនអាចដោះស្រាយបាននូវការផ្ទុះឡើងវិញនៃជំងឺកូវីដ-១៩ នាពេលបច្ចុប្បន្ននេះ ខណៈចំនួនកើនឡើងអ្នកឆ្លងនៃមេរោគនេះ គឺជាក្តីបារម្ភដ៏ធំមួយរបស់សកលលោក ដោយសារតែទំហំសេដ្ឋកិច្ចរបស់ប្រទេសចិន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ក្នុងសន្និសីទសារព័ត៌មានប្រចាំថ្ងៃមួយ អ្នកនាំពាក្យក្រសួងការបរទេសអាមេរិក បានថ្លែងថា៖ «ចំនួនកើនឡើងអ្នកឆ្លងនៃជំងឺនេះ [ក្នុងប្រទេសចិន] ក៏ជាការព្រួយបារម្ភចំពោះប្រទេសដទៃទៀតក្នុងពិភពលោកផងដែរ ដោយសារតែទំហំនៃផលិតផលក្នុងស្រុកសរុប [GDP] ក៏ដូចជាទំហំសេដ្ឋកិច្ចរបស់ប្រទេសចិន»។
លោកបន្ថែមថា៖ «ការដែលរក្សាបាននូវស្ថានភាពល្អទាក់ទងនឹងវីរុសកូវីដ-១៩ នៅក្នុងប្រទេសចិន គឺមិនមែនល្អសម្រាប់តែប្រទេសចិនប៉ុណ្ណោះទេ ប៉ុន្តែវាក៏ល្អសម្រាប់ពិភពលោកទាំងមូលផងដែរ»។
លោក Ned Price បានឱ្យដឹងទៀតថា រាល់ពេលដែលមេរោគមានការឆ្លងរីករាលដាល វាមានសក្ដានុពលក្នុងការបំប្លែង និងបង្កការគំរាមកំហែងនៅគ្រប់ទីកន្លែងទាំងអស់។
ការថ្លែងជាក្ដីបារម្ភរបស់អ្នកនាំពាក្យក្រសួងការបរទេសអាមេរិករូបនេះ បានធ្វើឡើងស្របពេលដែលសញ្ញាឆ្លងរីករាលដាលនៃជំងឺកូវីដ-១៩ ហាក់កំពុងតែចាប់ផ្ដើមហក់ឡើងវិញនៅក្នុងប្រទេសចិន នៅក្រោយរដ្ឋាភិបាលប្រកាសបោះបង់ចោលគោលនយោបាយកូវីដសូន្យ ដែលអនុវត្តបាន៣ឆ្នាំមកនេះ កាលពីសប្តាហ៍មុន។
គួរបញ្ជាក់ថា ចិន គិតរហូតមកដល់ពេលបច្ចុប្បន្ន មានការឆ្លងវីរុសកូវីដ-១៩ សរុបនៅក្នុងប្រទេសជិត ២ លានករណី។
ទោះជាយ៉ាងណា ចំនួនអ្នកស្លាប់ដោយសារជំងឺកូវីដ-១៩ ដែលត្រូវបានបញ្ជាក់ជាផ្លូវការនៅក្នុងប្រទេសមួយនេះមានចំនួន ៥ ២៣៧នាក់ ខណៈវាគឺជាតួលេខទាបមួយ បើគិតពីចំនួនប្រជាជន១,៤ពាន់លាននាក់របស់ខ្លួន៕
