កូនប្រុសរបស់ស្ត្រីថ្ងៃសុក្រម្នាក់ដែលទើបនឹងស្លាប់ អំពាវនាវទៅអាជ្ញាធរដោះលែងឪពុករបស់ខ្លួនដែលជាអតីតសមាជិកក្រុមប្រឹក្សាខេត្តព្រៃវែងមកពីគណបក្សប្រឆាំង ដើម្បីបានជួបជុំគ្រួសារធ្វើបុណ្យសពឱ្យម្តាយ ខណៈឪពុករបស់លោកជាប់ឃុំក្នុងពន្ធនាគារជាង២០ខែទាំងអយុត្តិធម៌។
ការអំពាវនាវនេះបានធ្វើឡើងក្រោយពីអ្នកស្រី សោម ចន្ធូ វ័យ៥៣ឆ្នាំ ជាភរិយារបស់លោក សុខ ចន្ថា អតីតសមាជិកក្រុមប្រឹក្សាខេត្តព្រៃវែង មកពីគណបក្សសង្គ្រោះជាតិដែលតុលាការបានរំលាយ បានទទួលមរណភាពកាលពីម្សិលមិញ ដោយសារមានជំងឺប្រចាំកាយ (ទឹកនោមផ្អែម) ខណៈអ្នកស្រីទើបតែមកពីជួបសួរសុខទុក្ខស្វាមី នៅពន្ធនាគារត្រពាំងផ្លុង ខេត្តត្បូងឃ្មុំ បានប្រហែលមួយសប្តាហ៍។
លោក សុខ ចំរើន វ័យ២៨ឆ្នាំ ដែលត្រូវជាកូនបង្កើតរបស់ស្ត្រីថ្ងៃសុក្រ អ្នកស្រី សោម ចន្ធូ បាននិយាយនៅថ្ងៃនេះថា ម្តាយរបស់គាត់បានទទួលមរណភាពកាលពីថ្ងៃទី២០ ខែធ្នូ ម្សិលមិញ ដោយសារមានជំងឺប្រចាំកាយ(ទឹកនោមផ្អែម)។ លោកសង្កេតឃើញថា ម្តាយគាត់ធ្លាក់ខ្លួនឈឺធ្ងន់ធ្ងររហូតដល់ស្លាប់ ដោយសារម្ដាយគាត់មានវិបត្តិផ្លូវចិត្ត ព្រោះតែគិតលើសេដ្ឋកិច្ចក្នុងគ្រួសារ និងមិនដឹងថាថ្ងៃណាអាជ្ញាធរដោះលែងស្វាមីគាត់ឈ្មោះ សុខ ចន្ថា ឱ្យមានសេរីភាពហើយបានជួបជុំគ្រួសារវិញ។
ជាមួយគ្នានេះដែរ លោក សុខ ចំរើន បានអំពាវនាវទៅអាជ្ញាធរដោះលែងឪពុករបស់គាត់មានសេរីភាព បានជួបជុំគ្រួសារ និងបានចូលរួមធ្វើបុណ្យសពភរិយារបស់គាត់ជាលើកចុងក្រោយផង។
លោកអំពាវនាវដូច្នេះថា៖ «បើសិនជាគាត់មានឱកាសបានចេញពីពន្ធនាគារមកធ្វើបុណ្យឱ្យម្តាយខ្ញុំបាន៧ថ្ងៃ… ខ្ញុំគិតថាល្អ គាត់នឹងបានធូរចិត្តខ្លះ! តែបើគាត់មិនបានធ្វើទេ ដឹងតែគាត់មិនអស់ចិត្តទេ! គាត់នឹងមានអារម្មណ៍សោកស្តាយ សោកស្តាយមួយជីវិត ដែលប្រពន្ធរបស់គាត់ទៅចោលគាត់ ព្រោះយើងមានបញ្ហារឿងនយោបាយ បានគេចោទប្រកាន់គ្មានភស្តុតាងសោះ»។
លោក សុខ ចំរើន បញ្ជាក់ថា គាត់មិនទាន់ប្រាប់ឪពុករបស់គាត់ថាម្តាយស្លាប់នោះទេ ដោយសារបារម្ភខ្លាចឪពុកដែលកំពុងជាប់ក្នុងពន្ធនាគារមានអារម្មណ៍កាន់តែពិបាកចិត្ត និងប៉ះពាល់ផ្លូវចិត្ត។
អ្នកស្រី កុល សាត ស្ត្រីថ្ងៃសុក្រ និងជាភរិយាលោក គង់ ម៉ាស់ សកម្មជនគណបក្សសង្គ្រោះជាតិដែលត្រូវបានតុលាការរំលាយ និងកំពុងជាប់ឃុំផងដែរនោះ មានប្រសាសន៍ថា អ្នកស្រី សោម ចន្ធូ ជាស្ត្រីលេចធ្លោម្នាក់ក្នុងចំណោមក្រុមស្ត្រីថ្ងៃសុក្រ ដែលតែងតែជួបជុំគ្នាតស៊ូមតិ និងយកញត្តិដាក់នៅតាមស្ថានទូតនានា និងស្ថាប័នរដ្ឋមួយចំនួនឱ្យជួយអន្តរាគមន៍ដោះលែងស្វាមីគាត់ និងអ្នកជាប់ឃុំមនសិការផ្សេងៗទៀតជាដើម។
អ្នកស្រីថា រូបគាត់ និងក្រុមស្ត្រីថ្ងៃសុក្រ លែងបានជួបមុខអ្នកស្រី សោម ចន្ធូ ជារៀងរហូត ដោយសារគាត់បានទទួលមរណភាពកាលពីថ្ងៃទី២០ ខែធ្នូ ម្សិលមិញនេះ។ តែយ៉ាងណា អ្នកស្រីថា ក្រុមស្ត្រីថ្ងៃសុក្រ នៅតែបន្តធ្វើការតស៊ូមតិបែបអហិង្សា ដើម្បីទាមទារឱ្យស្វាមីរបស់គាត់ និងអ្នកជាប់ឃុំមនសិការផ្សេងៗទៀតទទួលបានយុត្តិធម៌ និងមានសេរីភាពវិញ។
អ្នកស្រីមានប្រសាសន៍ថា៖ «បើទោះបីជាបាត់បង់គាត់ម្នាក់ក៏ដោយ ក៏មានក្រុមគ្រួសារច្រើនទៀតមិនអាចឈប់បានទេ ពីព្រោះប្តីពួកខ្ញុំ ក៏ដូចជាប្តីពួកគាត់ នៅពន្ធនាគារ ដែលអត់ទាន់មានសិទ្ធិសេរីភាព។ អ៊ីចឹងពួកខ្ញុំនៅតែបន្តកម្មវិធីតវ៉ា ក៏ដូចជាដាក់ញត្តិទៅស្ថាប័ននានា ដើម្បីរកយុត្តិធម៌ ដើម្បីឱ្យគេដោះលែងប្តីពួកខ្ញុំ ក៏ដូចជាពូៗទាំងអស់ដែលជាអ្នកទោសមនសិការ ដែលគេកាត់ទោសទៅ ក្នុងមួយនាក់ៗច្រើនឆ្នាំ ទាំងអយុត្តិធម៌។ ពួកខ្ញុំនៅតែបន្តរហូតមានដំណោះស្រាយ ឱ្យពួកគាត់មានសិទ្ធិសេរីភាពឡើងវិញ»។
វីអូឌី មិនអាចសុំការអត្ថាធិប្បាយជុំវិញករណីនេះពីអគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ លោក នុត សវនា បានទេ នៅថ្ងៃពុធនេះ ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា តាមគោលការណ៍មនុស្សធម៌ តុលាការនិងអាជ្ញាធរគួរពិនិត្យមើលនីតិវិធីច្បាប់ ហើយដោះលែងលោក សុខ ចន្ថា ដែលជាស្វាមីអ្នកស្រី សោម ចន្ធូ ដើម្បីឱ្យលោកបានទៅជួបជុំក្រុមគ្រួសារ និងបានធ្វើបុណ្យជូនភរិយារបស់ខ្លួនដែលបានចែកឋានទៅ ខណៈលោក សុខ ចន្ថា និងសកម្មជនបក្សប្រឆាំងមួយចំនួនទៀត ជាប់ពន្ធនាគារដោយអយុត្តិធម៌។
លោកស្រីមានប្រសាសន៍ថា៖ «នៅលើពិភពលោក ក៏គេមានការលើកលែងក្នុងករណីមួយចំនួនដែរ ដែលគេអនុញ្ញាតឱ្យអ្នកដែលជាប់ឃុំអាចទៅចូលរួមកម្មវិធីសំខាន់ៗមួយចំនួនរបស់ក្រុមគ្រួសាររបស់គេ។ អ៊ីចឹងករណីទាំងអស់ហ្នឹង យើងគួរតែពិនិត្យមើលទៅតាមនីតិវិធីច្បាប់។ ហើយទី២ ដូចខ្ញុំនិយាយអ៊ីចឹងថា ពួកគាត់មិនគួរប្រឈមនូវការកាត់ទោសនូវអយុត្តិធម៌បែបនេះណាស់ ហើយពួកគាត់មិនគួរត្រូវបានចោទប្រកាន់តាំងពីដំបូងមកម៉្លេះ ហើយគួរតែត្រូវបានដោះលែងឱ្យមានសេរីភាព អាចជួបជុំនឹងក្រុមគ្រួសារ ប្រកបការងារជាធម្មតាវិញ»។
កាលពីថ្ងៃទី២១ ខែសីហា សមត្ថកិច្ចបានផ្ទេរសកម្មជនបក្សប្រឆាំងចំនួន១៤នាក់ ក្នុងចំណោមអ្នកជាប់ឃុំផ្សេងទៀត ចេញពីពន្ធនាគារព្រៃស ទៅកាន់ពន្ធនាគារត្រពាំងផ្លុង ខេត្តត្បូងឃ្មុំ ក្បែរព្រំដែនវៀតណាម ដោយគ្រួសារនិងមេធាវី អះអាងថា សមត្ថកិច្ចមិនបានបញ្ជាក់ពីមូលហេតុច្បាស់លាស់ និងមិនបានជូនដំណឹងដល់ពួកគេឡើយ។
សកម្មជនគណបក្សសង្គ្រោះជាតិដែលត្រូវតុលាការរំលាយកាលពីឆ្នាំ២០១៧ ត្រូវបានចៅក្រមសាលាដំបូងរាជធានីភ្នំពេញ ចោទប្រកាន់ពីបទ «ញុះញង់ និងរួមគំនិតក្បត់» ពាក់ព័ន្ធនឹងការគាំទ្រដំណើរវិលត្រលប់មិនបានសម្រេចរបស់លោក សម រង្ស៊ី និងមន្ត្រីបក្សប្រឆាំងផ្សេងទៀត កាលពីថ្ងៃទី៩ ខែវិច្ឆិកា ឆ្នាំ២០១៩។ ក្រោយពីមានការកាត់ទោសក្រុមសកម្មជនបក្សប្រឆាំងក្នុងទ្រង់ទ្រាយធំចំនួន៤៣នាក់នេះរួចមក អ្នកជំនាញសិទ្ធិមនុស្សនៅអង្គការសហប្រជាជាតិ កាលពីថ្ងៃទី២៩ ខែមិថុនា ឆ្នាំ២០២២ បានស្នើទៅរដ្ឋាភិបាលកម្ពុជាឱ្យពិនិត្យឡើងវិញលើករណីនេះ ដោយសម្អាងថា វិធាននោះមិនបានភ្ជាប់កាតព្វកិច្ចនៃការគោរពសិទ្ធិមនុស្សអន្តរជាតិ និងលំហនយោបាយពហុបក្សឡើយ៕
