លោកនាយករដ្ឋមន្ត្រី ហ៊ុន សែន ប្រកាសជំហរមិនដកថយ ក្នុងការប្រើប្រព័ន្ធច្បាប់ដែលគេមើលឃើញថាមិនឯករាជ្យ ដើម្បីវាយបកទៅលើក្រុមអ្នកនយោបាយជំទាស់ តាមរយៈវិធានរឹបអចលនទ្រព្យដីធ្លី ក្នុងនោះមានទាំងលោក សម រង្ស៊ី និងលោក សុន ឆ័យ ផងដែរ នូវអ្វីដែលលោកថា ដើម្បីលុបបំបាត់ការចោទប្រកាន់បក្សកាន់អំណាចរបស់លោក។
ការថ្លែងរបស់លោក ហ៊ុន សែន នេះ ធ្វើឡើងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ១៤៦B នៅខេត្តព្រះសីហនុ នាថ្ងៃព្រហស្បតិ៍នេះ។
លោកទម្លាយថា ស្នាក់ការកណ្ដាលគណបក្សប្រឆាំង ដែលជាកម្មសិទ្ធិរបស់លោក សម រង្ស៊ី នៅសង្កាត់ចាក់អង្រែលើ ក្នុងរាជធានីភ្នំពេញ លក់ដាច់ហើយ ក្នុងតម្លៃ១លាន៦សែនដុល្លារ។
លោកបន្តថា ប្រាក់នោះមិនគ្រប់២លានដុល្លារសម្រាប់សងជំងឺចិត្តគណបក្សប្រជាជនកម្ពុជាដែលជាភាគីឈ្នះក្ដីទេ ដែលការណ៍នេះ លោកថានឹងមិនត្រូវបិទបញ្ចប់ត្រឹមលក់ស្នាក់ការកណ្ដាលនេះទេ។
លោកថា៖ «ស្នាក់ការរបស់ហ្អែងលក់បាត់ហើយ មិនមែនស្នាក់ការទេ ដីរបស់ហ្អែង[លក់ហើយនៅ]ខ្វះទៀតៗ លក់បាត់ៗ ហ្អែងពូកែទៅ។ តាមមើលទៀត អាណាត្រូវសងជំងឺចិត្តអីយ៉ាងម៉េច ត្រូវសង។ ខ្ញុំបាន៧សែន[ដុល្លារ]ដែរ ព្រោះខ្ញុំទារ១លាន[ដុល្លារ] ឥលូវនៅជំពាក់ខ្ញុំ៣សែន[ដុល្លារ]ទៀត តាមទាររកអាហ្នឹង។សម្ដេចក្រឡាហោម [ស ខេង] ដូចជាបាន៣សែនដុល្លារដែរ ឬពីរសែនទេ គាត់ថាឥលូវកំពុងតែគិតថាគាត់ធ្វើអី! បង ហេង សំរិន បានប៉ុន្មាន! ហើយរដ្ឋបានប៉ុន្មានអីប៉ុន្មាន! ទេ! អារឿងហ្នឹងត្រូវតែធ្វើ»។
ដាច់ដោយឡែកពីនេះ ករណីឈ្នះក្ដីអនុប្រធានគណបក្សភ្លើងទៀន លោក សុន ឆ័យ វិញ លោកថាក៏នឹងធ្វើដូចគ្នា ដើម្បីកុំឱ្យមានការចោទប្រកាន់បក្សកាន់អំណាចថាជាចោរលួចសន្លឹកឆ្នោតនៅអាណត្តិក្រោយៗទៀត។
លោកគូសបញ្ជាក់ថា ករណីនេះ សាលាឧទ្ធរណ៍បានកាត់ក្ដីឱ្យភាគីចាញ់ក្ដីបង់ប្រាក់ជំងឺចិត្ត៤ពាន់លានរៀល ឬស្នើ១លានដុល្លារ តាមបំណងរបស់គណបក្សលោកហើយ មិនបាច់ប្ដឹងបន្តទៅតុលាការកំពូល ដូចភាគីចាញ់ក្ដីនោះទេ ។
លោកថា៖ «ឥលូវគេប្តឹងសាទុក្ខ យើងមិនបាច់ប្តឹងសាទុក្ខទេ ឱ្យតុលាការគេកាត់ហើយ រឹប[អូស]យកហ្មងកុំឆ្ងល់ពេក ដាក់ដេញថ្លៃទៀត លក់ទៀត»។
បន្ថែមពីនេះ មេដឹកនាំដែលកាន់អំណាចយូរ ៣៧ឆ្នាំ រូបនេះ ក៏បានផ្ញើសារបែបគំរាមដល់អ្នកដែលនៅតែមានទំនាក់ទំនងនិងបន្តគាំទ្រលោក សម រង្ស៊ី ផងដែរ ។
លោកថា៖ «អ្នកដែលជឿលើអាហ្នឹង គឺជម្រើសនៅសល់ មានតែ[គុក]ព្រៃស! អាហ្នឹងបន្តិចទៀត វាប្រកាសមកចាប់ខ្ញុំទៀតហើយ»។
វីអូឌី មិនអាចទាក់ទងលោក សម រង្ស៊ី ដើម្បីសុំការអត្ថាធិប្បាយ ជុំវិញសារមេដឹកនាំបក្សកាន់អំណាចនេះបានទេ នៅថ្ងៃព្រហស្បតិ៍នេះ។
ប៉ុន្តែលោក ម៉ែន សុថាវរិន្ទ្រ ដែលគេស្គាល់ថាជាមនុស្សស្និទ្ធនឹងលោក សម រង្ស៊ី បានចាត់ទុកចំណាត់ការរបស់មេដឹកនាំបក្សកាន់អំណាចនេះថា ជានយោបាយសងសឹកបែបបុគ្គល ក្រោយពីគាត់ចាញ់ក្ដីលោក សម រង្ស៊ី នៅតុលាការបារំាងថ្មីៗនេះ។
លោកយល់ថា មេដឹកនាំបក្សកាន់អំណាច គួរតែផ្តោតលើផលប្រយោជន៍ជាតិ បើកលំហប្រជាធិបតេយ្យ តាមកិច្ចព្រមព្រៀងសន្តិភាពទីក្រុងប៉ារីស ដូចការជំរុញរបស់សហគមន៍អន្តរជាតិ ដើម្បីបញ្ចៀសវិធានការកាត់ផ្តាច់ប្រព័ន្ធអនុគ្រោះផ្នែកពាណិជ្ជកម្មពីកម្ពុជា ពីសំណាក់សហភាពអឺរ៉ុប និងសហរដ្ឋអាមេរិក ។
លោកថា៖ «លោកនាយករដ្ឋមន្ត្រី [ហ៊ុន សែន] គាត់ចាញ់នយោបាយលោក សម រង្ស៊ី! គាត់ទៅរករឿងទីស្នាក់ការ រឿងដីអីឯណោះវិញ។ ខ្ញុំអត់យល់ ខ្ញុំថាខ្ញុំអត់យល់សោះ។ អ៊ីចឹងខ្ញុំថាជានយោបាយបាយឡុកបាយឡ»។
លោក សុន ឆ័យ សម្អាងថា ការដែលលោកបានលើកឡើងពាក់ព័ន្ធលទ្ធផលបោះឆ្នោតកន្លងទៅ លោកថា ជាការតស៊ូមតិតំណាងឱ្យគណបក្ស ជំទាស់នឹងការបោះឆ្នោតមិនត្រឹមត្រូវ មិនមែនជាការចោទប្រកាន់គណបក្សកាន់អំណាច និង គ.ជ.ប. ទេ ហើយថា បញ្ហានេះ លោកបានប្រាប់តុលាការក្នុងសវនាការអស់ហើយដែរ។
លោកយល់ថា ការចោទប្រកាន់លោកថាជាមនុស្សលាបពណ៌ដើម្បីចោទប្រកាន់គណបក្សកាន់អំណាច ជាការចោទខុសមនុស្ស។
លោកថា៖ «បងប្អូនប្រជាជាតិខ្មែរទាំងមូលស្គាល់ខ្ញុំហើយ តាំងពីខ្ញុំបានមកបម្រើក្នុងការងារនយោបាយដែលជាប់ឆ្នោតតាំងពីឆ្នាំ១៩៩៣មក ខ្ញុំដូចមិនដែលអនុវត្តវប្បធម៌លាបពណ៌នរណាសោះ អត់សោះ! ហើយបើយកខ្ញុំធ្វើជាឧទាហរណ៍នេះ ពិតជាខុសមនុស្សហើយ។ ដូច្នេះ ខ្ញុំសុំឱ្យរើសអ្នកផ្សេងទៅ។ ខ្ញុំដូចអត់ត្រូវមនុស្ស [លាបពណ៌ចោទប្រកាន់គេ]ទេ បាទ »។
សាលាឧទ្ធរណ៍រាជធានីភ្នំពេញ កាលពីថ្ងៃទី១៤ ខែធ្នូ ឆ្នាំ២០២២ បានកាត់ក្ដីឱ្យលោក សុន ឆ័យ បន្តកាត់ ចាញ់ក្តីគណបក្សប្រជាជនកម្ពុជា និង គ.ជ.ប.។
សាលាឧទ្ធរណ៍បានបង្កើនប្រាក់ពិន័យ ១០លានរៀល និងសំណងជំងឺចិត្តដល់បក្សកាន់អំណាចចំនួន៤ពាន់លានរៀល ឬស្មើប្រមាណ១លានដុល្លារអាមេរិក។
ដោយឡែក សាលាដំបូងរាជធានីភ្នំពេញ អំឡុងខែវិច្ឆិកា ឆ្នាំ២០២១ បានចេញដីកាសម្រេចលក់ស្នាក់ការកណ្ដាលរបស់អតីតគណបក្សសង្គ្រោះជាតិ ដែលជាផ្ទះរបស់លោក សម រង្ស៊ី នៅសង្កាត់ចាក់អង្រែលើ ក្នុងរាជធានីភ្នំពេញ។
តាមដីកាសម្រេចលក់ដោយបង្ខំរបស់ចៅក្រមអនុវត្តសាលាដំបូងរាជធានីភ្នំពេញ លោក អ៊ឹម វណ្ណៈ នៅពេលនោះ មានម្ចាស់បំណុលចំនួន៤ផ្សេងៗគ្នា ប្រធានរដ្ឋសភា លោក ហេង សំរិន, លោកនាយករដ្ឋមន្ត្រី ហ៊ុន សែន, រដ្ឋាភិបាល និងរដ្ឋមន្ត្រីក្រសួងមហាផ្ទៃ លោក ស ខេង និងកូនបំណុលនៃការអនុវត្ត ឈ្មោះ សម រង្ស៊ី និងសហកូនបំណុល លោកស្រី ជូឡុង សូមូរ៉ា។
បើតាមកម្មវត្ថុក្នុងដីកាដដែល ម្ចាស់បំណុលសុំឱ្យអនុវត្តតាមវិធានបង្ខំដោយផ្ទាល់ ដើម្បីទទួលបានការសង តាមអំណាចសាលដីកាស្ថាពររបស់តុលាការកំពូល។
តុលាការបានបញ្ជាក់នូវទឹកប្រាក់ដែលម្ចាស់បំណុលនីមួយៗទាមទារពីកូនបំណុល ក្នុងនោះ លោក ហេង សំរិន ទាមទារ២៥០លានរៀល ឬស្មើប្រមាណ៦២ ៥០០ដុល្លារ, លោកនាយករដ្ឋមន្ត្រី ហ៊ុន សែន ទារចំនួន៤ ០០០លានរៀល ឬស្មើប្រមាណ១លានដុល្លារ, រដ្ឋាភិបាលចំនួន១ ៨០០លានរៀល ឬស្មើប្រមាណ៤៥ម៉ឺនដុល្លារ និងលោក ស ខេង ចំនួន២ ០០០លានរៀល ឬស្មើប្រមាណ៥០ម៉ឺនដុល្លារ។
ដីការលក់ដោយបង្ខំរបស់ចៅក្រមនេះ ធ្វើឡើងក្រោយពីសាលាដំបូងរាជធានីភ្នំពេញ នៅថ្ងៃទី០១ ខែមីនា ឆ្នាំ២០២១ បានប្រកាសសាលក្រមកំបាំងមុខ ដាក់ទោសលោក សម រង្ស៊ី ឱ្យជាប់ពន្ធនាគាររយៈពេល២៥ឆ្នាំ ហាមមិនឱ្យបោះឆ្នោតនិងឈរឈ្មោះ ក្រោមបទ «ប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលកម្ពុជា»។
ក្រៅពីលោក សម រង្ស៊ី សាលក្រមនៅពេលនោះ ក៏បានដាក់ទោសលោកស្រី មូរ សុខហួរ និងលោក អេង ឆៃអ៊ាង ឱ្យជាប់ពន្ធនាគារម្នាក់ៗចំនួន២២ឆ្នាំ និងកាត់ទោសលោកស្រី ជូឡុង សូមូរ៉ា, លោក ម៉ែន សុថាវរិន្ទ្រ, លោក អ៊ូ ច័ន្ទឫទ្ធិ, លោក ហូរ វ៉ាន់, លោក ឡុង រី និងលោក នុត រំដួល ឱ្យជាប់ពន្ធនាគារក្នុងម្នាក់ៗចំនួន២០ឆ្នាំ។
តែយ៉ាងណា ការប្រកាសសាលក្រមនោះជំរុញឱ្យមានប្រតិកម្មពីស្ថានទូតលោកសេរីប្រចាំនៅកម្ពុជា ក្នុងនោះមានទាំងសហរដ្ឋអាមេរិក សហភាពអឺរ៉ុប និងអាល្លឺម៉ង់ ផងដែរ ដោយពួកគេចាត់ទុកវិធានការនោះថា ជាការព្រួយបារម្ភអំពីការកាត់ទោសក្រុមមេដឹកនាំអតីតគណបក្សប្រឆាំងនៅកម្ពុជា ដែល «ធ្វើឡើងក្រោមដំណើរការនីតិវិធីខ្វះភាពត្រឹមត្រូវ» និងជំរុញឱ្យបើកចំហនយោបាយឡើងវិញ។
ប្រធានសមាគមការពារសិទ្ធិមនុស្សអាដហុក លោក នី សុខា ចាត់ទុកការប្រើវិធានរឹបអូសទ្រព្យសម្បត្តិមេដឹកនាំបក្សប្រឆាំងពេលនេះ ជាការបំបាក់ស្មារតីអ្នកនយោបាយសំឡេងជំទាស់ ផ្ទុយនឹងរដ្ឋធម្មនុញ្ញ ដោយសម្អាងថា ប្រព័ន្ធតុលាការបច្ចុប្បន្នត្រូវបានគេមើលឃើញថាខ្វះភាពឯករាជ្យក្នុងការកាត់សេចក្តីសំណុំរឿងនយោបាយ។
លោកថា៖ «យើងមើលឃើញរូបភាពជម្លោះទាស់ទែងចុងក្រោយនេះ គឺរូបភាពបុគ្គល ឬក៏ជារូបភាពក្រុមច្រើនជាង ជាជាងរូបភាពទាស់ទែងគ្នាដើម្បីប្រយោជន៍ជាតិ។ ដូច្នេះ ខ្ញុំមានការសោកស្តាយណាស់ ចំពោះជម្លោះបែបហ្នឹង»។
លោកគិតថា ក្នុងបរិបទដែលអន្តរជាតិកំពុងសម្លឹងមើលបញ្ហាកម្ពុជា អ្នកនយោបាយខ្មែរគួរតែទម្លាក់ចោលនូវឥរិយាបថហែកហួរគ្នាជាលក្ខណៈបុគ្គល ហើយងាកមកលើកកម្ពស់សិទ្ធិមនុស្ស ធានាឱ្យការបោះឆ្នោតខាងមុខមានលក្ខណៈសេរី ត្រឹមត្រូវ និងយុត្តិធម៌ ដើម្បីមុខមាត់កម្ពុជាលើឆាកអន្តរជាតិ និងផលប្រយោជន៍ជាតិ ដូចមែនចែងក្នុងរដ្ឋធម្មនុញ៕