ប្រទេសហ្វីលីពីន បានបញ្ជាឱ្យយោធារបស់ខ្លួនពង្រឹងវត្តមាននៅក្នុងសមុទ្រចិនខាងត្បូង កាលពីថ្ងៃព្រហស្បតិ៍ម្សិលមិញ ដោយលើកឡើងពី «ការគំរាមកំហែង» ដល់តំបន់នេះ បន្ទាប់ពីចិនបង្កើនសកម្មភាពយោធារបស់ខ្លួន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី២៣ ខែធ្នូ ឆ្នាំ២០២២នេះ។
ការបញ្ជានេះកើតឡើងពីរថ្ងៃបន្ទាប់ពីប្រព័ន្ធផ្សព្វផ្សាយបានរាយការណ៍ថា ទីក្រុងប៉េកាំងបានចាប់ផ្តើមទាមទារនូវទឹកដីបន្ថែមទៀតនៅក្នុងប្រជុំកោះស្ព្រាតលី សមុទ្រចិនខាងត្បូង ដោយដាក់ទីតាំងយោធានៅក្នុងប្រទេសមួយចំនួន។
ក្រសួងការពារជាតិហ្វីលីពីន បាននិយាយកាលពីថ្ងៃព្រហស្បតិ៍ថា «ការរំលោភបំពានណាមួយនៅក្នុងសមុទ្រហ្វីលីពីនខាងលិច ឬការទាមទារផ្នែកណាមួយ គឺជាការគំរាមកំហែងដល់សន្តិសុខនៃកោះប៉ាហ្កាសា [Pagasa]»។
ក្រសួងការពារជាតិហ្វីលីពីន បាននិយាយថា ខ្លួនបានបញ្ជាឱ្យកងកម្លាំងប្រដាប់អាវុធពង្រឹងវត្តមានរបស់ខ្លួននៅសមុទ្រហ្វីលីពីនខាងលិច បន្ទាប់ពីចិនបង្កើនសកម្មភាពយោធានៅជិតកោះប៉ាហ្កាសា (Pagasa)។
ក្នុងរយៈពេលប៉ុន្មានឆ្នាំថ្មីៗនេះ ប្រទេសចិនបានសាងសង់កោះសិប្បនិម្មិតនៅលើថ្មប៉ប្រះទឹក ខណៈកំពុងសាងសង់មូលដ្ឋានយោធា និងព្រលានយន្តហោះ។
ទីភ្នាក់ងារសារព័ត៌មាន Bloomberg បានរាយការណ៍កាលពីថ្ងៃអង្គារ ដោយបង្ហាញរូបភាពពីផ្កាយរណបរបស់មន្ត្រីសហរដ្ឋអាមេរិកថា មានការបង្កើតដីថ្មីនៅប្រជុំកោះស្ព្រាតលី (Spratlys) នៅលើថ្មប៉ប្រះទឹកអ៊ែលដាដ (Eldad), ថ្មប៉ប្រះទឹកវីតស៊ុន (Whitsun), កោះឡានគាម ខេ (Lankiam Cay) និងកោះសែនឌី ខេ (Sandy Cay)។
ពាក់ព័ន្ធនឹងករណីនេះ ក្រសួងការបរទេសចិនបានហៅរបាយការណ៍នេះថា «គ្មានមូលដ្ឋានទាំងស្រុង»។
សេចក្តីថ្លែងការណ៍យោធាហ្វីលីពីនបាននិយាយកាលពីថ្ងៃព្រហស្បតិ៍ថា ការល្បាតតាមអាកាស និងជើងទឹកជាប្រចាំរបស់ខ្លួនបាន «សង្កេតឃើញវត្តមាននាវាជីវពលចិននៅជុំវិញតំបន់ខាងលើ»។
ហ្វីលីពីនបានចោទប្រកាន់ឆ្មាំឆ្នេរសមុទ្រ និងកងជីវពលដែនសមុទ្រចិនជាច្រើនដង ពីបទធ្វើទុក្ខបុកម្នេញ និងវាយប្រហារលើទូកនេសាទ និងនាវាផ្សេងទៀតក្នុងតំបន់។
ប្រធានាធិបតីហ្វីលីពីន លោក ហ្វឺឌីណាន់ ម៉ាកូស (Ferdinand Marcos) បានអះអាងថា លោកនឹងមិនអនុញ្ញាតឱ្យចិនជាន់ឈ្លីលើសិទ្ធិដែនសមុទ្ររបស់ប្រទេសលោកឡើយ ផ្ទុយពីអតីតប្រធានាធិបតី លោក រ៉ូឌ្រីហ្គោ ឌុយទែរតេ (Rodrigo Duterte) ដែលស្ទាក់ស្ទើរក្នុងការរិះគន់ប្រទេសមហាអំណាចមួយនេះ៕