អ្នកឃ្លាំមើលលើកឡើងថា ការបំបែកខេត្តទៅជាក្រុងនិងស្រុកបន្ថែមទៀតនៅពេលនេះ មិនទាន់ជាតម្រូវការចាំបាច់នៅឡើយទេ ហើយនឹងប៉ះពាល់ដល់ការចំណាយថវិកាជាតិ ខណៈសេដ្ឋកិច្ចកម្ពុជានៅមិនទាន់រឹងមាំនៅឡើយក្រោយវិបត្តិកូវីដ-១៩មក។
ការលើកឡើងនេះ បន្ទាប់ពីលោកនាយករដ្ឋមន្ត្រី ហ៊ុន សែន បានបង្កើតក្រុង ៣ និងស្រុក ២បន្ថែមទៀត ដោយការបង្កើតនេះ បំបែកចេញពីខេត្តកណ្តាល ខេត្តក្រចេះ ខណៈខេត្តកំពង់ស្ពឺ រដ្ឋាភិបាលបានបំបែកស្រុកឧដុង្គជា២ ដោយបង្កើតជា ក្រុងថ្មី១ និងស្រុកថ្មីមួយដែរ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា យល់ថា ការបំបែកខេត្តទៅជាក្រុង និងស្រុកបន្ថែមទៀតមិនបានចំណេញអ្វីដល់ជាតិឡើយ ផ្ទុយទៅវិញវាធ្វើឱ្យប៉ះពាល់ដល់ការចំណាយថវិការបស់រដ្ឋកាន់តែច្រើន។
លោកបន្តថា៖«បំបែកដែនដីគ្រប់គ្រងឱ្យច្រើន ខេត្តច្រើនទឹកដីមិនធំទូលាយ ច្រើនតែឈ្មោះ ច្រើនតែក្រុងវាបង្កើតចំនួនថ្នាក់ដឹកនាំទេ។ ចំណាយថវិកាជាតិច្រើន ផលប្រយោជន៍ជាតិវាអាចបាត់បង់ច្រើន ប៉ុន្តែប្រយោជន៍គណបក្សកាន់អំណាចបានច្រើនជាងតាមរយៈនៃការចែកអំណាចទៅគ្នា ហើយការតម្រង់ទិសនៃអ្នកគាំទ្រ បោះឆ្នោតឱ្យនៅក្រុម នៅបក្សនៅ ឱ្យវាមានលទ្ធភាពប្រកួតប្រជែង។ អ៊ីចឹងគណបក្សកាន់ អំណាចនៅតែមានប្រៀបច្រើន»។
លោក ឯម សុវណ្ណរ៉ា បន្តថា ប្រសិនបើបង្កើតឈ្មោះ ក្រុង ខេត្តច្រើនហើយ ទឹកដីកម្ពុជារីកធំជាងមុននោះ លោកសាទរ។ ករណីនេះ លោកថា ប្រជាពលរដ្ឋគួរចូលរួមបញ្ចេញមតិ និងស្នើទៅកាន់រដ្ឋាភិបាល ឬគណបក្សប្រជាជនកម្ពុជា ឱ្យពិចារណាចំពោះការបែងចែក ឬពង្រីក រចនាសម្ព័ន្ធថ្នាក់ក្រោមជាតិនេះ ដោយមិនបានពង្រីកទឹកដីនោះ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ក្នុងកាលៈទេសៈនេះ មិនមានភាពចាំបាច់ដែលត្រូវរដ្ឋាភិបាលបំបែកក្រុងថ្មី និងស្រុកថ្មី ដោយសារ បច្ចុប្បន្នរដ្ឋាភិបាលកំពុងធ្វើវិមជ្ឈការ ដើម្បីពង្រឹងអំណាចដល់ថ្នាក់ឃុំ-សង្កាត់។ ភាពមិនចាំបាច់មួយទៀត លោកថា ចំនួនប្រជាជនកម្ពុជាក៏មិនមានការកើនឡើង ដែលធ្វើឱ្យការផ្ដល់សេវាសាធារណៈមានភាពលំបាកឡើយ។ បន្ថែមពីនេះ បញ្ហាសេដ្ឋកិច្ចក្រោយជំងឺកូវីដ-១៩ ក៏មិនទាន់មានភាពប្រសើរឡើងដែរ ខណៈចាប់ពីផ្ទុះកូវីដរហូតដល់បច្ចុប្បន្នការរឹតត្បិតចំពោះចំណាយនៅស្ថាប័នរដ្ឋដែលរដ្ឋាភិបាលក៏នៅដដែល។
លោកថា៖« ក្នុងកាលៈទេសៈបច្ចុប្បន្ន បើយើងទុកថវិកាជួយដល់ប្រជាពលរដ្ឋ ឬក៏ផ្ដល់សេវាកម្មមួយចំនួនដែលគ្នារងផលប៉ះពាល់ដោយសារកូវីដ។ អាហ្នឹងអាចជួយបញ្ហាសេដ្ឋកិច្ចឱ្យមានកំណើនបានគួរសមដែរ។ បើសិនយើងបង្កើតក្រុងស្រុក ខ្ញុំឃើញបញ្ហាចាយច្រើនណាស់ ហេដ្ឋារចនាសម្ព័ន្ធចាយទៅលើអគារ ចាយទៅលើប្រាក់ខែ មនុស្សអីហូរហែ។ អ៊ីចឹងការចំណាយរបស់រដ្ឋាភិបាលកាន់តែធំ»។
ក្នុងអនុក្រឹត្យដាច់ដោយឡែកពីគ្នា ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែធ្នូ ឆ្នាំ២០២២ ឱ្យដឹងថា រដ្ឋាភិបាលសម្រេចបង្កើតក្រុងចំនួនពីរបន្ថែមទៀតនៅក្នុងខេត្តកណ្តាល។
ក្រុងទាំងដែលត្រូវបង្កើតក្នុងនោះ ក្រុងអរិយក្សត្រដោយកាត់យកឃុំចំនួន៦ ពីស្រុកខ្សាច់កណ្តាល និងឃុំចំនួន៥ ពីស្រុកល្វាឯម។ ចំណែកក្រុងសំពៅពូន ដោយកាត់យកឃុំចំនួន៥ ពីស្រុកកោះធំ នៃខេត្តកណ្តាល។
ដោយឡែកអនុក្រឹត្យចុះថ្ងៃទី២៣ ខែធ្នូ ដដែលថា បានបង្កើតស្រុកអូរគ្រៀងសែនជ័យ នៃខេត្តក្រចេះ ដោយកាត់យកឃុំចំនួន៥ ពីស្រុកបូរ ក្នុងខេត្តក្រចេះ។
ក្រៅពីខេត្តកណ្ដាល និងក្រចេះនោះ អនុក្រឹត្យចុះហត្ថលេខាដោយលោកនាយករដ្ឋមន្ត្រី ហ៊ុន សែន បំបែកស្រុកឧដុង្គជា២ ដោយបង្កើតបានជា ក្រុងថ្មី ១ និងស្រុកថ្មី ១ សម្រាប់ខេត្តកំពង់ស្ពឺ ក្រុងថ្មីគឺ ក្រុងឧដុង្គម៉ែជ័យ ចំណែកស្រុកថ្មីនោះគឺ ស្រុកសាមគ្គីមុនីជ័យ។
តាមអនុក្រឹត្យរបស់រាជរដ្ឋាភិបាលចុះថ្ងៃទី ២៣ ខែធ្នូ បានឱ្យដឹងថា ការបង្កើតក្រុងឧដុង្គម៉ែជ័យ ដោយកាត់យកឃុំចំនួន ៥ ក្នុងនោះ ឃុំវាំងចាស់ ឃុំវាលពង់ ឃុំត្រាចទង ឃុំព្រះស្រែ និងឃុំក្សេមក្សាន្ត ពីស្រុកឧដុង្គ ខេត្តកំពង់ស្ពឺ។
ចំណែក ការបង្កើតស្រុកសាមគ្គីមុនីជ័យ បានកាត់យកឃុំចំនួន ១០ ក្នុងនោះឃុំចាន់សែន ឃុំជើងរាស់ ឃុំជំពូព្រឹក្ស ឃុំក្រាំងចេក ឃុំមានជ័យ ឃុំព្រៃក្រសាំង ឃុំយុទ្ធសាមគ្គី ឃុំដំណាក់រាំង ឃុំពាំងល្វា និងឃុំភ្នំតូច ពីស្រុកឧដុង្គ ខេត្តកំពង់ស្ពឺ ដោយទីតាំងរដ្ឋបាល ស្រុកសាមគ្គីមុនីជ័យ ស្ថិតនៅក្នុងឃុំជើងរាស់។
ប្រធានអង្គភាពអ្នកនាំពាក្យរដ្ឋាភិបាលកម្ពុជាលោក ផៃ ស៊ីផាន លើកឡើងថា ការបង្កើតក្រុង និងស្រុកថ្មីនេះ ដើម្បីបម្រើសេវាសាធារណៈជូនប្រជាពលរដ្ឋឱ្យកាន់តែងាយស្រួលជាងមុន។ លោកច្រានចោលទៅនឹងការលើកឡើងថា ការបង្កើតក្រុង និងស្រុកថ្មីពេលនេះ ជាការចំណាយថវិកាជាតិឥតប្រយោជន៍ឬនាំឱ្យខាតថវិកាជាតិបន្ថែមទៀតនោះ។
លោកថា៖«ចំណុចទី២ ដែលគេនិយាយខាតបង់ថវិកាជាតិ មិនពិតទេ មន្ត្រីមួយចំនួន ប្រៀបធៀបជាមួយពលរដ្ឋនោះ ប្រជាពលរដ្ឋមានចំនួនច្រើនជាងការកាត់បន្ថយភាពក្រីក្រ ការប្រឆាំងអ្វីទៅដែលនៅក្នុងគោលនយោបាយ ភូមិឃុំមានសុវត្ថិភាព ដូច្នេះ មន្ត្រីទាំងអស់នឹងនៅគៀកជាមួយនឹងមហាជន។ យើងបានស្ដាប់ យើងបានលឺ យើងបានចូលរួមរបស់មហាជនធ្វើឱ្យយើងទទូលបាននូវអ្វីទៅដែលជាការផ្ដល់សេវាកម្ម»។
គួរបញ្ជាក់ថា ខេត្តមួយចំនួននៃប្រទេសកម្ពុជាត្រូវបានបំបែកជាពីរ ក្នុងនោះ ខេត្តត្បូងឃ្មុំ បានបំបែកចេញពីខេត្តកំពង់ចាម ហើយខេត្តកែប បំបែកចេញពីខេត្តកំពត ខណៈខេត្តប៉ៃលិន ត្រូវបំបែកចេញពីខេត្តបាត់ដំបងជាដើម៕