ប្រជាពលរដ្ឋប្រមាណ ៤៦០គ្រួសារ រស់នៅឃុំណ្ដោក ស្រុកកណ្ដាលស្ទឹង និងសង្កាត់កំពង់សំណាញ់ ក្រុងតាខ្មៅ ដែលមានភូមិសាស្ត្រជាប់ព្រលានយន្តហោះដែលកំពុងសាងសង់ថ្មី បានស្នើដល់អភិបាលខេត្តកណ្ដាលផ្ដល់ប្លង់កម្មសិទ្ធិដល់ពួកគេ ខណៈពួកគាត់បារម្ភខ្លាចមានការបណ្ដេញចេញដោយបង្ខំ ក្រោយបុគ្គលិកព្រលានយន្តហោះ និងអាជ្ញាធរមូលដ្ឋានចុះទៅស្រង់ទិន្នន័យ និងហាមសាងសង់សំណង់ថ្មី។
ការស្នើនេះបានធ្វើឡើង ខណៈពលរដ្ឋប្រមាណ ២០០នាក់ អះអាងថា តំណាងឱ្យពលរដ្ឋប្រមាណ ៤៦០គ្រួសារ បាននាំគ្នាទៅប្រមូលផ្តុំនៅមុខរដ្ឋបាលខេត្តកណ្ដាល នៅព្រឹកថ្ងៃអង្គារនេះ។
ពលរដ្ឋភូមិអំពៅព្រៃ ឃុំកណ្ដោក អ្នកស្រី ម៉ុត ចាន់សុផាននី បានឱ្យដឹងថា ការដែលពួកគាត់នាំគ្នាទៅប្រមូលផ្តុំនៅមុខសាលាខេត្តនេះ ដោយសារតែពេលថ្មីៗនេះ បុគ្គលិករបស់ក្រុមហ៊ុនដែលសាងសង់ព្រលានយន្តហោះថ្មី និងអាជ្ញាធរមូលដ្ឋាន បានចុះទៅបង់លេខផ្ទះ ស្រង់ទិន្នន័យប្រជាពលរដ្ឋ និងកំណត់ថ្ងៃឱ្យពលរដ្ឋមួយចំនួនរុះរើផ្ទះ ដោយពុំបានបញ្ជាក់ពីមូលហេតុឡើយ។
អ្នកស្រីបន្តថា គ្រួសាររបស់គាត់ ក៏ដូចជាពលរដ្ឋផ្សេងទៀត បានរស់នៅទីនោះអស់រយៈពេល២០ឆ្នាំមកហើយ ប៉ុន្តែនៅមិនទាន់មានបណ្ណកម្មសិទ្ធិកាន់កាប់ដីធ្លីនៅឡើយ ហើយនៅពេលដែលមានរឿងហេតុបែបនេះ ធ្វើឱ្យអ្នកស្រីមានក្ដីបារម្ភខ្លាចអាជ្ញាធររុះរើផ្ទះ និងបណ្ដេញពួកគាត់ចេញពីដីដោយបង្ខំ។
ករណីនេះ អ្នកស្រី សុផាននី បានស្នើដល់អាជ្ញាធរខេត្តចេញបណ្ណកម្មសិទ្ធិដល់ប្រជាពលរដ្ឋ និងស្នើអភិបាលខេត្តបង្កើតវេទិកាសាធារណៈដោយបញ្ជាក់ប្រាប់ប្រជាពលរដ្ឋឱ្យបានច្បាស់ថា ពលរដ្ឋនឹងមិនត្រូវបានបណ្តេញចេញពីលំនៅឋានដោយបង្ខំនោះទេ។
អ្នកស្រីថា៖ «គឺលទ្ធផល គឺយើងចង់ឱ្យគាត់ទៅចង្អុលបំភ្លឺរឿងការបាញ់[ថ្នាំនិងកំណត់លេខ]ផ្ទះ ដោយគ្មានមូលហេតុ ឱ្យប្រជាពលរដ្ឋរុះរើទ្រុងពពែ និងមិនឱ្យសង់ផ្ទះលើដីខ្លួនឯង។ ទាល់តែគាត់បើកវេទិកាហើយ ហើយលោកសម្រេចថាឥលូវប្រជាជន គាត់ផ្ដល់បណ្ណកម្មសិទ្ធិឱ្យ គឺប្រជាជនទាំងអស់គ្នា គ្មាននរណាចង់ចេញពីកន្លែងដែលខ្លួនរស់នៅទេ»។
ពលរដ្ឋម្នាក់ទៀតមកពីភូមិអាចម៍កុក សង្កាត់កំពង់សំណាញ់ ក្រុងតាខ្មៅ អ្នកស្រី ងុយ សំណាង និយាយថា អំឡុងពេលពលរដ្ឋប្រមូលផ្តុំនៅមុខសាលាខេត្តនោះ អាជ្ញាធរខេត្តបានអនុញ្ញាតឱ្យពលរដ្ឋចូលទៅជួប និងបានបញ្ជាក់ថានឹងពុំមានការរុះរើផ្ទះពលរដ្ឋ ឬបណ្តេញប្រជាពលរដ្ឋពីតំបន់នោះដោយបង្ខំទេ។ តែយ៉ាងណា អ្នកស្រីថា រូបគាត់ ក៏ដូចជាពលរដ្ឋផ្សេងទៀត នៅតែមានក្តីបារម្ភខ្លាចបាត់បង់ដី និងផ្ទះសម្បែង ដូចពលរដ្ឋផ្សេងទៀតនៅក្បែរតំបន់នោះ។
ករណីនេះ អ្នកស្រី ងុយ សំណាង ស្នើដល់ក្រសួងរៀបចំដែនដី និងអាជ្ញាធរខេត្ត ផ្តល់បណ្ណកម្មសិទ្ធិដល់ពលរដ្ឋ ដើម្បីឱ្យពលរដ្ឋអស់ក្តីបារម្ភ។
អ្នកស្រីនិយាយថា៖ «ខ្ញុំចង់ឱ្យគាត់ផ្ដល់ប្លង់កម្មសិទ្ធិ ដើម្បីឱ្យប្រជាពលរដ្ឋគាត់រស់នៅទីហ្នឹង គាត់មានភាពកក់ក្ដៅ កុំឱ្យគាត់ភ័យខ្លាចទៀត។ មានការបារម្ភភ័យ ខ្លាចណាស់! បងខ្លាចតែដូចពួកគាត់ដែរ! អ៊ីចឹងបានស្នើដល់អភិបាលខេត្ត គាត់ទៅបើកវេទិកា[សាធារណៈ]ឱ្យពួកខ្ញុំបានដឹង ឱ្យមានទំនុកចិត្ត»។
វីអូឌី មិនទាន់អាចសុំការឆ្លើយតបជុំវិញករណីនេះពីអភិបាលខេត្តកណ្ដាល លោក គង់ សោភ័ណ្ឌ និងអភិបាលរងខេត្ត លោក នូវប៉េង ច័ន្ទតារា បានទេ នៅថ្ងៃអង្គារនេះ។
មន្ត្រីសមាគមការពារសិទ្ធិមនុស្សអាដហុក លោក យី សុខសាន្ត ដែលបានឃ្លាំមើលករណីនេះ បានលើកឡើងថា អាជ្ញាធរពាក់ព័ន្ធគួរតែបង្ហាញនូវតម្លាភាព ប្រសិនបើចង់អភិវឌ្ឍកន្លែងណាមួយ ហើយត្រូវសិក្សាពីផលប៉ះពាល់ និងជូនដំណឹងដល់ពលរដ្ឋឱ្យបានដឹងជាមុន ចៀសវាងធ្វើឱ្យពលរដ្ឋមានការភ័យខ្លាច។
លោកថា៖ «ប្រសិនបើរដ្ឋាភិបាលធ្វើការអភិវឌ្ឍ លោកត្រូវចុះធ្វើការសិក្សាអំពីផលបះពាល់ ហើយការធ្វើអភិវឌ្ឍន៍ ត្រូវតែមានជំហានក្នុងការដោះស្រាយ ពន្យល់ប្រជាពលរដ្ឋ ពន្យល់ពីគម្រោងនៃការសាងសង់ ឬក៏ធ្វើហេដ្ឋារចនាសម្ពន្ធដែលបញ្ជាក់ប្រាប់គាត់ថា ប្រសិនជាប៉ះពាល់ ត្រូវដោះស្រាយឱ្យគាត់តាមរបៀបណា»។
ពាក់ព័ន្ធនឹងករណីនេះ កាលពីខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយកាត់ដីរដ្ឋទំហំ២ ៦០០ហិកតា ដើម្បីសាងសង់ព្រលានយន្តហោះអន្តរជាតិថ្មីមួយនេះ ដែលលាតសន្ធឹងលើឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ ស្រុកបាទី ខេត្តតាកែវ។
គម្រោងនេះត្រូវបានទទួលសិទ្ធិសាងសង់ដោយក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់ថា អូស៊ីអាយស៊ី (OCIC) របស់ឧកញ៉ា ពុង ឃាវសែ និងលេខាធិការដ្ឋានអាកាសចរណ៍ស៊ីវិល (SSCA) ដែលត្រូវចំណាយទឹកប្រាក់ជាងមួយពាន់លានដុល្លារ (១ ៥០០លានដុល្លារ) ហើយត្រូវបានព្យាករថានឹងសាងសង់រួចរាល់ក្នុងឆ្នាំ២០២៣។
កាលពីខែកក្កដា ឆ្នាំ២០២១ ក្រុមពលរដ្ឋបានចេញលិខិតចំហមួយច្បាប់ដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ បានធ្វើឱ្យប៉ះពាល់ប្រជាពលរដ្ឋ ៣៣០គ្រួសារ នៅឃុំទាំង៤នោះ ដែលមានក្បាលដីទំហំជាង១លានម៉ែត្រការ៉េ។
តែយ៉ាងណា អាជ្ញាធរខេត្តបានដោះស្រាយផ្តល់គោលនយោបាយដល់ពលរដ្ឋមួយចំនួនហើយ នៅសល់ពលរដ្ឋមួយចំនួនទៀតនៅមិនទាន់ទទួលយកគោលនយោបាយនោះនៅឡើយ ដោយពួកគាត់អះអាងថា ការដោះស្រាយដោយផ្តល់សំណង ៨ដុល្លារក្នុងមួយម៉ែត្រការ៉េ មិនអាចឱ្យពួកគាត់អាចស្វែងរកដីនៅទីតាំងផ្សេងសម្រាប់រស់នៅបានឡើយ ដែលករណីនេះធ្វើឱ្យពលរដ្ឋទាំងនោះបន្តការតវ៉ាដល់បច្ចុប្បន្ន៕