ប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) បាននិយាយនៅថ្ងៃអង្គារនេះថា កោះតៃវ៉ាន់នឹងបង្កើនរយៈពេលនៃកាតព្វកិច្ចយោធាចាប់ពី៤ខែ ដល់១ឆ្នាំ ចាប់ពីឆ្នាំ២០២៤ ដោយសារមានការគំរាមកំហែងកាន់តែខ្លាំងឡើងពីប្រទេសចិន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៧ ខែធ្នូ ឆ្នាំ២០២២ នេះ។
ចំណាត់ការនេះកើតឡើង ខណៈចិនបង្កើនសម្ពាធផ្នែកយោធា ការទូត និងសេដ្ឋកិច្ច លើកោះតៃវ៉ាន់ ដើម្បីអះអាងពីការទាមទារអធិបតេយ្យភាពរបស់ខ្លួន រួមទាំងសមយុទ្ធទ័ពអាកាសស្ទើររាល់ថ្ងៃនៅក្បែរដែនកោះមួយនេះ ក្នុងរយៈពេល៣ឆ្នាំចុងក្រោយនេះ។
លោកស្រី សៃ អ៊ីងវេន បាននិយាយបន្ទាប់ពីកិច្ចប្រជុំមន្ត្រីជាន់ខ្ពស់នៃក្រុមប្រឹក្សាសន្តិសុខជាតិថា តៃវ៉ាន់ចង់បានសន្តិភាព ប៉ុន្តែចាំបាច់ត្រូវមានលទ្ធភាពការពារខ្លួន។
លោកស្រីបានប្រាប់សន្និសីទសារព័ត៌មានថា «ដរាបណាតៃវ៉ាន់មានភាពរឹងមាំគ្រប់គ្រាន់ នោះនឹងក្លាយជាជម្រកនៃប្រជាធិបតេយ្យ និងសេរីភាពទូទាំងពិភពលោក ហើយប្រទេសនេះនឹងមិនក្លាយជាសមរភូមិទេ»។
លោកស្រីបន្ថែមថា៖ «តៃវ៉ាន់ចង់ប្រាប់ពិភពលោកថា រវាងលទ្ធិប្រជាធិបតេយ្យ និងរបបផ្ដាច់ការ យើងជឿជាក់យ៉ាងមុតមាំលើលទ្ធិប្រជាធិបតេយ្យ។ រវាងសង្គ្រាម និងសន្តិភាព យើងពិតជាចង់បានសន្តិភាព។ ចូរយើងបង្ហាញភាពក្លាហាន និងការប្តេជ្ញាចិត្ត ដើម្បីការពារមាតុភូមិរបស់យើង និងការពារលទ្ធិប្រជាធិបតេយ្យ»។
ទីក្រុងតៃប៉ិ ដែលបដិសេធការទាមទារអធិបតេយ្យភាពរបស់ទីក្រុងប៉េកាំង កាលពីថ្ងៃចន្ទ បានរាយការណ៍ពីការរំលោភបំពានពីទ័ពអាកាសចិន ដែលមិនធ្លាប់មាន ដោយយន្តហោះកងទ័ពអាកាសចិនចំនួន៤៣គ្រឿងបានហោះឆ្លងកាត់ខ្សែបន្ទាត់នៃច្រកសមុទ្រតៃវ៉ាន់។
ប្រទេសចិនក៏បានធ្វើសមយុទ្ធយោធានៅជិតកោះតៃវ៉ាន់កាលពីខែសីហា បន្ទាប់ពីដំណើរទស្សនកិច្ចទៅកាន់ទីក្រុងតៃប៉ិដោយប្រធានសភាតំណាងរាស្រ្តអាមេរិក លោកស្រី ណានស៊ី ផេឡូស៊ី (Nancy Pelosi)។
លោក ឆេ ជុង (Chieh Chung) អ្នកស្រាវជ្រាវនៅមូលនិធិគោលនយោបាយជាតិតៃវ៉ាន់ បានប៉ាន់ប្រមាណថា ការបង្កើនរយៈពេលកាតព្វកិច្ចយោធានេះ អាចបង្កើនចំនួនកងទ័ពពី ៦០ ០០០នាក់ ទៅ ៧០ ០០០នាក់ក្នុងមួយឆ្នាំ បន្ថែមពីលើចំនួនកងទ័ពជំនាញបច្ចុប្បន្ន ដែលនឹងមានចំនួន១៦៥ ០០០នាក់ ក្នុងឆ្នាំ២០២៧។
ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំងបានបង្កើនសម្ពាធទៅលើរដ្ឋាភិបាលកោះតៃវ៉ាន់ ដើម្បីឱ្យរដ្ឋាភិបាលនៃដែនកោះមួយនេះទទួលយកអំណាចរបស់ទីក្រុងប៉េកាំង។ ចំណែករដ្ឋាភិបាលកោះតៃវ៉ាន់វិញ តែងលើកឡើងថា ពួកគេចង់បានសន្តិភាពជាមួយប្រទេសចិន ប៉ុន្តែប្រសិនបើចិនវាយប្រហារមកលើកោះនេះ ពួកគេនឹងការពារ៕
