តុលាការសហរដ្ឋអាមេរិក បានដោះលែងមន្ត្រីជាន់ខ្ពស់ក្រសួងកសិកម្មម្នាក់ពាក់ព័ន្ធរឿងជួញដូរសត្វស្វាឱ្យនៅក្រៅឃុំបណ្ដោះអាសន្ន ដោយស្ថិតនៅក្រោមការឃ្លាំមើលតាមប្រព័ន្ធ GPS។
យោងតាមសេចក្ដីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទ ចេញផ្សាយនាថ្ងៃទី២៨ ខែធ្នូ ឆ្នាំ២០២២ ឱ្យដឹងថា ប្រធាននាយកដ្ឋានសត្វព្រៃ និងជីវចម្រុះ នៃរដ្ឋបាលព្រៃឈើ ក្រសួងកសិកម្ម រុក្ខាប្រមាញ់ និងនេសាទ លោក គ្រី ម៉ះផល ត្រូវបានដោះលែងឱ្យនៅក្រៅឃុំជាបណ្ដោះអាសន្ននាព្រឹកថ្ងៃទី២៨ ខែធ្នូនេះ ត្រូវនឹងល្ងាចថ្ងៃទី២៧ ខែធ្នូ ឆ្នាំ២០២២ ពេលវេលានៅសហរដ្ឋអាមេរិក។
ក្រសួងបញ្ជាក់ថា រដ្ឋាភិបាលកម្ពុជានឹងបន្តផ្តល់ជំនួយផ្លូវច្បាប់ និងការគាំទ្រចាំបាច់ដល់លោក ម៉ះផល រហូតសំណុំរឿងនេះ ឈានដល់ទីបញ្ចប់ ដើម្បីស្វែងរកយុត្តិធម៌ជូនលោក ខណៈលោក ម៉ះផល នឹងត្រូវឆ្លងកាត់នីតិវិធីតាមផ្លូវតុលាការជាបន្តបន្ទាប់ទៀតនៅសហរដ្ឋអាមេរិក។
លើសពីនេះ ការដែលតុលាការអាមេរិកដោះលែងឱ្យលោក គ្រី ម៉ះផល នៅក្រៅឃុំបណ្តោះអាសន្ន បន្ទាប់ពីបានឆ្លងកាត់ការតស៊ូតាមផ្លូវច្បាប់ដ៏ស្វិតស្វាញ ដោយមានមេធាវីអាមេរិកចំនួន២រូបជួយការពារក្ដីនៅតុលាការអាមេរិក តាមរយ:ការផ្តល់ការជួយជ្រោមជ្រែងចាំបាច់និងទាន់ពេលវេលាពីស្ថានទូតកម្ពុជាប្រចាំសហរដ្ឋអាមេរិក ក្រសួងការបរទេសនិងសហប្រតិបត្តិការអន្តរជាតិ និងរាជរដ្ឋាភិបាលកម្ពុជា។
ក្រសួងកសិកម្មបញ្ជាក់ថា៖ «ការធានាបាននូវយុត្តិធម៌សម្រាប់មន្ត្រីកម្ពុជាទាំងអស់ រួមទាំងលោក គ្រី ម៉ះផល ផងដែរ ដែលជួបបញ្ហាក្នុងពេលបំពេញបេសកកម្មនៅបរទេសដើម្បីផលប្រយោជន៍ជាតិ គឺជាកាតព្វកិច្ចរបស់រាជរដ្ឋាភិបាលកម្ពុជា។នេះគឺជាជំហានដ៏វិជ្ជមានមួយដែលទើបសម្រេចបាន និងជាដំណឹងដ៏រីករាយសម្រាប់លោក ម៉ះផល និងក្រុមគ្រួសារ ជាពិសេសកូនៗរបស់លោក ក្រោយពីបែកគ្នា និងខកខានមិនបានទាក់ទងគ្នាអស់រយៈពេលជាងមួយខែកន្លងមក»។
បើតាមដីកាបង្គាប់របស់តុលាការ លោក Kathleen M. Williams នៅថ្ងៃព្រហស្បតិ៍កន្លងទៅនេះ បានសម្រេចដោះលែងឱ្យលោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះ នៃរដ្ឋបាលព្រៃឈើ នៅក្រៅឃុំបណ្តោះអាសន្ន ដោយមានបំពាក់ប្រព័ន្ធតាមដាន GPS។
ការដាក់ប្រព័ន្ធតាមដាន GPS នេះ ដើម្បីតាមដានសកម្មភាព និងទីតាំងរបស់លោក គ្រី ម៉ះផល អំឡុងពេលដែលលោកនៅក្រៅមន្ទីរឃុំឃាំងរបស់អាមេរិក។
ប្រធាននាយកដ្ឋានសត្វព្រៃ និងជីវចម្រុះ នៃរដ្ឋបាលព្រៃឈើ ក្រសួងកសិកម្ម រុក្ខាប្រមាញ់ និងនេសាទ លោក គ្រី ម៉ះផល ត្រូវបានចាប់ខ្លួនកាលពីថ្ងៃទី១៦ ខែវិច្ឆិកា ឆ្នាំ២០២២ នៅអាកាសយានដ្ឋានអន្តរជាតិ ចន អេហ្វ កេណ្ណេឌី (John F. Kennedy) ក្នុងរដ្ឋញូវយ៉ក សហរដ្ឋអាមេរិក។ ការចាប់ខ្លួននោះអាចឈានដល់ការចោទប្រកាន់ ពាក់ព័ន្ធការរត់ពន្ធសត្វស្វាព្រៃ ឬសត្វស្វាក្ដាម ខុសច្បាប់ ខណៈអគ្គនាយករដ្ឋបាលព្រៃឈើ នៃក្រសួងកសិកម្ម លោក កែវ អូម៉ាលីស ក៏រកឃើញថាជាប់ពាក់ព័ន្ធករណីនេះដែរ។
អង្គការ Action for Primates ដែលមានមូលដ្ឋាននៅចក្រភពអង់គ្លេស បានឱ្យដឹងដោយផ្អែកលើតួលេខរបស់ភ្នាក់ងារ U.S. Fish and Wildlife Service ថា សត្វស្វាក្ដាម ចំនួន១៧ ០០០ក្បាល ត្រូវបានកម្ពុជានាំចេញទៅកាន់សហរដ្ឋអាមេរិក ក្នុងឆ្នាំ២០២១ កន្លងទៅ៕