នៅព្រឹកថ្ងៃសុក្រនេះ ប្រជាពលរដ្ឋនៅទីក្រុងកៀវ (Kyiv) ត្រូវបានតម្រូវឱ្យជម្លៀសខ្លួនទៅកាន់លេនដ្ឋាន ខណៈសំឡេងស៊ីរ៉ែនបានបន្លឺពេញទីក្រុង មួយថ្ងៃបន្ទាប់ពីរុស្ស៊ីវាយប្រហារតាមអាកាសយ៉ាងគំហុក។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣០ ខែធ្នូ ឆ្នាំ២០២២។
ភ្លាមៗបន្ទាប់ពីម៉ោង២ រំលងអធ្រាត្រ រដ្ឋាភិបាលទីក្រុងកៀវបានចេញសារជូនដំណឹងតាមតេឡេក្រាមរបស់ខ្លួន អំពីការវាយប្រហារតាមអាកាសរបស់រុស្ស៊ី ហើយបានអំពាវនាវឱ្យប្រជាពលរដ្ឋទៅជ្រកនៅលេនដ្ឋាន។
លោក អូឡិចស្គី គូឡេបា (Olekskiy Kuleba) អភិបាលតំបន់កៀវ បាននិយាយនៅលើបណ្តាញតេឡេក្រាមថា «ការវាយប្រហារដោយយន្តហោះគ្មានមនុស្សបើក (ដ្រូន) នៅតែបន្ត»។
សាក្សីម្នាក់បានប្រាប់ Reuters ថា នៅចម្ងាយ២០គីឡូម៉ែត្រ ភាគខាងត្បូងនៃទីក្រុងកៀវ មានសំឡេងផ្ទុះ និងសំឡេងបាញ់តបជាច្រើននៃប្រព័ន្ធការពារដែនអាកាសអ៊ុយក្រែន។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បានថ្លែងនៅក្នុងសុន្ទរកថាកាលពីយប់ថ្ងៃព្រហស្បតិ៍ថា ប្រព័ន្ធការពារដែនអាកាសនៅភាគខាងត្បូង ភាគខាងកើត និងភាគខាងលិចប្រទេសអ៊ុយក្រែន បានបាញ់ទម្លាក់មីស៊ីលរុស្ស៊ីចំនួន៥៤គ្រាប់ និងដ្រូនចំនួន១១គ្រឿង។
លោក Zelenskiy បន្តថា តំបន់ភាគច្រើនគ្មានអគ្គិសនីប្រើប្រាស់ ដែលរួមមាន ទីក្រុងកៀវ (Kyiv), អូដេសា (Odesa), តំបន់ខឺសុន (Kherson) និងតំបន់ជុំវិញទីក្រុងលីវ (Lviv) ជិតព្រំដែនភាគខាងលិចជាមួយប៉ូឡូញ។
រូបភាពបង្ហាញដោយទីភ្នាក់ងារព័ត៌មាន Reuters កាលពីថ្ងៃព្រហស្បតិ៍ បានបង្ហាញពីបុគ្គលិកសង្គ្រោះបន្ទាន់ដែលកំពុងស្វែងរកជនរងគ្រោះតាមគំនរបាក់បែកក្នុងទីក្រុងកៀវ ដែលត្រូវបានបំផ្លាញដោយមីស៊ីល។ ក្រុមមន្ត្រីបាននិយាយថា មីស៊ីលច្រើនជាង១២០គ្រាប់ត្រូវបានបាញ់ក្នុងអំឡុងពេលការវាយប្រហារ។
ក្រសួងការពារជាតិអ៊ុយក្រែន បាននិយាយនៅក្នុងសេចក្តីថ្លែងការណ៍ថា អាគារលំនៅដ្ឋានជាង១៨ និងហេដ្ឋារចនាសម្ពន្ធសំខាន់ៗចំនួន១០ ត្រូវបានបំផ្លាញនៅក្នុងការវាយប្រហារចុងក្រោយនេះ។
ការបាញ់ស្រោចតាមអាកាសរបស់រុស្ស៊ី ក្នុងរយៈពេលប៉ុន្មានខែថ្មីៗនេះ ដែលសំដៅលើហេដ្ឋារចនាសម្ពន្ធថាមពលបានធ្វើឱ្យមនុស្សរាប់លាននាក់គ្មានអគ្គិសនីប្រើប្រាស់ និងគ្មានកម្ដៅនៅក្នុងរដូវរងានេះ៕