តុលាការយោធាមីយ៉ាន់ម៉ា នៅថ្ងៃសុក្រនេះ បានប្រកាសសាលក្រមចុងក្រោយ ដោយផ្តន្ទាទោសលោកស្រី អ៊ុងសាន ស៊ូជី (Aung San Suu Kyi) ពីបទពុករលួយចំនួន៥ករណី និងដាក់ពន្ធនាគាររយៈពេល៧ឆ្នាំបន្ថែមទៀត ដែលធ្វើឱ្យលោកស្រីត្រូវជាប់ពន្ធនាគារសរុបរយៈពេល៣៣ឆ្នាំ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣០ ខែធ្នូ ឆ្នាំ២០២២ នេះ។
នៅក្នុងសវនាការបិទទ្វារ លោកស្រី អ៊ុងសាន ស៊ូជី ត្រូវបានចោទប្រកាន់ថាបានប្រព្រឹត្តបទល្មើសទាក់ទងនឹងការជួល និងប្រើប្រាស់ឧទ្ធម្ភាគចក្រ ខណៈលោកស្រីនៅជាមេដឹកនាំមីយ៉ាន់ម៉ា។
ក្នុងការប្រកាសសាលក្រមនៅថ្ងៃសុក្រនេះ លោកស្រីត្រូវបានផ្តន្ទាទោសរយៈពេល៧ឆ្នាំបន្ថែមលើទោសជាប់ពន្ធនាគាររយៈពេល២៦ឆ្នាំចាប់តាំងពីខែធ្នូ ឆ្នាំមុន។ ដូច្នេះ មានន័យថា លោកស្រីត្រូវជាប់ពន្ធនាគាររយៈពេល៣៣ឆ្នាំ។
លោកស្រី អ៊ុងសាន ស៊ូជី អាយុ៧៧ឆ្នាំ ត្រូវបានចាប់ខ្លួននៅពេលដែលយោធាបានដណ្តើមអំណាចកាលពីថ្ងៃទី១ ខែកុម្ភៈ ឆ្នាំមុន ដោយរដ្ឋប្រហារ ដែលបានបិទបញ្ចប់លទ្ធិប្រជាធិបតេយ្យដែលមានរយៈពេលមួយទសវត្សរ៍ និងបានធ្វើឱ្យប្រទេសនេះធ្លាក់ចូលទៅក្នុងភាពវឹកវរ។
លោកស្រីកំពុងត្រូវបានឃុំខ្លួននៅក្នុងពន្ធនាគារ ក្នុងទីក្រុងណៃពិដោ (Naypyitaw) ដោយមិនមានសិទ្ធិទទួលបានមេធាវីឡើយក្រៅពីឡើងតុលាការ។
ម្ចាស់ពានរង្វាន់ណូបែលសន្តិភាពរូបនេះ ត្រូវបានផ្តន្ទាទោសជាច្រើនករណី ហើយត្រូវបានកាត់ទោសឱ្យជាប់ពន្ធនាគារយ៉ាងហោចណាស់២៦ឆ្នាំ ក្នុងរយៈពេល១២ខែចុងក្រោយនេះ។ ក្រុមអ្នករិះគន់បានច្រានចោលការចោទប្រកាន់ទាំងនេះ និងថាជាវិធីដើម្បីរក្សាអំណាចរបស់យោធា។
លោកស្រីត្រូវបានរបបយោធាមីយ៉ាន់ម៉ាចោទប្រកាន់រាប់ចាប់ពីបទរំលោភបំពានលើវិធានការទប់ស្កាត់ជំងឺកូវីដ-១៩ និងការកាន់កាប់ឧបករណ៍វិទ្យុទាក់ទងដោយខុសច្បាប់ រហូតដល់បទញុះញង់ ការបំពានច្បាប់ស្តីពីការរក្សាការសម្ងាត់របស់រដ្ឋ និងការព្យាយាមមានឥទ្ធិពលលើគណៈកម្មការរៀបចំការបោះឆ្នោតរបស់ប្រទេសមីយ៉ាន់ម៉ា។
គួរបញ្ជាក់ថា ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីខែកុម្ភៈ ឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលរាប់ពាន់នាក់ក៏ត្រូវបានសម្លាប់នៅក្នុងការបង្ក្រាបកូដកម្ម និងបាតុកម្មនានាផងដែរ៕