លោកនាយករដ្ឋមន្ត្រី ហ៊ុន សែន ប្រកាសស្វាគមន៍អ្នកទេសចរបរទេស ជាពិសេសជនជាតិចិន ត្រលប់មកកាន់ប្រទេសកម្ពុជាជាថ្មីទៀតនៅឆ្នាំនេះ ដោយលោករំពឹងថា កម្ពុជានឹងទទួលបានអ្នកទេសចរចិន២លាននាក់ឡើងវិញ ក្រោយពេលចិនបើកឱ្យពលរដ្ឋចេញក្រៅប្រទេស។
ក្នុងពិធីបើកការដ្ឋានសាងសង់ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ក្រោមឥណទានសម្បទានពីរដ្ឋាភិបាលប្រជាមានិតចិន នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានថ្លែងថា មុនឆ្លងរាលដាលនៃជំងឺកូវីដ-១៩ កម្ពុជាទទួលបានភ្ញៀវទេសចរបរទេសសរុប ៦លាន៦សែននាក់ ដែលក្នុងនោះមានជនជាតិចិនប្រហែល២លាននាក់។ លោកបន្តថា បច្ចុប្បន្ននេះ ភ្ញៀវទេសចរបរទេសដែលមកកម្ពុជាមានប្រមាណជា២លាន២សែននាក់តែប៉ុណ្ណោះ ក្រោយពីការឆ្លងរាលដាលនៃជំងឺកូវីដ-១៩ បានធូរស្រាលឡើងវិញ។
យ៉ាងណា លោកនាយករដ្ឋមន្ត្រីបញ្ជាក់ថា តាមការព្យាកររបស់មន្ត្រីជំនាញ បើនៅក្នុងឆ្នាំ២០២៣នេះ កម្ពុជាទទួលបានភ្ញៀវទេសចរ ក្នុងនោះមានទាំងជនជាតិចិន ចាប់ពី៤លាននាក់ឡើងទៅ នឹងធ្វើឱ្យសេដ្ឋកិច្ចកម្ពុជារីកលូតលាស់ល្អប្រសើរឡើងវិញ។
លោកថ្លែងថា៖ «បើទេសចរចិនចាប់ផ្តើមបើក ជើងយន្តហោះកើនក្នុងមួយថ្ងៃៗរាប់សិបជើង ពេលនោះអាចថាយើងទទួលបានទេសចរចិនត្រលប់មកវិញប្រមាណ២លាននាក់ ព្រោះវាសម័យមុនកូវីដ អ៊ីចឹងធ្វើឱ្យកំណើនសេដ្ឋកិច្ចកម្ពុជាចាប់ផ្តើមរើប ជាមួយនឹងកំណើនសេដ្ឋកិច្ចកសិកម្មក៏កើន សេវាកម្មក៏កើន។ ហើយខ្ញុំសង្ឃឹមថា ទេសចរចិននឹងតម្រង់ឆ្ពោះមកកម្ពុជា អ្នកដែលទទួលផលប្រយោជន៍ច្រើន រួមមាន កម្ពុជា ថៃ សាំងហ្គាពួរ[សិង្ហបុរី] ជាគោលដៅទេសចរដែលទាក់ទាញ ហើយដែលសម្រួលឱ្យទេសចរចិន»។
លោកនាយករដ្ឋមន្ត្រី ហ៊ុន សែន នៅតែបន្តក្រើនរំឭកទៅកាន់ប្រជាពលរដ្ឋខ្មែរទាំងអស់ត្រូវនាំគ្នាចាក់វ៉ាក់សាំងកូវីដ-១៩ ដើម្បីការពារនៃការឆ្លងរាលដាលនៃជំងឺកាចសាហាវនេះ ខណៈជំងឺកូវីដ-១៩ នៅមិនទាន់ទប់ស្កាត់ឱ្យអស់ទាំងស្រុងនៅឡើយ។
អគ្គនាយកបច្ចេកទេស នៃក្រសួងសុខាភិបាល លោក ហុក គឹមចេង មានប្រសាសន៍ថា បើសិនជាចិនបើកឱ្យប្រជាជនរបស់ខ្លួនចេញទៅក្រៅប្រទេសវិញ ហើយមានភ្ញៀវទេសចរចិនត្រលប់មកកម្ពុជាវិញ នោះក្រសួងនឹងពិភាក្សាជាមួយអន្តរក្រសួង និងសុំគោលការណ៍ពីថ្នាក់ដឹកនាំ ថាតើត្រូវធ្វើចត្តាឡីស័ក ឬធ្វើតេស្តរកវីរុសកូវីដ-១៩ ឬក៏មិនចាំបាច់ធ្វើតេស្ត ជាដើម។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី បានគាំទ្រនឹងការលើកឡើងរបស់លោកនាយករដ្ឋមន្ត្រី ហ៊ុន សែន ចំពោះការស្វាគមន៍ភ្ញៀវទេសចរបរទេស ជាពិសេសជនជាតិចិន ឱ្យត្រលប់មកកាន់ប្រទេសកម្ពុជាជាថ្មីទៀត ដើម្បីលើកកម្ពស់វិស័យទេសចរណ៍ និងសេដ្ឋកិច្ចជាតិ។ ប៉ុន្តែលោកមានក្តីបារម្ភចំពោះបញ្ហានៃការឆ្លងរាលដាលនៃជំងឺកូវីដ-១៩ ក្នុងទ្រង់ទ្រាយធំជាថ្មីទៀត ខណៈបច្ចុប្បន្ន ប្រទេសចិនកំពុងតែរីករាលដាលនៃការឆ្លងជំងឺផ្លូវដង្ហើមមួយនេះកាន់តែខ្លាំងនោះ។
ករណីនេះ លោក អ៊ូច វុទ្ធី បានជំរុញដល់ក្រសួងពាក់ព័ន្ធ ជាពិសេសក្រសួងសុខាភិបាល ត្រូវយកចិត្តទុកដាក់ និងរឹតបន្តឹងផ្នែកសុខភាព ដោយធ្វើតេស្តភ្ញៀវទេសចរទាំងនោះ ដើម្បីកុំឱ្យកម្ពុជាឆ្លងរាលដាលនៃជំងឺកូវីដ-១៩ ដូចកាលពីអតីតកាល។
លោកមានប្រសាសន៍ថា៖ «យើងរឹតបន្តឹងផ្នែកសុខាភិបាល ដែលគាត់ចូលមកតាមច្រកជើងទឹក ជើងគោក ជើងអាកាស ដើម្បីយើងពិនិត្យមើលថាតើមានកូវីដ-១៩ដែរឬអត់។ បើសិនជាយើងពិនិត្យឃើញថាមាន យើងត្រូវមានវិធានការយ៉ាងម៉េច ព្រោះឥលូវនេះ ចិនផ្ទុះឡើងខ្លាំង ដោយសារគាត់បើកសេដ្ឋកិច្ចទូលាយដូចយើងអ៊ីចឹង ហើយគាត់ក៏មិននឹកស្មានថាផ្ទុះខ្លាំង។ចុងក្រោយនេះ យើងមានតួលេខរហូតទៅដល់៣០០លាននាក់ដែលឆ្លងកូវីដនៅប្រទេសចិន»។
លោកបន្ថែមថា៖ «កុំឱ្យសេដ្ឋកិច្ចយើងបិទខ្ទប់ដូចកាលពីឆ្នាំមុន គឺប្រជាពលរដ្ឋស្រែករកពុទ្ធោ អ្នកដែលមានធនធាន អ្នកដែលមធ្យមអត់អីទេ ប៉ុន្តែអាណិតគ្នាកម្មករតាមរោងចក្រ ជួលផ្ទះគេទៅ អាហ្នឹងហើយមានហានិភ័យខ្ពស់ អ្នកខ្លះដាច់បាយ ដាច់អង្ករ ទៅរកអ្វីផ្សេងមិនកើត ខ្លះដេកឈឺនៅក្នុងផ្ទះ អ្នកខ្លះអត់បានទៅរកពេទ្យ កន្លែងហ្នឹងហើយដែលគួរតែបារម្ភ។ ហើយខាងក្រសួងពាក់ព័ន្ធ ជាពិសេសក្រសួងសុខាភិបាល ដើម្បីផ្តល់យោបល់ដល់សម្តេចនាយករដ្ឋមន្ត្រី ឱ្យបានដឹង ឱ្យបានជ្រាប»។
កាលពីថ្ងៃទី២៩ ខែធ្នូ ឆ្នាំ២០២២ លោកនាយករដ្ឋមន្ត្រី ហ៊ុន សែន បានចេញសារជាសំឡេងទាំងយប់ ដោយបានប្រកាសឱ្យចាក់វ៉ាក់សាំងការពារវីរុសកូវីដ-១៩ ដូសទី៦ សម្រាប់មនុស្សពេញវ័យ ហើយថ្នាំវ៉ាក់សាំង ត្រូវចាក់រៀងរាល់៦ខែម្តង ខណៈបណ្តាប្រទេសជាច្រើននៅក្នុងតំបន់ និងពិភពលោក ចាប់ផ្តើមឆ្លងកូវីដឡើងវិញ។
កាលពីថ្ងៃទី១០ ខែធ្នូ ឆ្នាំ២០២២នេះ សារព័ត៌មាន Reuters បានផ្សាយថា ប្រទេសចិនកំពុងប្រយុទ្ធប្រឆាំងនឹងការផ្ទុះឡើងវិញនៃជំងឺកូវីដ-១៩។
បើតាមទីភ្នាក់ងារសារព័ត៌មាន Shine ដែលចុះផ្សាយកាលថ្ងៃទី២៨ ខែធ្នូ ឆ្នាំ២០២២ គឺបណ្តាប្រទេសមួយចំនួន ក្នុងនោះរួមមាន សហរដ្ឋអាមេរិក អ៊ីតាលី ជប៉ុន ឥណ្ឌា កូរ៉េខាងត្បូង និងកោះតៃវ៉ាន់ ជាដើម បានតម្រូវឱ្យអ្នកដំណើរមកពីប្រទេសចិន ធ្វើតេស្តរកជំងឺកូវីដ-១៩ ដើម្បីទប់ស្កាត់ការឆ្លងរាលដាលនៃជំងឺនេះចូលទៅក្នុងប្រទេសទាំងនោះផងដែរ៕
