អ៊ីស្រាអែល បានថ្កោលទោសការបោះឆ្នោតមួយរបស់មហាសន្និបាតអង្គការសហប្រជាជាតិ ដែលស្នើឱ្យតុលាការយុត្តិធម៌អន្តរជាតិ (ICJ) ផ្តល់យោបល់លើការចាត់វិធានការផ្លូវច្បាប់ទាក់ទងនឹងការកាន់កាប់ទឹកដីប៉ាឡេស្ទីនរបស់អ៊ីស្រាអែល។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
គួរបញ្ជាក់ថា តុលាការយុត្តិធម៌អន្តរជាតិ ដែលមានមូលដ្ឋាននៅទីក្រុងឡាអេ ប្រទេសហូឡង់ គឺជាតុលាការកំពូលរបស់អង្គការសហប្រជាជាតិ ដែលដោះស្រាយជម្លោះរវាងរដ្ឋនិងរដ្ឋ។
ចំពោះករណីរវាងប៉ាឡេស្ទីន និងអ៊ីស្រាអែលនេះផងដែរ មហាសន្និបាតអង្គការសហប្រជាជាតិបានស្នើឱ្យតុលាការយុត្តិធម៌អន្តរជាតិខាងលើ ផ្តល់មតិយោបល់លើការចាត់វិធានការផ្លូវច្បាប់ ទាក់ទងនឹងការកាន់កាប់ ការតាំងទីលំនៅ និងការបញ្ចូលឧបសម្ពន្ធរបស់អ៊ីស្រាអែល រួមទាំងវិធានការនានាដែលប្រទេសមួយនេះមានបំណងផ្លាស់ប្តូរលក្ខណៈនិងស្ថានភាពនៃទីក្រុង Jerusalem ផងដែរ។
ទាក់ទិននឹងករណីនេះ ពលរដ្ឋប៉ាឡេស្ទីនបានបង្ហាញការសាទរចំពោះការបោះឆ្នោតរបស់អង្គការសហប្រជាជាតិ ដែលក្នុងនោះសមាជិកចំនួន៨៧ បានបោះឆ្នោតគាំទ្រការអនុម័តសំណើនេះ ខណៈអ៊ីស្រាអែល សហរដ្ឋអាមេរិក និងសមាជិក ២៤ ផ្សេងទៀតបានបោះឆ្នោតប្រឆាំង និង ៥៣ បានបោះឆ្នោតអនុប្បវាទ។
ជាមួយគ្នានេះ អ្នកនាំពាក្យរបស់ប្រធានាធិបតីប៉ាឡេស្ទីន លោក Nabil Abu Rudeineh បានឱ្យដឹងថា៖ «វាដល់ពេលហើយដែលអ៊ីស្រាអែលត្រូវទទួលខុសត្រូវចំពោះឧក្រិដ្ឋកម្មដែលពួកគេកំពុងបន្តធ្វើឡើងប្រឆាំងនឹងប្រជាជនរបស់យើង»។
ទោះជាយ៉ាងណា ការបោះឆ្នោតកាលពីថ្ងៃសុក្រកន្លងទៅ បានបង្ហាញពីបញ្ហាប្រឈមមួយសម្រាប់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដែលទើបតែចូលកាន់តំណែងសាជាថ្មីកាលពីសប្ដាហ៍មុន ខណៈរដ្ឋាភិបាលរបស់លោកបានកំណត់ការពង្រីកការតាំងទីលំនៅជាអាទិភាពដ៏សំខាន់មួយរបស់ខ្លួន៕