ក្រសួងការងារ និងបណ្ដុះបណ្ដាលវិជ្ជាជីវៈ បានកោះហៅតំណាងកម្មករជាង១០នាក់ បម្រើការងារនៅរោងចក្រកាត់ដេរសម្លៀកបំពាក់ បូវឃើរ ហ្គាមេន ហ្វេកធើរី ខេមបូឌា លីមីតធីត (Bowker Garment Factory Cambodia) CO.,LTD. នៅឃុំបែកចាន ស្រុកអង្គស្នួល ខេត្តកណ្ដាល ទៅដោះស្រាយ ក្រោយមានវិវាទការងារជាមួយក្រុមហ៊ុន។
ក្នុងលិខិតចុះថ្ងៃទី២ ខែមករា ឆ្នាំ២០២៣ ប្រធាននាយកដ្ឋានវិវាទការងារ នៃក្រសួងការងារ និងបណ្តុះបណ្តាលវិជ្ជាជីវៈ លោក អាំង សេងលី បានកោះហៅតំណាងកម្មករចំនួន១២នាក់ មានឈ្មោះ នួន វិចិត្រ, ឆន ចាន់, ខន ខេន, ពែល ចំរើន, សុខ ចន្ធី, ឌឹម សុលាង, ខៀវ សុខលីន, ឌុក សាវិន, សំ គឹមសុខ, ស៊ិន វិច្ឆិកា, ប៉ុម ស្រីយ៉ា, និង ឡឹក សុភ័ក្រ បម្រើការងារនៅរោងចក្រ បូវឃើរ ឱ្យចូលទៅដោះស្រាយវិវាទការងារជាមួយក្រុមហ៊ុន នៅថ្ងៃទី៥ ខែមករានេះ។
តំណាងកម្មករ និងជាសមាជិកសហជីពកម្ពុជា លោក ឆន ចាន់ ប្រាប់វីអូឌីថា វិវាទការងារនៅរោងចក្រ បូវឃើរ កើតឡើង ក្រោយពីថៅកែបង្ខំកម្មករឱ្យដាក់ពាក្យឈប់សម្រាកពីការងារ ដោយគ្មានប្រាក់ឈ្នួល រៀងរាល់ថ្ងៃសៅរ៍ រយៈពេល១ខែ កាលពីខែធ្នូ ឆ្នាំ២០២២ ក្រោមហេតុផលអត់ការងារ ប៉ុន្តែក្រុមកម្មករមិនព្រម ដោយយល់ថា ទង្វើនេះខុសច្បាប់ស្តីពីការងារ។
តំណាងកម្មកររូបនេះ បន្តថា ក្រុមកម្មករទាមទារឱ្យថៅកែផ្តល់ប្រាក់ឈ្នួល ៥០ភាគរយ អំឡុងពេលឈប់សម្រាករៀងរាល់ថ្ងៃសៅរ៍ រយៈពេល១ខែ ក្នុងខែធ្នូ។ លោកថា ករណីក្រសួងការងារ កោះហៅកម្មករទៅដោះស្រាយនេះ គឺក្រុមកម្មករមិនបានប្តឹងនោះទេ ប៉ុន្តែតំណាងកម្មករទាំងអស់នឹងចូលទៅជួបជាមួយមន្ត្រីក្រសួងការងារ តាមការកោះហៅនៅថ្ងៃស្អែកនេះ។
លោកបន្ថែមថា៖ «ខ្ញុំនិយាយពាក់ព័ន្ធនឹងផ្លូវច្បាប់ទៅកាន់ខាងរោងចក្រដែរ ប៉ុន្តែខាងរោងចក្រនៅតែប្រកាសជំហរថា ខាងរោងចក្រអត់មានលទ្ធភាពផ្តល់ឱ្យកម្មករដដែល»។
ប្រធានរដ្ឋបាលរោងចក្រ បូវឃើរ លោក ស៊ាង រដ្ឋា ប្រាប់ថាកំពុងរវល់ប្រជុំ មិនអាចនិយាយបាន។
ប្រធានសហព័ន្ធសហជីពឯករាជ្យ លោក រី សិទ្ធីណែត ដែលតាមដានករណីនេះ មានប្រសាសន៍ថា ករណីថៅកែឱ្យដាក់ពាក្យឈប់ដោយខ្លួនឯងដោយគ្មានប្រាក់ឈ្នួលនេះ ជាការមិនទទួលខុសត្រូវ កេងប្រវ័ញ្ចកម្លាំងពលកម្មករ និងជាទង្វើខុសច្បាប់។ លោកបន្តថា ប្រសិនបើរោងចក្រអត់មានការងារឱ្យកម្មករធ្វើទេ គឺម្ចាស់រោងចក្រត្រូវជូនដំណឹងទៅនាយកដ្ឋានអធិការការងារ ដើម្បីសុំព្យួរការងារកម្មករ ប៉ុន្តែលោកថា រោងចក្រ បូវឃើរ នៅមានការងារឱ្យកម្មករធ្វើ និងមានការថែមម៉ោងពីថ្ងៃចន្ទដល់ថ្ងៃសុក្រផងដែរ។
លោកបន្ថែមថា៖ «យើងមើលឃើញថា ករណីនេះមិនមែនកើតមានតែរោងចក្រ បូវឃើរ ទេ គឺមានរោងចក្រជាច្រើនទៀតដូចរោងចក្រនៅ[ខេត្ត]កំពង់ឆ្នាំងអី គឺគេធ្វើអ៊ីចឹងដែរ ដោយមានអ្នកខ្សឹបប្រាប់ថា ធ្វើអ៊ីចឹងទៅ ចំណេញថៅកែ។ បើកាលណាថៅកែឱ្យកម្មករឈប់ ហើយឱ្យប្រាក់ឈ្នួល៥០ភាគរយ មានន័យថា ថៅកែត្រូវបង់លុយឱ្យកម្មករច្រើន។ អ៊ីចឹងគេប្រើមធ្យោបាយហ្នឹងដើម្បីគេចវេះក្នុងការទទួលខុសត្រូវ ហើយចំណេញលុយទៅខាងនិយោជក។ ហើយបើយើងក្រឡេកមើលច្បាប់ គឺវាខុសច្បាប់ ត្រង់មាត្រា៨៣ ស្តីពីច្បាប់ការងារ ដែលថៅកែមិនបានដាក់ការងារឱ្យកម្មករធ្វើគ្រប់គ្រាន់»។
កាលពីថ្ងៃទី១៧ ខែធ្នូ ឆ្នាំ២០២២ សហព័ន្ធសហជីពឯករាជ្យ និងអង្គការដៃគូផ្សេងទៀត បានផ្ញើលិខិតមួយទៅក្រុមហ៊ុនបញ្ជាទិញ អាឌីដាស (ADIDAS) ដើម្បីសុំអន្តរាគមន៍ដោះស្រាយវិវាទការងារជូនកម្មករនៅរោងចក្រ បូវឃើរ ដោយអះអាងថា រោងចក្រមួយនេះបានបង្ខំកម្មករឱ្យដាក់ពាក្យសុំច្បាប់ឈប់សម្រាកដោយគ្មានប្រាក់ឈ្នួល រៀងរាល់ថ្ងៃសៅរ៍ នៅក្នុងខែធ្នូ ឆ្នាំ២០២២។
លិខិតដដែលនេះបានឱ្យដឹងថា កាលពីថ្ងៃទី១៥ ខែវិច្ឆិកា ឆ្នាំ២០២២ តំណាងរោងចក្រ បូវឃើរ កោះប្រជុំជាមួយតំណាងកម្មករ និងថ្នាក់ដឹកនាំសហជីព ហើយប្រកាសថា ក្រុមហ៊ុនគ្មានសម្ភារធ្វើ និងបានបង្ខំឱ្យកម្មករទាំងអស់ប្រើប្រាស់ច្បាប់ឈប់សម្រាកដោយគ្មានប្រាក់ឈ្នួល ប៉ុន្តែភាគីកម្មករមិនព្រម។
លើសពីនេះ ខាងរោងចក្របានបង្ខំឱ្យប្រធានក្រុមតាមផ្នែកនីមួយៗ និងសហជីព បង្ខំទៅកម្មករឱ្យទទួលយកសំណើរបស់ក្រុមហ៊ុន ដោយឱ្យកម្មករផ្តិតមេដៃតាមការបង្ខំរបស់រោងចក្រ ខណៈកម្មករផ្នែកខ្លះត្រូវបានតម្រូវឱ្យធ្វើការងារថែមម៉ោងវេនយប់ពីថ្ងៃចន្ទដល់ថ្ងៃសុក្រ ដែលករណីនេះ សហជីពចាត់ទុកថាជារឿងអយុត្តិធម៌មួយសម្រាប់កម្មករផ្សេងៗទៀតដែលអត់មានការងារធ្វើ។
ក្នុងលិខិតនោះ ក្រុមសហជីពបានស្នើដល់អ្នកបញ្ជាទិញ Adidas ជំរុញនិងដាក់សម្ពាធទៅលើក្រុមហ៊ុន បូវឃើរ ត្រូវអនុវត្តច្បាប់ស្តីពីការងារឱ្យបានត្រឹមត្រូវ ពោលគឺឱ្យកម្មករឈប់សម្រាកដោយមានប្រាក់ឈ្នួលត្រឹមត្រូវ ក្នុងករណីរោងចក្រអត់ការងារឱ្យកម្មករធ្វើពិតប្រាកដមែន។
យ៉ាងណា សហជីពឱ្យដឹងថា រហូតមកដល់ពេលនេះ ក្រុមហ៊ុនបញ្ជាទិញ Adidas មិនបានឆ្លើយតបនៅឡើយទេ ពាក់ព័ន្ធកិច្ចសុំអន្តរាគមន៍នេះ។
បើតាមតំណាងកម្មករ លោក ឆន ចាន់ រោងចក្រ បូវឃើរ ជារោងចក្រកាត់ដេរសម្លៀកបំពាក់ មានកម្មករជាង៤ ៣០០នាក់កំពុងបម្រើការងារ និងមានថៅកែជាជនជាតិហុងកុង៕
