តំណាងកម្មករ ឱ្យដឹងថា ការចរចារកដំណោះស្រាយវិវាទការងារនៅរោងចក្រកាត់ដេរសម្លៀកបំពាក់ បូវឃើរ ហ្គាមេន ហ្វេកធើរី ខេមបូឌា លីមីតធីត (Bowker Garment Factory Cambodia) CO.,LTD. ស្ថិតនៅឃុំបែកចាន ស្រុកអង្គស្នួល ខេត្តកណ្ដាល កាលពីថ្ងៃម្សិលមិញ មិនទាន់ទទួលបានលទ្ធផលនៅឡើយ។
ប្រធាននាយកដ្ឋានវិវាទការងារ នៃក្រសួងការងារ និងបណ្ដុះបណ្ដាលវិជ្ជាជីវៈ លោក អាំង សេងលី បានកោះហៅតំណាងកម្មករចំនួន ១២នាក់ បម្រើការងារនៅរោងចក្រ បូវឃើរ ទៅសម្របសម្រួលរកដំណោះស្រាយជាមួយភាគីរោងចក្រ នៅទីស្តីការក្រសួង នៅថ្ងៃទី៥ ខែធ្នូ ម្សិលមិញនេះ ក្រោយពីថៅកែបង្ខំកម្មករឱ្យដាក់ពាក្យឈប់សម្រាកពីការងារដោយគ្មានប្រាក់ឈ្នួល រៀងរាល់ថ្ងៃសៅរ៍ រយៈពេល១ខែ កាលពីខែធ្នូ ឆ្នាំ២០២២ ក្រោមហេតុផលអត់ការងារ ប៉ុន្តែក្រុមកម្មករមិនព្រម ដោយយល់ថា ទង្វើនេះខុសច្បាប់ស្តីពីការងារ។
តំណាងកម្មករ និងជាសមាជិកសហជីពកម្ពុជា លោក ឆន ចាន់ ប្រាប់វីអូឌីនៅថ្ងៃសុក្រនេះថា ការជួបចរចារកដំណោះស្រាយកាលពីថ្ងៃម្សិលមិញនោះ គឺពុំមានលទ្ធផលអ្វីនោះទេ ខណៈការជជែកចរចានោះបានចាប់ផ្តើមតាំងពីម៉ោង២រសៀល ដល់ម៉ោងជាង៦ល្ងាច។
តំណាងកម្មកររូបនេះ ឱ្យដឹងថា ក្នុងការចរចានោះ ក្រុមកម្មករនៅតែរក្សាជំហរទាមទារទៅថៅកែឱ្យផ្តល់ប្រាក់ឈ្នួល៥០ភាគរយ អំឡុងពេលឈប់សម្រាករៀងរាល់ថ្ងៃសៅរ៍ រយៈពេល១ខែ ក្នុងខែធ្នូ ឆ្នាំ២០២២ ប៉ុន្តែភាគីរោងចក្រនៅតែមិនព្រមផ្តល់ជូនអ្វីទាំងអស់ ដោយរក្សាជំហរឱ្យកម្មករឈប់សម្រាកដោយគ្មានប្រាក់ឈ្នួលដដែល។
លោកបន្ថែមថា៖ «អត់មានលទ្ធផលអ្វីទេ ខាងក្រុមហ៊ុនគេនៅតែនិយាយថាគ្មានលទ្ធភាពផ្តល់ជូនកម្មករ ប៉ុន្តែពួកយើងតំណាងឱ្យកម្មករនៅតែរក្សាជំហរទាមទារឱ្យផ្តល់ប្រាក់ឈ្នួល៥០ភាគរយ អំឡុងពេលឈប់សម្រាកនោះ ព្រោះបើកាលណាមិនផ្តល់ជូនពួកយើង វាផ្ទុយពីច្បាប់ស្តីពីការងារ»។
វីអូឌី មិនអាចរកការបញ្ជាក់ពីប្រធាននាយកដ្ឋានវិវាទការងារ នៃក្រសួងការងារ និងបណ្តុះបណ្តាលវិជ្ជាជីវៈ លោក អាំង សេងលី បានទេ ខណៈប្រធានរដ្ឋបាលរោងចក្រ បូវឃើរ លោក ស៊ាង រដ្ឋា ទូរសព្ទចូល គ្មានអ្នកទទួល។
ប្រធានសហព័ន្ធសហជីពឯករាជ្យ លោក រី សិទ្ធីណែត ដែលតាមដានករណីនេះ មានប្រសាសន៍ថា ករណីថៅកែឱ្យដាក់ពាក្យឈប់ដោយខ្លួនឯងដោយគ្មានប្រាក់ឈ្នួលនេះ គឺជាការមិនទទួលខុសត្រូវ កេងប្រវ័ញ្ចកម្លាំងពលកម្មករ និងជាទង្វើខុសច្បាប់។
ប្រធានសហព័ន្ធសហជីពរូបនេះ បន្តថា ប្រសិនបើរោងចក្រអត់មានការងារឱ្យកម្មករធ្វើទេ គឺម្ចាស់រោងចក្រត្រូវជូនដំណឹងទៅនាយកដ្ឋានអធិការការងារ ដើម្បីសុំព្យួរការងារកម្មករ ប៉ុន្តែលោកថា រោងចក្រ បូវឃើរ នៅមានការងារឱ្យកម្មករធ្វើ និងមានការថែមម៉ោងពីថ្ងៃចន្ទដល់ថ្ងៃសុក្រផងដែរ។
លោក រី សិទ្ធីណែត ឱ្យដឹងទៀតថា ពាក់ព័ន្ធរឿងនេះ សហជីពរបស់លោកបានប្តឹងទៅក្រុមហ៊ុនបញ្ជាទិញ អាឌីដាស (ADIDAS) និងអង្គការអន្តរជាតិ ILO រួចហើយ ប៉ុន្តែមិនទាន់មានការឆ្លើយតបពីស្ថាប័នទាំងនេះនៅឡើយ។
កាលពីថ្ងៃទី១៧ ខែធ្នូ ឆ្នាំ២០២២ សហព័ន្ធសហជីពឯករាជ្យ និងអង្គការដៃគូផ្សេងទៀត បានផ្ញើលិខិតមួយទៅក្រុមហ៊ុនបញ្ជាទិញ អាឌីដាស (ADIDAS) ដើម្បីសុំអន្តរាគមន៍ដោះស្រាយវិវាទការងារជូនកម្មករនៅរោងចក្រ បូវឃើរ ដោយអះអាងថា រោងចក្រមួយនេះបានបង្ខំកម្មករឱ្យដាក់ពាក្យសុំច្បាប់ឈប់សម្រាកដោយគ្មានប្រាក់ឈ្នួល រៀងរាល់ថ្ងៃសៅរ៍ នៅក្នុងខែធ្នូ ឆ្នាំ២០២២។
លិខិតដដែលនេះបានឱ្យដឹងថា កាលពីថ្ងៃទី១៥ ខែវិច្ឆិកា ឆ្នាំ២០២២ តំណាងរោងចក្រ បូវឃើរ កោះប្រជុំជាមួយតំណាងកម្មករ និងថ្នាក់ដឹកនាំសហជីព ហើយប្រកាសថា ក្រុមហ៊ុនគ្មានសម្ភារធ្វើ និងបានបង្ខំឱ្យកម្មករទាំងអស់ប្រើប្រាស់ច្បាប់ឈប់សម្រាកដោយគ្មានប្រាក់ឈ្នួល ប៉ុន្តែភាគីកម្មករមិនព្រម។
លើសពីនេះ ខាងរោងចក្របានបង្ខំឱ្យប្រធានក្រុមតាមផ្នែកនីមួយៗ និងសហជីព បង្ខំទៅកម្មករឱ្យទទួលយកសំណើរបស់ក្រុមហ៊ុន ដោយឱ្យកម្មករផ្តិតមេដៃតាមការបង្ខំរបស់រោងចក្រ ខណៈកម្មករផ្នែកខ្លះត្រូវបានតម្រូវឱ្យធ្វើការងារថែមម៉ោងវេនយប់ពីថ្ងៃចន្ទដល់ថ្ងៃសុក្រ ដែលករណីនេះ សហជីពចាត់ទុកថាជារឿងអយុត្តិធម៌មួយសម្រាប់កម្មករផ្សេងៗទៀត ដែលអត់មានការងារធ្វើ។
ក្នុងលិខិតនោះ ក្រុមសហជីពបានស្នើដល់អ្នកបញ្ជាទិញ Adidas ជំរុញ និងដាក់សម្ពាធទៅលើក្រុមហ៊ុន បូវឃើរ ត្រូវអនុវត្តច្បាប់ស្តីពីការងារឱ្យបានត្រឹមត្រូវ ពោលគឺឱ្យកម្មករឈប់សម្រាកដោយមានប្រាក់ឈ្នួលត្រឹមត្រូវ ក្នុងករណីរោងចក្រអត់ការងារឱ្យកម្មករធ្វើការពិតប្រាកដមែន។
បើតាមតំណាងកម្មករ លោក ឆន ចាន់ រោងចក្រ បូវឃើរ ជារោងចក្រកាត់ដេរសម្លៀកបំពាក់មានកម្មករជាង ៤ ៣០០នាក់បម្រើការងារ និងមានថៅកែជាជនជាតិហុងកុង៕
