អ្នកគាំទ្រអតីតប្រធានាធិបតីប្រេស៊ីលស្ដាំនិយម លោក Jair Bolsonaro ដែលទើបតែផុតអាណត្តិ បាននាំគ្នាសម្រុកចូលលុកលុយ និងបង្កភាពចលាចលក្នុងទីតាំងអគាររដ្ឋាភិបាលសំខាន់ៗមួយចំនួនដែលមានដូចជា សភា វិមានប្រធានាធិបតី និងតុលាការកំពូល កាលពីថ្ងៃអាទិត្យម្សិលមិញ ដើម្បីប្រឆាំងនឹងការចូលកាន់កាប់តំណែងរបស់លោកប្រធានាធិបតី Luiz Inacio Lula da Silva។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៩ ខែមករា ឆ្នាំ២០២៣នេះ។
ទោះជាយ៉ាងណា មិនមានការចេញរបាយការណ៍ភ្លាមៗអំពីការស្លាប់ ឬរងរបួស ពីការវាយប្រហាររបស់ក្រុមអ្នកគាំទ្រអតីតប្រធានាធិបតីទាំងនោះទេ ខណៈពួកគេបានបន្សល់ទុកនូវរូបភាពនៃការបំផ្លិចបំផ្លាញលើទីតាំងវិមានប្រធានាធិបតី សភា និងតុលាការកំពូលរបស់ប្រទេស។
ការបង្កឱ្យមានជាភាពចលាចលដែលមានរយៈពេលជាង៣ម៉ោងនេះ ក៏បានគូសបញ្ជាក់ឱ្យឃើញអំពីភាពមិនចុះសម្រុងគ្នាយ៉ាងធ្ងន់ធ្ងរ ដែលនៅតែបន្តកើតឡើងនៅក្នុងប្រទេស ក្នុងរយៈប៉ុន្មានថ្ងៃ បន្ទាប់ពីការឡើងកាន់តំណែងរបស់ប្រធានាធិបតីឆ្វេងនិយម លោក Luiz Inacio Lula da Silva ដែលទទួលបានជ័យជម្នះលើលោក Jair Bolsonaro នៅក្នុងការបោះឆ្នោតកាលពីខែតុលា ឆ្នាំមុន។
ថ្លែងក្នុងសន្និសីទសារព័ត៌មានមួយ ក្នុងអំឡុងពេលបំពេញដំណើរទស្សនកិច្ចជាផ្លូវការទៅកាន់រដ្ឋ Sao Paulo លោកប្រធានាធិបតី Lula បានឱ្យដឹងថា៖ «អ្នកដែលបង្កឱ្យមានជាការបំផ្លិចបំផ្លាញទាំងនេះ ដែលយើងអាចហៅបានថាជាក្រុមអ្នកស្ដាំនិយមលើសលុប បានធ្វើនូវសកម្មភាពដែលមិនធ្លាប់កើតមានឡើងនៅក្នុងប្រវត្តិសាស្ត្រនៃប្រទេសនេះ។ អ្នកទាំងអស់ដែលបានធ្វើសកម្មភាពនេះ នឹងត្រូវកំណត់អត្តសញ្ញាណ ហើយពួកគេនឹងទទួលទោស»។
គួរបញ្ជាក់ថា លោក Luiz Inacio Lula da Silva អាយុ៧៧ឆ្នាំ បានស្បថចូលកាន់តំណែងជាប្រធានាធិបតីប្រេស៊ីល សាជាថ្មី កាលពីថ្ងៃទី១ ខែមករា ឆ្នាំ២០២៣ បន្ទាប់ពីបានឈ្នះការបោះឆ្នោតប្រធានាធិបតីលើលោក Bolsonaro កាលពីខែតុលា ឆ្នាំ២០២២ ដោយរូបលោកក៏បានប្តេជ្ញាជួយសង្គ្រោះប្រទេសដែលញាំញីដោយភាពអត់ឃ្លាន ភាពក្រីក្រ និងការប្រកាន់ពូជសាសន៍មួយនេះផងដែរ។
ទោះជាយ៉ាងណា លទ្ធផលនៃជ័យជម្នះរបស់លោក Lula នេះមិនត្រូវបានទទួលស្គាល់ដោយលោក Bolsonaro និងអ្នកគាំទ្ររបស់ខ្លួនឡើយ ដោយពួកគេលើកឡើងថា កម្សោយក្នុងការបោះឆ្នោតនេះបង្កឱ្យមានចលនាហិង្សានៃអ្នកបដិសេធលទ្ធផលបោះឆ្នោត៕