យោធាចិនបាននិយាយថា ខ្លួនបានធ្វើសមយុទ្ធយោធាជុំវិញកោះតៃវ៉ាន់ កាលពីថ្ងៃអាទិត្យ ដែលជាសមយុទ្ធលើកទី២ ក្នុងរយៈពេលតិចជាងមួយខែ ដោយក្រសួងការពារជាតិតៃវ៉ាន់បានរាយការណ៍ថា ខ្លួនបានឃើញយន្តហោះចម្បាំងចិនចំនួន៥៧គ្រឿង។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៩ ខែមករា ឆ្នាំ២០២៣ នេះ។
ប្រទេសចិន ចាត់ទុកកោះតៃវ៉ាន់ជាទឹកដីរបស់ខ្លួន ហើយបាននិងកំពុងបង្កើនសម្ពាធផ្នែកយោធា នយោបាយ និងសេដ្ឋកិច្ច ដើម្បីអះអាងពីការទាមទារទាំងនោះ។
បញ្ជាការភាគខាងកើតនៃកងទ័ពរំដោះប្រជាជនចិន បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យថា កងកម្លាំងរបស់ខ្លួនបានរៀបចំ «ការល្បាតត្រៀមប្រយុទ្ធរួមគ្នា និងសមយុទ្ធប្រយុទ្ធជាក់ស្តែង» នៅក្នុងសមុទ្រ និងដែនអាកាសជុំវិញកោះតៃវ៉ាន់ ដោយផ្តោតលើការវាយប្រហារតាមផ្លូវគោក និងផ្លូវទឹក [សមុទ្រ]។
ប្រភពដដែលបានបន្ថែមនៅក្នុងសេចក្តីថ្លែងការណ៍ខ្លីមួយរបស់ខ្លួនថា គោលបំណងនៃសមយុទ្ធនេះ គឺដើម្បីសាកល្បងសមត្ថភាពប្រយុទ្ធរួមគ្នា និង «ប្រឆាំងយ៉ាងម៉ឺងម៉ាត់ចំពោះសកម្មភាពបង្កហេតុរបស់កងកម្លាំងខាងក្រៅ និងកងកម្លាំងផ្តាច់ខ្លួនឯករាជ្យតៃវ៉ាន់»។
ក្រសួងការពារជាតិតៃវ៉ាន់ បាននិយាយនៅថ្ងៃចន្ទនេះថា ក្នុងរយៈពេល២៤ម៉ោង ខ្លួនបានឃើញយន្តហោះចម្បាំងចិនចំនួន៥៧គ្រឿង និងនាវាកងទ័ពជើងទឹកចំនួន៤គ្រឿង ដែលកំពុងប្រតិបត្តិការជុំវិញកោះនេះ ក្នុងនោះយន្តហោះចំនួន២៨គ្រឿង ដែលបានហោះចូលទៅក្នុងតំបន់ការពារដែនអាកាសរបស់តៃវ៉ាន់។
យោងតាមផែនទីពីក្រសួងការពារជាតិតៃវ៉ាន់ បានឱ្យដឹងថា ក្នុងចំណោមយន្តហោះចម្បាំងទាំងនោះ មាន២៨គ្រឿងបានឆ្លងកាត់ខ្សែបន្ទាត់មធ្យមនៃច្រកសមុទ្រតៃវ៉ាន់ ដែលជាតំបន់ទ្រនាប់មិនផ្លូវការរវាងភាគីទាំងពីរ រួមទាំងយន្តហោះចម្បាំង Su-30 និង J-16 ខណៈយន្តហោះទម្លាក់គ្រាប់បែក H-6 ដែលមានសមត្ថភាពបំពាក់នុយក្លេអ៊ែរ ចំនួន២គ្រឿង បានហោះទៅកាន់ភាគខាងត្បូងនៃកោះតៃវ៉ាន់។
ប្រទេសចិនបានធ្វើសមយុទ្ធស្រដៀងគ្នានេះកាលពីចុងខែមុន ដោយតៃវ៉ាន់បានរាយការណ៍ថា យន្តហោះចម្បាំងរបស់ចិនចំនួន៤៣គ្រឿងបានឆ្លងកាត់ខ្សែបន្ទាត់មធ្យមរបស់តៃវ៉ាន់។
ប្រទេសចិន បាននិងកំពុងធ្វើសមយុទ្ធយោធាជារឿយៗទៅក្នុងដែនទឹក និងអាកាស នៅជិតកោះតៃវ៉ាន់ ក្នុងរយៈពេល៣ឆ្នាំកន្លងមកនេះ។
ចិនបានធ្វើសមយុទ្ធយោធាជុំវិញកោះតៃវ៉ាន់ កាលពីខែសីហា ឆ្នាំមុន បន្ទាប់ពីដំណើរទស្សនកិច្ចរបស់ប្រធានសភាអាមេរិកលោកស្រី ណានស៊ី ផេឡូស៊ី (Nancy Pelosi)។
តៃវ៉ាន់ បដិសេធយ៉ាងដាច់អហង្ការចំពោះការទាមទារអធិបតេយ្យភាពរបស់ទីក្រុងប៉េកាំង ដោយនិយាយថា មានតែប្រជាជនចំនួន២៣លាននាក់របស់កោះនេះប៉ុណ្ណោះដែលអាចសម្រេចអនាគតរបស់ពួកគេបាន។
ទីក្រុងប៉េកាំង មានការខឹងសម្បាចំពោះការគាំទ្ររបស់អាមេរិកចំពោះតៃវ៉ាន់ រួមទាំងការលក់អាវុធឱ្យប្រទេសដែនកោះនេះផងដែរ។
សហរដ្ឋអាមេរិក ក៏ដូចប្រទេសជាច្រើនផ្សេងទៀត មិនមានទំនាក់ទំនងការទូតផ្លូវការជាមួយកោះតៃវ៉ាន់ទេ ប៉ុន្តែជាប្រទេសផ្គត់ផ្គង់សព្វាវុធដ៏សំខាន់បំផុតរបស់ដែនកោះនេះ និងជាអ្នកគាំទ្រនៅលើឆាកអន្តរជាតិ។
ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំង បានបង្កើនសម្ពាធទៅលើរដ្ឋាភិបាលកោះតៃវ៉ាន់ ដើម្បីឱ្យរដ្ឋាភិបាលនៃដែនកោះមួយនេះទទួលយកអំណាចរបស់ទីក្រុងប៉េកាំង។ ចំណែករដ្ឋាភិបាលកោះតៃវ៉ាន់វិញ តែងលើកឡើងថា ពួកគេចង់បានសន្តិភាពជាមួយប្រទេសចិន ប៉ុន្តែប្រសិនបើចិនវាយប្រហារមកលើកោះនេះ ពួកគេនឹងការពារ៕