រុស្ស៊ី និងអ៊ុយក្រែន បានដោះដូរឈ្លើយសឹកចំនួន៥០នាក់ កាលពីថ្ងៃអាទិត្យ តាមកិច្ចព្រមព្រៀងមួយដែលភាគីទាំងពីរសាទរ ទោះបីជាមានការប្រយុទ្ធគ្នានៅភាគខាងកើតអ៊ុយក្រែនក៏ដោយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៩ ខែមករា ឆ្នាំ២០២៣នេះ។
ក្រសួងការពារជាតិរុស្ស៊ី បានឱ្យដឹងថា ទាហានរុស្ស៊ីចំនួន៥០នាក់ដែលត្រូវបានដោះលែងមកវិញ នឹងត្រូវបញ្ជូនតាមយន្តហោះទៅកាន់ទីក្រុងមូស្គូ ដើម្បីទទួលការព្យាបាល និងការស្តារនីតិសម្បទាផ្លូវចិត្តឡើងវិញ។
ក្រសួងនេះបានលើកឡើងនៅក្នុងសេចក្តីថ្លែងការណ៍មួយថា៖ «នៅថ្ងៃទី៨ ខែមករា ជាលទ្ធផលនៃការចរចា ទាហានរុស្ស៊ីចំនួន៥០នាក់ដែលស្ថិតក្នុងគ្រោះថ្នាក់ដល់ជីវិតក្នុងអំឡុពេលចាប់ជាឈ្លើយសឹក ត្រូវបានដោះលែងដោយរបបទីក្រុងកៀវ»។
អ៊ុយក្រែន បានបញ្ជាក់ថា ពិតជាមានការដោះដូរឈ្លើយសឹកពិតមែន ហើយបាននិយាយថារុស្ស៊ីបានដោះលែងទាហានអ៊ុយក្រែនចំនួន៥០នាក់ តាមកិច្ចព្រមព្រៀងដូចគ្នានេះ។
លោក អ៊ែនឌ្រី យឺម៉ាក់ (Andriy Yermak) ប្រធានការិយាល័យប្រធានាធិបតីអ៊ុយក្រែន បានលើកឡើងនៅលើបណ្តាញសង្គម Twitter ថា៖ «ជោគជ័យមួយទៀតក្នុងការដោះដូរឈ្លើយសឹក។ ទាហានអ៊ុយក្រែនចំនួន៥០នាក់ ត្រូវបានដោះលែង»។
លោកបន្តថា៖ «យើងត្រូវយកប្រជាជនរបស់យើងទាំងអស់ត្រលប់មកវិញ ហើយយើងកំពុងធ្វើកិច្ចការនេះយ៉ាសកម្ម»។
លោក Yermak បានបង្ហោះរូបភាពនៃទាហានអ៊ុយក្រែនដែលត្រូវបានដោះលែង ដោយកាន់ថង់អាហារនៅជិតរថយន្តក្រុងដែលពួកគេហៀបនឹងឡើងជិះ និងវីដេអូដែលពួកគេច្រៀងភ្លេងជាតិអ៊ុយក្រែននៅពេលកំពុងធ្វើដំណើរ។
គួរបញ្ជាក់ថា កន្លងមក ប្រទេសទាំងពីរក៏ធ្លាប់បានដោះដូរឈ្លើយសឹកដែរ ហើយការដោះដូរដ៏ធំផុតចាប់តាំងពីសង្គ្រាមផ្ទុះឡើងនោះ គឺកាលពីថ្ងៃទី២១ ខែកញ្ញា ឆ្នាំ២០២២ ដែលមានការដោះដូរឈ្លើយសឹករហូតដល់២១៥នាក់៕