អន្តរជាតិ

អ៊ុយក្រែនបដិសេធការអះអាងរបស់រុស្ស៊ីដែលថាបានសម្លាប់ទាហានអ៊ុយក្រែនជាង៦០០នាក់

លោក លី សេងហន
| ០៩ មករា ២០២៣
ម៉ោង ១៦:១៧

ផ្សែងហុយចេញពីអគារបាក់បែកក្រោមការវាយប្រហាររបស់រុស្ស៊ី អំឡុងពេលបទឈប់បាញ់រយៈពេល៣៦ម៉ោង ដែលប្រកាសដោយប្រធានាធិបតីរុស្ស៊ី លោក វ្ល៉ាឌីមៀ ពូទីន ខណៈដែលការវាយប្រហាររបស់រុស្ស៊ីលើអ៊ុយក្រែននៅតែបន្ត ពីតំបន់ជួរមុខ Donbas នៃទីក្រុង Bakhmut ប្រទេសអ៊ុយក្រែន ថ្ងៃទី០៧ ខែមករា ឆ្នាំ២០២៣។ (REUTERS /Clodagh Kilcoyne)

អ៊ុយក្រែន បានបដិសេធការអះអាងរបស់រុស្ស៊ី ដែលថាយោធារបស់ខ្លួនបានវាយប្រហារលើមូលដ្ឋានទ័ពអ៊ុយក្រែន នៅក្នុងតំបន់ដុនបាស (Donbas) និងបានសម្លាប់ទាហានអ៊ុយក្រែនជាង៦០០នាក់ និងថាមិនមានអ្នករងរបួសនៅក្នុងការវាយប្រហារនោះឡើយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Al Jazeera កាលពីថ្ងៃទី៨ ខែមករា ឆ្នាំ២០២៣។

ក្រសួងការពារជាតិរុស្ស៊ី បាននិយាយថា មីស៊ីលបានវាយប្រហារមូលដ្ឋានទ័ពបណ្ដោះអាសន្នចំនួន២ ដែលមានទាហានអ៊ុយក្រែនចំនួន១ ៣០០នាក់ នៅទីក្រុងក្រាម៉ាតូស (Kramatorsk) ក្នុងតំបន់ដូណេតស៍ (Donetsk) ភាគខាងកើតអ៊ុយក្រែន។ ក្រសួងនេះបាននិយាយថា «ទាហានអ៊ុយក្រែនជាង ៦០០នាក់ ត្រូវបានសម្លាប់» នៅក្នុងប្រតិបត្តិការដែលខ្លួនហៅថា
«ជាការវាយប្រហារសងសឹក» លើទាហានអ៊ុយក្រែន។

អ្នកនាំពាក្យក្រសួងការពារជាតិរុស្ស៊ី លោក អ៊ីហ្គ័រ កូណាស្សេនកូវ (Igor Konashenkov) បាននិយាយថា ការវាយប្រហារនេះត្រូវបានធ្វើឡើងជាការសងសឹក បន្ទាប់ពីអ៊ុយក្រែនបានសម្លាប់ទាហានរុស្ស៊ីរាប់សិបនាក់នៅក្នុងការវាយប្រហារមួយលើទីក្រុងម៉ាគីវ៉ា (Makiivka) កាលពីសប្តាហ៍មុន។

ពាក់ព័ន្ធនឹងករណីនេះ មន្ត្រីអ៊ុយក្រែនបានបដិសេធថា មិនមានអ្នករងរបួសក្នុងការវាយប្រហាររបស់រុស្ស៊ីលើក្រុងក្រាម៉ាតូស (Kramatorsk) ទេ។

លោក សឺហ៊ី ចេរេវ៉ាត់យី (Serhiy Cherevaty) អ្នកនាំពាក្យរបស់កងកម្លាំងអ៊ុយក្រែននៅភាគខាងកើត បាននិយាយថា ការវាយប្រហាររបស់រុស្ស៊ីលើទីក្រុងក្រាម៉ាតូស (Kramatorsk) បានបំផ្លាញតែហេដ្ឋារចនាសម្ពន្ធស៊ីវិលប៉ុណ្ណោះ។

លោកបន្ថែមថា៖ «កងកម្លាំងរបស់អ៊ុយក្រែនមិនរងផលប៉ះពាល់ឡើយ»។

ប្រធានរដ្ឋបាលតំបន់ដូណេតស៍ (Donetsk) លោក ប៉ាវឡូ គីរីលេនកូ (Pavlo Kyrylenko) បាននិយាយកាលពីថ្ងៃអាទិត្យថា កងទ័ពរុស្សីបានបើកការវាយប្រហារដោយគ្រាប់រ៉ុក្កែតចំនួន ៧លើក លើទីក្រុងក្រាម៉ាតូស (Kramatorsk) ដោយបន្ថែមថា «គ្រឹះស្ថានសិក្សា ទីកន្លែងឧស្សាហកម្ម និងយានដ្ឋាន» ត្រូវបានបំផ្លាញ ហើយមិនមានអ្នករងរបួសនោះទេ។

អ្នករាយការណ៍ព័ត៌មានពីទីភ្នាក់ងារសារព័ត៌មាន Reuters បានទៅមើលអន្តេវាសិកដ្ឋានមហាវិទ្យាល័យចំនួន២ ដែលក្រសួងការពារជាតិរុស្ស៊ី អះអាងថា ជាមូលដ្ឋានទ័ពអ៊ុយក្រែនបណ្តោះអាសន្ន។

ពួកគេបាននិយាយថា មិនមានការខូចខាតធ្ងន់ធ្ងរពីការវាយប្រហារនោះទេ។ គ្មានសញ្ញាច្បាស់លាស់ណាមួយដែលថា កងទ័ពអ៊ុយក្រែនស្នាក់នៅទីនោះឡើយ ហើយក៏មិនបានឃើញសាកសព ឬស្នាមប្រលាក់ឈាមឡើយ។

ការឈ្លានពានរបស់រុស្ស៊ីលើអ៊ុយក្រែន គិតរហូតមកដល់ពេលនេះ បានឈានចូលមកដល់ខែទី១០ហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត និងតំបន់ទីក្រុងជាច្រើនប្រែក្លាយទៅជាគំនរបាក់បែក ខណៈលោក ហ្សេលេនស្គី ក៏ធ្លាប់បានចោទប្រទេសរុស្ស៊ីថាកំពុងតែព្យាយាមកម្ចាត់ប្រទេសរបស់លោកចេញពីពិភពលោកផងដែរ៕

រុស្ស៊ី, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។