មន្ត្រីថៃបានរកឃើញទ្រព្យសម្បត្តិដែលជាកម្មសិទ្ធិរបស់កូនមេដឹកនាំរបបយោធាមីយ៉ាន់ម៉ា អំឡុងពេលឆ្មក់ចូលឆែកឆេរអាផាតមិន (Apartment) មួយកន្លែងរបស់មហាសេដ្ឋីមីយ៉ាន់ម៉ាម្នាក់នៅទីក្រុងបាងកក ដែលត្រូវបានចោទប្រកាន់ពីបទជួញដូរគ្រឿងញៀន និងលាងលុយកខ្វក់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១១ ខែមករា ឆ្នាំ២០២៣។
បណ្ណកម្មសិទ្ធិ និងសៀវភៅធនាគារដែលជាកម្មសិទ្ធិរបស់កូនស្រី និងកូនប្រុសរបស់លោក មីន អ៊ុងឡាំង (Min Aung Hlaing) ដែលជាមេដឹកនាំយោធាមីយ៉ាន់ម៉ា ត្រូវបានរកឃើញនៅគេហដ្ឋានរបស់លោក ទុន មីនឡាត់ (Tun Min Latt) អាយុ៥៣ឆ្នាំ នៅពេលដែលលោកត្រូវបានចាប់ខ្លួននៅក្នុងប្រទេសថៃកាលពីខែកញ្ញា ឆ្នាំមុន រួមជាមួយនឹងជនជាតិថៃចំនួន៣នាក់ ដោយចោទប្រកាន់ពីបទ «សមគំនិតក្នុងការជួញដូរគ្រឿងញៀន និងការលាងលុយកខ្វក់»។
លោក ទុន មីនឡាត់ មានទំនាក់ទំនងយ៉ាងជិតស្និទ្ធជាមួយលោក មីន អ៊ុងឡាំង (Min Aung Hlaing) ដែលបានដណ្តើមអំណាចពីរដ្ឋាភិបាលជាប់ឆ្នោតលោកស្រី អ៊ុងសាន ស៊ូជី កាលពីខែកុម្ភៈ ឆ្នាំ២០២១។ នេះបើយោងតាមប្រភពចំនួន៣ ដែលដឹងអំពីបញ្ហានេះបានប្រាប់ Reuters កាលពីឆ្នាំមុន។
ប្រភពដដែលបន្តថា លោក ទុន មីនឡាត់ បានផ្គត់ផ្គង់ដល់របបយោធាមីយ៉ាន់ម៉ា។ លោក ទុន មីនឡាត់ (Tun Min Latt) កំពុងស្ថិតក្នុងការឃុំខ្លួនបណ្តោះអាសន្ន ខណៈមេធាវីរបស់លោកមិនអាចទាក់ទងសុំការអធិប្បាយបានទេ។
ទោះយ៉ាងណា កូនទាំង២នាក់របស់លោក មីន អ៊ុងឡាំង (Min Aung Hlaing) ពុំប្រឈមនឹងការចាត់វិធានការផ្លូវច្បាប់ឡើយ ពាក់ព័ន្ធនឹងទ្រព្យសម្បត្តិទាំងនោះ។ អាជ្ញាធរថៃចាត់ទុកថា ពួកគេមិនពាក់ព័ន្ធនឹងការស៊ើបអង្កេត ចំពោះករណីលោក ទុន មីនឡាត់ ឡើយ។
កូនប្រុសរបស់លោក មីន អ៊ុងឡាំង ឈ្មោះ អ៊ុង យ៉េស៊ុន (Aung Pyae Sone) និងកូនស្រីឈ្មោះ ឃីនធីរីថេតម៉ុន (Khin Thiri Thet Mon) ដែលបានរងទណ្ឌកម្មពីសហរដ្ឋអាមេរិក និងកាណាដា មិនបានឆ្លើយតបទៅនឹងសំណើសុំការអធិប្បាយពី Reuters ឡើយ។
សហរដ្ឋអាមេរិកបាននិយាយថា ពួកគេ [អ៊ុង យ៉េស៊ុន និង ឃីន ធីរីថេតម៉ុន] មានអាជីវកម្មដែល «ទទួលបានផលប្រយោជន៍ដោយផ្ទាល់ពីតួនាទី និងឥទ្ធិពលរបស់ឪពុក»។
អ្នកនាំពាក្យអង្គការយុត្តិធម៌សម្រាប់មីយ៉ាន់ម៉ា (Justice for Myanmar) បាននិយាយថា ការស៊ើបអង្កេតក៏បានរកឃើញផងដែរថា គ្រួសាររបស់លោក មីន អ៊ុងឡាំង កំពុងលាក់ទ្រព្យសម្បត្តិនៅក្នុងប្រទេសថៃ ហើយបានជំរុញឱ្យរដ្ឋាភិបាលថៃ ចាត់វិធានការជាបន្ទាន់ ដើម្បីកុំឱ្យថៃក្លាយជាឋានសួគ៌សម្រាប់ឧក្រិដ្ឋជនសង្គ្រាមមីយ៉ាន់ម៉ា ដោយរារាំងរបបយោធាមីយ៉ាន់ម៉ា និងសមាជិករបស់ខ្លួនកុំឱ្យប្រើប្រាស់សេវាធនាគាររបស់ថៃ កុំឱ្យទទួលបានទ្រព្យសម្បត្តិនៅក្នុងប្រទេសថៃ និងបង្កកទ្រព្យសម្បត្តិដែលត្រូវបានលួច ហើយដែលជាកម្មសិទ្ធិរបស់ប្រជាជនមីយ៉ាន់ម៉ា។
គួរបញ្ជាក់ថា ក្នុងអំឡុងពេលឆ្មក់ចូលឆែកឆេរកាលពីខែកញ្ញា នៅអាផាតមិនរបស់លោក ទុន មីនឡាត់ ក្នុងទីក្រុងបាងកក សមត្ថកិច្ចបាននិយាយថា ពួកគេបានរឹបអូសទ្រព្យសម្បត្តិដែលមានតម្លៃ ៨,៩៦លានដុល្លារ រួមទាំងរថយន្តទំនើប នាឡិកា និងកាបូបដែលមានតម្លៃថ្លៃ រួមជាមួយនឹងទឹកប្រាក់ចំនួន២៣៩ ០៩១ដុល្លារផងដែរ៕
