លោកនាយករដ្ឋមន្ត្រី ហ៊ុន សែន បានបញ្ជាក់ជាថ្មីថា ការដំឡើងប្រាក់បៀវត្សសម្រាប់មន្ត្រីរាជការនិងកងកម្លាំងប្រដាប់អាវុធ នឹងចាប់ផ្តើមនៅខែមករា ឆ្នាំ២០២៣ មិនមែននៅក្នុងឆ្នាំ២០២២នេះទេ។
តាមរយៈសារនៅលើបណ្ដាញសង្គមហ្វេសប៊ុកនៅព្រឹកថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានលើកឡើងថា កាលពីថ្ងៃម្សិលមិញ លោកបានប្រកាសពីការដំឡើងប្រាក់បៀវត្សជូនមន្ត្រីរាជការ និងកងកម្លាំងប្រដាប់អាវុធ ក្នុងភាពមិនច្បាស់លាស់អំពីពេលវេលា ដែលបង្កឱ្យមានការភ័ន្តច្រឡំ។
លោកបានគូសបញ្ជាក់ថា៖ «ខ្ញុំសូមបញ្ជាក់ជូនថា ការដំឡើងបៀវត្សនឹងត្រូវចាប់ផ្តើមនៅខែមករា ឆ្នាំ២០២៣»។
ក្នុងពិធីប្រគល់សញ្ញាប័ត្រ និងបើកវគ្គសិក្សាថ្មីនៅសាលាភូមិន្ទរដ្ឋបាល នៅថ្ងៃទី១៣ ខែមិថុនា ឆ្នាំ២០២២ ម្សិលមិញនេះ លោកនាយករដ្ឋមន្ត្រី ហ៊ុន សែន បានថ្លែងថា រដ្ឋាភិបាលនឹងដំឡើងប្រាក់បៀវត្សជូនមន្ត្រីរាជការ និងកងកម្លាំងប្រដាប់អាវុធឡើងវិញ ក្រោយខកខានដំឡើងរយៈពេល២ឆ្នាំមកហើយ ដោយសារវិបត្តិកូវីដ-១៩។ លោកបន្តថា ការដំឡើងនេះមិនគិតជាភាគរយទេ គឺដំឡើងតាមរបៀប ដោយនឹងដំឡើងប្រាក់បៀវត្សច្រើនដល់អ្នកដែលមានប្រាក់បៀវត្សតិច និងដំឡើងតិចសម្រាប់អ្នកដែលមានប្រាក់បៀវត្សខ្ពស់។
លោកបានឱ្យដឹងទៀតថា ការដំឡើងប្រាក់បៀវត្សសម្រាប់គ្រូបង្រៀន និងគ្រូពេទ្យ ទាបបំផុតឱ្យបាន១,៥លានរៀល ដែលកន្លងទៅ ប្រាក់បៀវត្សពួកគាត់មានចំនួន១,៣លានរៀល និងប្រាក់បៀវត្សសម្រាប់មន្រ្តីផ្នែកផ្សេងទៀតនឹងឡើងដល់១,៤លានរៀល ខណៈកន្លងទៅ មានចំនួន១,២លានរៀល។
លោកបានបន្តទៀតថា នៅពេលដំឡើងបៀវត្ស ក៏ត្រូវដំឡើងពិដាននៃប្រាក់បៀវត្សដែលត្រូវជាប់ពន្ធផងដែរ ដែលមានន័យថា អ្នកដែលមានប្រាក់បៀវត្សក្រោម១,៥លានរៀល គឺមិនជាប់ពន្ធនោះទេ។ លោកបានបញ្ជាក់ថែមទៀតថា ការធ្វើបែបនេះ គឺចៀសវាងអ្នកមានប្រាក់បៀវត្សទាបជាងគេជាប់ពន្ធ ហើយការដែលធ្វើបែបនេះ គឺគិតទាំងវិស័យរដ្ឋ និងវិស័យឯកជន៕