រដ្ឋាភិបាលកម្ពុជាកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ជាកាលបរិច្ឆេទនៃការបោះឆ្នោតជ្រើសតាំងតំណាងរាស្រ្តសម្រាប់នីតិកាលទី៧ នៃរដ្ឋសភា។ នេះបើតាមសេចក្តីសម្រេចរបស់រដ្ឋាភិបាលផ្សព្វផ្សាយនៅថ្ងៃពុធនេះ។
តាមរយៈសេចក្តីសម្រេចនេះ រដ្ឋាភិបាលបានណែនាំឱ្យរដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី រដ្ឋមន្រ្តីក្រសួងមហាផ្ទៃ រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ រដ្ឋមន្រ្តីគ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ អនុវត្តសេចក្តីសម្រេចនេះឱ្យមានប្រសិទ្ធភាពចាប់ពីថ្ងៃចុះហត្ថលេខានេះតទៅ។
ក្រោយការដួលរលំនៃរបបខ្មែរក្រហម ប្រទេសកម្ពុជាបានរៀបចំការបោះឆ្នោតជ្រើសតាំងតំណាងរាស្រ្តជាលើកដំបូងនៅឆ្នាំ១៩៩៣ ក្រោមការឃ្លាំមើលរបស់អង្គការសហប្រជាជាតិ ឬ អ៊ុនតាក់ បន្ទាប់ពីមានកិច្ចព្រមព្រៀងសន្តិភាពទីក្រុងប៉ារីស នៅឆ្នាំ១៩៩១។ ការបោះឆ្នោត នៅក្នុងអាណត្តិទី១នោះ គណបក្សរាជានិយមហ្វ៊ុនស៊ិនប៉ិចបានទទួលជ័យជម្នះលើគណបក្សប្រជាជនកម្ពុជា និងក្រោយមក បក្សទាំងពីរបានព្រមព្រៀងនយោបាយបង្កើតជារដ្ឋាភិបាលចម្រុះ ដោយមាននាយករដ្ឋមន្រ្តីចំនួន២រូប គឺសម្តេចក្រុមព្រះនរោត្តម រណឫទ្ធិ ជានាយក រដ្ឋមន្រ្តីទី១ និងលោក ហ៊ុន សែន ជានាយករដ្ឋមន្រ្តីទី២។ ការបោះឆ្នោតនៅពេលនោះត្រូវបានសហគមន៍អន្តរជាតិចាត់ទុកជាការបោះឆ្នោតដែលមានលក្ខណៈសេរី ត្រឹមត្រូវ និងយុត្តិធម៌ជាងគេ សម្រាប់ការបោះឆ្នោតនៅក្នុងប្រទេសកម្ពុជា។
ប្រទេសកម្ពុជាបានរៀបចំការបោះឆ្នោតជ្រើសតាំងតំណាងរាស្រ្ត អាណត្តិទី៦ នៃរដ្ឋសភា កាលពីថ្ងៃទី២៩ ខែកក្កដា ឆ្នាំ២០១៨ ដោយគ្មានវត្តមានគណបក្សសង្រ្គោះជាតិដែលត្រូវបានតុលាការរំលាយចូលរួមនោះទេ។ គណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែន នៅពេលនោះបានទទួលសំឡេងឆ្នោតច្រើនលើសលុប គឺទទួលបានអាសនៈទាំង១២៥នៅក្នុងរដ្ឋសភា។
ទោះជាយ៉ាងណា សហគមន៍អន្តរជាតិបានចាត់ទុកការបោះឆ្នោតដោយគ្មានវត្តមានបក្សប្រឆាំងនៅពេលនោះ ថាគ្រាន់តែជាការបោះឆ្នោតបង្រ្គប់កិច្ច និងគ្មានភាពសេរី ត្រឹមត្រូវ និងយុត្តិធម៌នោះឡើយ៕
