លោកនាយករដ្ឋមន្ត្រី ហ៊ុន សែន ព្រមានឈប់ផ្តល់សំណងដល់ពលរដ្ឋដែលរស់នៅខុសច្បាប់ក្នុងតំបន់រមណីយដ្ឋានអង្គរ បើពួកគេជឿតាមការញុះញង់របស់អ្នកនយោបាយ ហើយមិនព្រមចាកចេញ ព្រោះតែចង់នៅតថ្លៃទាមទារសំណងខ្ពស់ជាងអ្វីដែលរដ្ឋាភិបាលបានកំណត់រួចទៅហើយនោះ។
ក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានថ្លែងថា ថ្មីៗនេះ លោកបានទទួលព័ត៌មានថា មានមនុស្សមួយចំនួនបានទៅឃោសនាប្រាប់ប្រជាពលរដ្ឋដែលរស់នៅខុសច្បាប់ក្នុងតំបន់រមណីយដ្ឋានអង្គរ ក្នុងខេត្តសៀមរាប កុំអាលចាកចេញ ដើម្បីតថ្លៃសំណងឱ្យបានច្រើនជាមុន ឬបានដីច្រើនជាងមុនជាដើម។
ករណីនេះ លោកបានផ្តាំទៅប្រជាពលរដ្ឋនៅតំបន់រមណីយដ្ឋានអង្គរ កុំជឿតាមការឃោសនាទាំងនោះ ព្រោះរដ្ឋាភិបាលបានកំណត់ពីសំណងទៅឱ្យប្រជាពលរដ្ឋរួចហើយ ដូច្នេះបើគ្រួសារណាមួយនៅតែមិនព្រមទទួលយកសំណង មុនមានការកំណត់ឱសានវាទមកដល់ទេ ហើយនៅបន្តជឿតាមការញុះញង់របស់អ្នកនយោបាយមួយចំនួននោះ នោះរដ្ឋាភិបាលនឹងឈប់ផ្តល់សំណងឱ្យសូម្បីសេន។
លោក ហ៊ុន សែន បានថ្លែងថា៖ «នេះជាពេលវេលាដែលរាជរដ្ឋាភិបាលកំពុងថ្នាក់ថ្នម ធ្វើហេដ្ឋារចនាសម្ព័ន្ធជូន ប៉ុន្តែតែដល់ពេលវេលាមួយហើយ មិនមែនសុខចិត្តឱ្យអង្គរវត្តត្រូវគេដកចេញពីបេតិកភណ្ឌពិភពលោកទេ គឺច្បាស់ជាដកគ្រួសារ[ពលរដ្ឋដែលរស់នៅខុសច្បាប់ក្នុងតំបន់រមណីយដ្ឋានអង្គរ]ហ្នឹងចេញហើយ។ កុំឃើញនាយករដ្ឋមន្ត្រីទៅនិយាយ ហើយគិតថា ថ្ងៃក្រោយនឹងអាចតថ្លៃបានតម្លៃច្រើនជាងហ្នឹង ដីធំជាងហ្នឹង អត់ទេ! ដីអ្នកទាំងអស់គ្នាអត់មានកម្មសិទ្ធិទេ»។
លោកនាយករដ្ឋមន្រ្តីបន្តថា៖ «ផ្តាំពីនេះទៅឱ្យច្បាស់ តែដល់ពេលគេ[យូនីស្កូ]ចេញមកហើយ សម្ពាធពីអង្គការយូនីស្កូ ដែលទាក់ទងនិងការការពារក្នុងរមណីយដ្ឋានអង្គរត្រូវធ្វើហើយ គឺថាអត់ទេ សូមអញ្ជើញចេញ ដោយមិនបានទទួលសំណងអ្វីទេ ព្រោះសងមុនអត់ព្រមយក…តែយើងអត់ចង់ដើរដល់ហ្នឹងទេ យើងធ្វើតាមដំណាក់ៗ បងប្អូនយល់ប៉ុណ្ណឹង ហើយកុំចាញ់បោកក្រុមបក្សនយោបាយណាថាធានា អត់ធានាទេ»។
វីអូឌី មិនទាន់អាចសុំការឆ្លើយតបជុំវិញករណីនេះពីពលរដ្ឋរស់នៅតំបន់រមណីយដ្ឋានអង្គរ ដែលមិនទាន់បានចាកចេញនៅឡើយ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ចាត់ទុកការថ្លែងរបស់លោកនាយករដ្ឋមន្ត្រីថា ហាក់ដូចជាចាប់បង្ខំឱ្យពលរដ្ឋទទួលយកសំណងតាមការសម្រេចរបស់រដ្ឋាភិបាល ដោយធ្វើឡើងផ្ទុយពីច្បាប់ ហើយអាចធ្វើឱ្យមានបញ្ហាប្រឈមកើតមានឡើងនៅថ្ងៃខាងមុខ បើការសម្រេចនោះ មិនផ្តល់យុត្តិធ៌ដល់ប្រជាពលរដ្ឋរងគ្រោះ។
ករណីនេះ លោក អំ សំអាត អំពាវនាវដល់រដ្ឋាភិបាល ធ្វើការដោះស្រាយសំណងសមរម្យជូនប្រជាពលរដ្ឋរស់នៅតំបន់នោះ ដើម្បីបញ្ជៀសកុំឱ្យមានការបណ្តេញចេញដោយបង្ខំ ទើបជាយុទ្ធសាស្ត្រល្អ រវាងពលរដ្ឋនិងរដ្ឋាភិបាល ។
លោក អំ សំអាត មានប្រសាសន៍ថា៖ «ការចាប់បង្ខំឱ្យចាកចេញ វាស្មើនឹងការបណ្តេញចេញដោយបង្ខំ អីចឹងការបណ្តេញចេញដោយបង្ខំ វាប៉ះពាល់ច្រើនសម្រាប់ជីវភាពរស់នៅរបស់ពួកគាត់ អីចឹងហើយបានយើងជាសង្គមស៊ីវិលអំពាវនាវឱ្យបញ្ឈប់បណ្តេញចេញដោយបង្ខំ។ អីចឹងពាក់ព័ន្ធនឹងការដោះស្រាយទៅលើប្រជាពលរដ្ឋរស់នៅតំបន់អង្គរ ដើម្បីឱ្យមានការទទួលយកបានទាំងអស់គ្នា ដើម្បីបញ្ជៀសនូវការបណ្តេញចេញដោយបង្ខំ ជារឿងល្អ ហើយជាដំណោះស្រាយមួយសមស្រប»។
រដ្ឋាភិបាល កំពុងអភិវឌ្ឍដីឡូត៍នៅតំបន់រុនតាឯក ស្ថិតនៅភូមិតានី ឃុំរុនតាឯក ស្រុកបន្ទាយស្រី ដើម្បីផ្តល់ជូនប្រជាពលរដ្ឋដែលស្ម័គ្រចិត្តរុះរើចេញពីសំណង់ខុសច្បាប់ក្នុងតំបន់រមណីយដ្ឋានអង្គរ ឱ្យទៅរស់នៅទីនោះ ដែលគិតមកដល់ដើមខែតុលានេះ មានប្រមាណជិត ៣ ០០០គ្រួសារ។ នេះបើតាមរបាយការណ៍តួលេខដែលរដ្ឋាភិបាលបានប្រកាសពីចំនួនពលរដ្ឋនៅតំបន់រុនតាឯក ដែលទទួលបានប័ណ្ណក្រីក្រ។
បើតាមរបាយការណ៍របស់ក្រសួងរៀបចំដែនដី ប្រជាពលរដ្ឋដែលស្ម័គ្រចិត្តរុះរើផ្ទះចេញពីតំបន់រមណីយដ្ឋានអង្គរ ទៅកាន់តំបន់រុនតាឯកនោះ ក្នុងមួយគ្រួសារទទួលបានដីទំហំ ២០ម៉ែត្រគុណ៣០ម៉ែត្រ។ ក្រៅពីនោះ ក្រុមការងារបាននិងកំពុងសិក្សាគម្រោងប្លង់អភិវឌ្ឍន៍ភូមិធម្មជាតិរុនតាឯក ដោយបន្ថែមនូវផ្សារ សាលារៀន មន្ទីរពេទ្យ ប្រព័ន្ធទឹក អគ្គិសនី សេវាទូរសព្ទ និងសេវាអ៊ីនធឺណិត ដើម្បីសម្រួលដល់ជីវភាពរស់នៅប្រចាំថ្ងៃរបស់ប្រជាពលរដ្ឋផងដែរ ៕
