ការផ្លាស់ប្តូរអំណាចនយោបាយនៅកម្ពុជា ពីសម័យកាលរបស់អតីតនាយករដ្ឋ​មន្ត្រី ហ៊ុន សែន មកកាន់សម័យកាលរបស់ លោក ហ៊ុន ម៉ាណែត ក្នុងឆ្នាំ​២០២៣ គឺជាចំណុចរបត់ប្រវត្តិសាស្ត្រដែល​នាំមកនូវការសន្យាអំពីការធ្វើទំនើប​កម្មរដ្ឋបាល និងការអភិវឌ្ឍប្រកប​ដោយចីរភាព។

ការផ្លាស់ប្តូរមេដឹកនាំនៅកម្ពុជា កាល​ពី​ខែ​សីហា ឆ្នាំ២០២៣ ដំបូងឡើយត្រូវបានអ្នកសង្កេតការណ៍លោកខាងលិចមើលឃើញ​ក្នុងភាពមិនទុកចិត្ត ដោយគេយល់​​ថា ការឡើងកាន់តំណែងរបស់ លោក ហ៊ុន ម៉ាណែត គ្រាន់​តែ​ជាការផ្លាស់​ប្តូរ​មុខមាត់ថ្មីនៃរបបដែល​បង្កប់ខ្លួនយ៉ាងជ្រៅក្នុងឥទ្ធិពលរបស់​ចិនតែប៉ុណ្ណោះ។

ការផ្ទេរអំណាចពី លោក ហ៊ុន សែន ទៅកាន់លោក ហ៊ុន ម៉ាណែត ធ្លាប់ត្រូវបានគេរំពឹងថានឹងនាំមកនូវរបៀបធ្វើការ​ងារ​បែប​ទំនើប និងវិជ្ជាជីវៈថ្មីសម្រាប់ប្រទេស​កម្ពុជា ប៉ុន្តែព្រឹត្តិការណ៍ឈ្លាន​ពាន​របស់​យោធាថៃក្នុងឆ្នាំ២០២៥ បានក្លាយជាវិញ្ញាសារសាកល្បងសមត្ថ​ភាព​ដ៏ធំសម្រាប់រដ្ឋាភិបាលថ្មី ដោយវាបាន​បកអាក្រាតឱ្យឃើញនូវបញ្ហាស្ថាប័នដ៏រ៉ាំរ៉ៃ នៅ​ក្នុង​ជួរកងយោធពលខេមរភូមិន្ទ។

បើទោះបីការធ្វើសង្គ្រាមឈ្លាន​ពាន​២១​ថ្ងៃ ថៃ​បានដណ្តើមកាន់កាប់ទឹកដីខ្មែរ រហូតដល់៤១ទីតាំងក្តី តែថៃ មិនបញ្ឈប់ត្រឹម​នេះទេ ដោយជាញឹកញាប់ គេសង្កេត​ឃើញ​មានការប៉ះទង្គិចគ្នាដោយពាក្យសម្តី រវាងទាហានខ្មែរនៅជួរមុខ ជាមួយទាហានថៃ ខណៈទាហានថៃព្យាយាមពង្រីកទីតាំងឈរ​ជើង​ចូល​ដី​ខ្មែរ។

ក្នុងបរិបទភូមិសាស្ត្រនយោបាយដែលកាន់តែមានភាពស្មុគស្មាញ នាឆ្នាំ២០២៥ និងឈានចូលឆ្នាំ ២០២៦ ឥរិយាបថការបរទេសរបស់កម្ពុជា បានបង្ហាញនូវភាពផ្ទុយគ្នាស្រឡះ រវាងការប្រើប្រាស់វោហាសាស្ត្រជាតិនិយមរឹងត្អឹងដាក់ថៃ និងការរក្សា​នូវភាពស្ងប់ស្ងាត់ដ៏ហ្មត់ចត់បំផុតជាមួយវៀតណាម។

សង្គមខ្មែរបច្ចុប្បន្នត្រូវបានគេមើលឃើញ​នៅនឹងភ្នែកថា បាននិងកំពុងរួម​រិត​ទៅដោយវិបត្តិចាក់ស្រែស រាប់ចាប់តាំង​ពីអំពើអយុត្តិធម៌ អំពើពុករលួយបក្ខពួកនិយមជាប្រព័ន្ធពេញបន្ទុក ការឈ្លានពានទឹកដីតាមអំពើចិត្តពីថៃ អំពើ​ឆបោកគ្រប់ទម្រង់ ការដាក់ប្រាក់វិនិយោគ​មិនអាចដកប្រាក់បានវិញ ទិញ​ផ្ទះទិញដីបង់ប្រាក់គ្រប់ចំនួន​មិនបានផ្ទះមិនបានដី។