សមាគមគ្រូបង្រៀនកម្ពុជាឯករាជ្យ ស្នើទៅរដ្ឋាភិបាលនិងក្រសួងអប់រំលុបបំបាត់អំពើពុករលួយក្នុងវិស័យអប់រំ និងបញ្ឈប់ការរើសអើង រួមទាំងឈប់បង្ខំលោកគ្រូ-អ្នកគ្រូឱ្យចូលជាសមាជិកគណបក្សនយោបាយនៅតាមគ្រឹះស្ថានសិក្សាបន្តទៀត ដោយថា ករណីទាំងអស់នេះបានធ្វើឱ្យប៉ះពាល់ដល់វិស័យអប់រំ។
គណៈគ្រប់គ្រងថ្នាក់ឧត្ដមសិក្សានៅរាជធានីភ្នំពេញមួយចំនួនអះអាងថា ពួកគេត្រៀមរៀបចំបើកដំណើរការថ្នាក់រៀនឡើងវិញ ក្រោយពិធីបុណ្យភ្ជុំបិណ្ឌចប់រួចរាល់។
មន្ត្រីអប់រំនៅតាមសាលាមួយចំនួនលើកឡើងថា ការបើកដំណើរការរៀននិងបង្រៀននៅតាមសាលាជាថ្មីនេះបានជួយឱ្យសិស្សរៀនពេញលេញជាងរៀនតាមអនឡាញ ខណៈពួកគេកាន់តែមមាញឹកខ្លាំងជាងមុន ដោយសារត្រូវតាមដានសកម្មភាពសិស្សស្ទើរគ្រប់ជំហាន មិនថាក្នុងថ្នាក់និងក្រៅថ្នាក់ ដើម្បីការពារខ្លួនពីជំងឺកូវីដ-១៩។
នៅព្រឹកថ្ងៃនេះក្រសួងអប់រំចេញសេចក្ដីប្រកាសមួយ ដើម្បីបកស្រាយបំភ្លឺដល់មហាជន បន្ទាប់ពីសារព័ត៌មានក្នុងស្រុកមួយចំនួននិងបណ្ដាញសង្គមហ្វេសប៊ុកបានផ្សាយថាការប្រឡងមធ្យមសិក្សាទុតិយភូមិឬបាក់ឌុបនៅឆ្នាំ២០១៦នេះ នឹងប្រព្រឹត្តទៅតែមួយថ្ងៃ។
ក្រសួងអប់រំ យុវជននិងកីឡា ដាក់ចេញនូវគោលនយោបាយអប់រំវិទ្យាសាស្ត្រ បច្ចេកវិទ្យា វិស្វកម្មនិងគណិតវិទ្យា ក្នុងគោល បំណងអភិវឌ្ឍធនធានមនុស្សឲ្យស្របតាមតម្រូវការទីផ្សារការងារទាំងក្នុងស្រុកនិងតំបន់។ក្នុងពិធីបើកសន្និបាតអប់រំ យុវជននិងកីឡា នៅព្រឹកថ្ងៃអង្គារនេះ នៅវិទ្យាស្ថានបច្ចេកវិទ្យាកម្ពុជា ក្រសួងអប់រំបានផ្សព្វផ្សាយគោលនយោបាយអប់រំវិទ្យាសាស្ត្រ បច្ចេកវិទ្យា វិស្វកម្មនិងគណិតវិទ្យារបស់ខ្លួន។ ក្នុងឯកសារគោលនយោបាយនោះ ក្រសួងលើកឡើងថាតម្រូវការអ្នកជំនាញផ្នែកវិទ្យាសាស្ត្រ បច្ចេកវិទ្យានិងគណិតវិទ្យាកាន់តែកើនឡើងខ្ពស់ពីមួយថ្ងៃទៅមួយថ្ងៃ។ ក្រសួងឲ្យដឹងដែរថាអ្នកដែលមានជំនាញផ្នែកវិទ្យាសាស្រ្តអាចរកប្រាក់បៀវត្សបានខ្ពស់និងអត្រាឥតការងាររបស់ពួកគាត់មានកម្រិតទាប។
សមាគមគ្រូបង្រៀនកម្ពុជាឯករាជ្យស្នើរដ្ឋាភិបាលផ្តល់ប្រាក់ឧបត្ថម្ភដល់គ្រូបង្រៀន និងបុគ្គលិកមន្ត្រីរាជការទាំងអស់ម្នាក់១៥០ ០០០រៀលក្នុងឱកាសពិធីបុណ្យចូលឆ្នាំថ្មី ដោយអះអាងថាដើម្បីជួយសម្រួលដល់ការចំណាយរបស់ពួកគាត់នៅក្នុងឱកាសនេះ។
រដ្ឋមន្រ្តីក្រសួងអប់រំ លោក ហង់ ជួន ណារ៉ុន ឲ្យដឹងថាក្រសួងនឹងដាក់បញ្ចូលការសរសេរតាមអានសម្រាប់ការប្រឡងសញ្ញាបត្រឌីប្លូម(ថ្នាក់ទី៩)នៅឆ្នាំ២០១៦នេះ។ក្នុងពេលចូលរួមទិវាជាតិអំណាន១១មីនានេះ លោក ហង់ ជួន ណារ៉ុន មានប្រសាសន៍ថាក្រសួងនឹងចេញសេចក្ដីណែនាំឲ្យមានការបញ្ចូលមុខវិជ្ជាសរសេរតាមអាននិងតែងសេចក្ដីទៅក្នុងការប្រឡងថ្នាក់ទី៩ឆ្នាំនេះនិងដើម្បីពិនិត្យឡើងវិញអំពីចលនាអក្សរសិល្បិ៍ខ្មែរ ដើម្បីឲ្យសិស្សបង្កើនការអានឲ្យបានច្រើន។
ដ្ឋមន្រ្តីក្រសួងអប់រំ យុវជន និងកីឡានិងដៃគូអភិវឌ្ឍន៍មួយចំនួនទៀតគ្រោងរៀបចំឲ្យមានបណ្ណាល័យនិងបន្ទប់អានបន្ថែមនៅតាមសាលារៀននិងសហគមន៍ ដោយថាដើម្បីជំរុញឲ្យប្រជាជនកម្ពុជាមានទម្លាប់អានសៀវភៅដូចទៅនឹងប្រជាជននៅបណ្តាប្រទេសអភិវឌ្ឍន៍នានា។រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន ថ្លែងក្នុងវេទិកាជាតិអំណានលើកទី១នៅសាកលវិទ្យាល័យភូមិន្ទភ្នំពេញនៅថ្ងៃសុក្រនេះថាតាមការស្រាវជ្រាវ ប្រជាពលរដ្ឋកម្ពុជាមិនទាន់មានទម្លាប់ល្អក្នុងការអានសៀវភៅនោះទេ ផ្ទុយពីប្រជាពលរដ្ឋរបស់ប្រទេសរីកចម្រើននានា។
ក្រសួងអប់រំ យុវជន និងកីឡា ណែនាំឲ្យភាគីពាក់ព័ន្ធនិងអាជ្ញាធរខេត្តរៀបចំទិវាជាតិអំណានដែលនឹងប្រព្រឹត្តទៅនៅថ្ងៃទី១១ខែមីនា ខាងមុខនេះ ដោយរៀបចំជាការប្រឡងប្រណាំងអាន។
នៅក្នុងសេចក្តីណែនាំស្តីពីការប្រារព្ធទិវាជាតិអំណាន១១មីនា រដ្ឋមន្រ្តីក្រសួងអប់រំ លោក ហង់ ជួន ណារ៉ុន បានលើកឡើងថាអភិបាលនៃគណៈអភិបាលរាជធានីភ្នំពេញ ខេត្ត អភិបាលនៃគណៈអភិបាលក្រុង ស្រុក ខណ្ឌនិងអាជ្ញាធរដែនដី ត្រូវរៀបចំវេទិកាប្រឡងប្រណាំងអានឬជំរុញគ្រឹះស្ថាននិងអ្នកពាក់ព័ន្ធឲ្យរៀបចំវេទិកាប្រកួតប្រជែងក្នុងការអាន ស្មូតកំណាព្យនិងនិពន្ធនៅតាមទីតាំងសមស្រប ដើម្បីជ្រើសរើសជ័យលាភីនិងជូនរង្វាន់លើកទឹកចិត្តតាមលទ្ធភាព។ លោកបន្តថាមន្ទីរអប់រំ យុវជននិងកីឡា រាជធានីខេត្ត ការិយាល័យអប់រំ គ្រឹះស្ថានសិក្សាគ្រប់កម្រិតទាំងសាធារណៈនិងឯកជនត្រូវរៀបចំប្រារព្ធទិវាជាតិអំណាននៅថ្ងៃសុក្រ ទី១១ខែមីនា។
រដ្ឋមន្រ្ដីក្រសួងអប់រំ យុវជននិងកីឡា បានចេញលិខិតមួយស្នើទៅរដ្ឋមន្រ្ដីក្រសួងសេដ្ឋកិច្ចនិងហិរញ្ញវត្ថុ ពិចារណាបង្កើតមូលនិធិអាហារូបករណ៍សម្រាប់សិស្ស និសិត្សទៅសិក្សានៅបរទេស។ លិខិតចុះថ្ងៃទី២៩ ខែ កុម្ភៈបានឲ្យដឹងថាក្រសួងអប់រំយុវជននិងកីឡាកំពុងមានមានគម្រោងផ្ដល់មូលនិធិសម្រាប់សិស្ស និសិត្សទៅសិក្សានៅក្រៅប្រទេស ស្របនឹងគោលនយោបាយកំណែទម្រង់វិស័យអប់រំនៅកម្ពុជាក្នុងការអភិវឌ្ឍធនធានមនុស្សតាមរយៈការប្រឡងថ្នាក់ជាតិ ឲ្យទទួលបានអាហារូបករណ៍សម្រាប់ទៅសិក្សាកម្រិតបរិញ្ញាបត្រ បរិញ្ញាបត្រជាន់ខ្ពស់និងបណ្ឌិត នៅតាមសាកលវិទ្យាល័យល្បីៗនៃបណ្ដាប្រទេសអភិវឌ្ឍន៍។ លិខិតបានបន្ដថាក្រសួងមានគោលដៅបង្កើតមូលនិធិអាហារូបករណ៍សម្រាប់សិស្ស និសិត្ស ទៅសិក្សានៅបរទេសនិងមានភាពជឿជាក់ថាមូលនិធិនេះនឹងផ្ដល់ឱកាសដល់ប្រទេសកម្ពុជាក្នុងការពង្រីកវិសាលភាពនៃការប្រគួតប្រជែងរបស់ខ្លួន នៅក្នុងបរិបទនៃសមាហរណកម្មតំបន់និងសកលភាវូបនីយកម្ម។ រដ្ឋមន្រ្តីក្រសួងអប់រំ លោក ហង់ ជួន ណារ៉ុន ប្រាប់វីអូឌីថានិស្សិតដែលត្រូវបានផ្តល់អាហារូករណ៍ទៅសិក្សានៅក្រៅប្រទេសនឹងចុះកិច្ចព្រមព្រៀងជាមួយរដ្ឋាភិបាលថានឹងធ្វើការងារជាគ្រូបង្រៀនឬបម្រើការងារឲ្យស្ថាប័នរបស់រដ្ឋ ពេលត្រឡប់មកវិញ។ លោកបន្តថានិស្សិតដែលនឹងត្រូវជ្រើសរើសនោះគឺជាសិស្សពូកែប្រចាំសាលា។ លោករដ្ឋមន្រ្តីមិនទាន់អាចបញ្ជាក់លម្អិតនៅឡើយទេ ដោយលោកថារង់ចាំការពិចារណារបស់រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុចំពោះសំណើនេះជាមុនសិន។ វីអូឌីមិនទាន់អាចទាក់ទងរដ្ឋមន្រ្តីក្រសួងសេដ្ឋកិច្ចបាននៅឡើយទេ៕
VOD គឺជាស្ថាប័នព័ត៌មានឯករាជ្យដែលផ្តល់ព័ត៌មាន ផលិតកម្មវិធីវិទ្យុ និងការផ្សព្វផ្សាយតាមរយៈគេហទំព័រអ៊ីនធើណេត។
© ២០២២ រក្សាសិទ្ធិគ្រប់យ៉ាងដោយ ស៊ីស៊ីអាយអឹម
