រថយន្តក្រុងមួយដឹកនិស្សិតសាកលវិទ្យាល័យចម្រុះជាតិសាសន៍បានជួបគ្រោះថ្នាក់កាលពីថ្ងៃអាទិត្យនៅលើផ្លូវហាយវេមួយក្នុងប្រទេសអេស្ប៉ាញ ដោយបានសម្លាប់អ្នកដំណើរយ៉ាងហោចណាស់១៣នាក់ និង៣៤នាក់ផ្សេងទៀតបានរងរបួស។
បណ្ដាញផ្សាយព័ត៌មាន BBC បានរាយការណ៍ថា រថយន្តក្រុងដែលបានជួបគ្រោះថ្នាក់នោះមានដឹកមនុស្ស៥៧នាក់ ដោយភាគច្រើនជានិស្សិតអន្តរជាតិ (Exchange Students) មកពីប្រទេសផ្សេងដោយពួកកំពុងធ្វើដំណើរប្រឡប់ពីចូលរួមពិធីបុណ្យបាញ់កាំជ្រួចមួយរបស់អេស្ប៉ាញ។
អាជ្ញាធរមូលដ្ឋានបានឲ្យដឹងថា ជនរងគ្រោះទាំងអស់ដែលបានស្លាប់គឺជានិស្សិតស្រី ក៏ប៉ុន្តែគេនៅមិនទាន់បានបញ្ជាក់ពីសញ្ជាតិរបស់ពួកគេនៅឡើយទេ។
និស្សិតដែលជិះនៅលើរថយន្តនោះមានមកពីប្រទេសអង់គ្លេស ហុងគ្រី អាល្លឺម៉ង់ ស៊ុយអែត ន័រវេស ស្វ៊ីស សាធារណរដ្ឋឆែក ញូវហ្សេឡែន ប្រទេសអ៊ីតាលី ប្រទេសប៉េរូ ប៊ុលហ្គារី ប្រទេសប៉ូឡូញ អៀរឡង់ ប៉ាឡេស្ទីន ជប៉ុន និងអ៊ុយក្រែន។
គ្រោះថ្នាក់នោះបានកើតឡើងតំបន់Freginals នៅពាក់កណ្ដាលទីក្រុង Valencia និងBarcelona។ ទីតាំងដែលរថយន្តនោះបានជួបគ្រោះថ្នាក់នោះត្រូវបានគេស្គាល់ថាជាកន្លែងដែលមានគ្រោះថ្នាក់ញឹកញាប់។
អាជ្ញាធរអេស្ប៉ាញនៅមិនទាន់អាចបញ្ជាក់ពីមូលហេតុដែលនាំឲ្យមានគ្រោះថ្នាក់នេះបាននៅឡើយទេ ដោយគ្រាន់តែបញ្ជាក់ថា ស្ថានភាពផ្លូវស្ថិតនៅក្នុងលក្ខណៈល្អពេលដែលគ្រោះថ្នាក់នោះកើតឡើង ហើយអ្នកបើកបររថយន្តនោះត្រូវគេពិនិត្យឃើញថាមិនស្រវឹង ឬប្រើប្រាស់គ្រឿងញៀននោះទេ។
ប្រភព៖ BBC និង Reuters
