អ្នកច្បាប់មួយចំនួនបង្ហាញការយល់ឃើញប្រហាក់ប្រហែលគ្នាថាចំណាត់ការនានារបស់ស្ថាប័នរដ្ឋទៅលើមេដឹកនាំបក្សប្រឆាំងពួកគេថាហាក់ពិបាកយល់ដោយអះអាងថាការអនុវត្តច្បាប់ច្រើនធ្វើឡើងទៅតាមការបកស្រាយ។
ការលើកឡើងនេះធ្វើឡើងបន្ទាប់ពីមាននិស្សិតមួយក្រុមដែលអះអាងថាមិនជាប់ពាក់ព័ន្ធនឹងរឿងនយោបាយបានដាក់ញត្តិទៅរដ្ឋសភានិងពាក្យបណ្តឹងទៅអង្គភាពប្រឆាំងអំពើពុករលួយប្តឹងប្រធានស្តីទីគណបក្សសង្គ្រោះជាតិលោក កឹម សុខា ដោយពួកគេចោទថាមេដឹកនាំបក្សប្រឆាំងរូបនោះមានស្នេហាលួចលាក់និងជាប់ពាក់ព័ន្ធនឹងអំពើពុករលួយសំអាងទៅលើខ្សែអាត់សំឡេងសន្ទនាតាមទូរស័ព្ទដែលគេបានបញ្ចេញតាមបណ្តាញសង្គម។
បណ្តឹងនោះក្រុមនិស្សិតបានសំអាងលើខ្សែអាត់សំឡេងបែកធ្លាយមួយដែលគេយកមកបង្ហោះតាមបណ្តាញសង្គមដោយចោទថាជាសំឡេងលោក កឹម សុខា សន្ទនាស្នេហាលួចលាក់ជាមួយនារីវ័យអាយុ២៥ឆ្នាំម្នាក់និងសន្យាទិញផ្ទះនិងដីឲ្យ។
ពាក្យបណ្តឹងរបស់ក្រុមនិស្សិតនោះហាក់មានប្រសិទ្ធិភាពដោយគេសង្គេតឃើញរដ្ឋសភាបានចេញលិខិតឲ្យលោក កឹម សុខា បកស្រាយទៅនឹងការទាមទាររបស់ក្រុមនិស្សិត។
រីឯអង្គភាពប្រឆាំងអំពើពុករលួយបានអនុញ្ញាតឲ្យក្រុមនិស្សិតទាំងនោះមកស្តាប់ការពន្យល់នៅស្នាក់ការរបស់ខ្លួនថាតើគួរចាត់វិធានការទៅលើពាក្យបណ្តឹងនោះឬក៏យ៉ាងណា។
មេធាវីនិងជាសាស្ត្រាចារ្យបង្រៀនច្បាប់លោក ស សូវាន ពន្យល់ថាមេដឹកនាំនៅបណ្តាលប្រទេសមួយចំនួនលើពិភពលោក ដូចជាប្រទេសបារាំងនិងប្រទេសអង់គ្លេសក៏ធ្លាប់មានអាស្រូវផ្លូវភេទជាមួយលេខារបស់ខ្លួនដែរ។
មេធាវីរូបនោះបន្តថាក្រោយពីបែកធ្លាយរឿងអាស្រូវផ្លូវភេទនេះមេដឹកនាំខ្លះសម្រេចចុះចេញពីតំណែងនិងមេដឹកនាំខ្លះទៀតមិនប្រឈមនឹងផ្លូវច្បាប់ទេអាស្រ័យលើច្បាប់នៃប្រទេសរបស់ពួកគេដែលបានចងក្រងឡើង។
ប៉ុន្តែលោក ស សូវាន ពន្យល់ទៀតថាការទៅមានស្នេហាលួចលាក់ដោយស្ម័គ្គចិត្តលោកថានៅកម្ពុជាគ្មានច្បាប់សម្រាប់ដាក់ទោសទណ្ឌទេ។ ប៉ុន្តែលោកថាការអនុវត្តច្បាប់នៅកម្ពុជាធ្វើឡើងតាមការបកស្រាយដែលលោកថាករណីនេះ ជាការពិបាកយល់នៅកម្ពុជា។
លោក ស សូវាន ឲ្យដឹងទៀតថាករណីចោទប្រកាន់លោក កឹម សុខា វិញលោកថាព្រះរាជអាជ្ញាទេដែលត្រូវសកម្មមុន និស្សិតដើម្បីស្វែងរកមុខអ្នកដែលលួចបញ្ចេញសំឡេងរំលោភលើសិទ្ធិបុគ្គលនោះមកផ្តន្ទាទោសទើបអាចឈានទៅចាត់វិធានការលើលោក កឹម សុខា បាន។
លោកថា៖ “ច្បាប់ហ្នឹងខ្ញុំមិនចង់និយាយទេនៅស្រុកខ្មែវាទៅជាគ្រូទាយបើច្បាប់ខ្ញុំជម្រាបគឺត្រូវលោកព្រះរាជអាជ្ញានេះដែលខ្លួនទទួលខុសត្រូវសណ្តាប់ធ្លាប់សាធារណៈនេះវែកមុខថាអ្នកណាទៅផ្សាយអារឿងអាថកំបាំងតេលេហ្វូនអីហ្នឹង។ ព្រះរាជអាជ្ញាហ្នឹងអត់ធ្វើការអីទាំងអស់ឲ្យគាត់ធ្វើការបន្តិចមើលអាហ្នឹងបានថារកអ្នកផ្សព្វផ្សាយហ្នឹងហើយ ថាអ្នកឯងមានសិទ្ធិអីទៅផ្សាយរឿងអាថកំបាំងរបស់គេទោះបីមន្ត្រីថ្នាក់គណបក្សណាក៏ដោយរឿងឯកជនរបស់គេយើងទៅស្ទាក់ហែកហួរ របស់គេវាអត់ត្រូវច្បាប់។ ដល់អត់ត្រូវច្បាប់ត្រូវអ្នកហ្នឹងទទួលខុសត្រូវសិនបានទៅសួរគេថាមែនមិនមែននោះ”។
លោក ស សូវាន ឲ្យដឹងទៀតថាករណីចោទប្រកាន់ថាពុករលួយវិញលោកពន្យល់ថា បើមេដឹកនាំបក្សប្រឆាំងរូបនោះ ប្រើប្រាស់ទ្រព្យសម្បត្តិផ្លាល់ខ្លួនចំណាយលើស្រីស្នេហ៍ដូចការចោទប្រកាន់ លោកថាមិនមែនក្រុមនិស្សិតជាអ្នកចេញមុខទេ លោកថាគឺក្រុមគ្រួសាលោក កឹម សុខា ទេដែលមានសិទ្ធិចេញមុខប្តឹង។
លោកបន្តថា៖ “គេចោទគាត់ថាយកលុយទៅឲ្យស្រីហ្នឹងវាមានតែប្រពន្ធគាត់គេ គាត់ប្តឹងគាត់ផ្តល់ បើប្រពន្ធគេមិនប្តឹងយើងទៅឈឺក្បាលអី។ គាត់យកលុយប្រាក់ខែគាត់៣ឬ៤ពាន់ហ្នឹង(ដុល្លារ)ខ្ញុំមិនដឹងប្រាក់ខែគាត់ប៉ុន្មានទេតំណាងរាស្ត្រគាត់ហ្នឹង ហើយគាត់ប្រធានស្អីៗ ហើយបើគាត់យកលុយគណបក្សគាត់អាហ្នឹងគេរករឿងហើយ”។
មេធាវីម្នាក់ទៀតគឺលោក គីម សុជាតិ ពន្យល់ផ្លូវច្បាប់ថាស្នេហាគ្មានការដាក់សម្ពាធដើម្បីបង្ខិតបង្ខំមិនស្ថិតក្នុងយុត្ថាធិការផ្លូវច្បាប់ទេ ប៉ុន្តែលោកថាជាកំហុសផ្នែកសីលធម៌។
លោកបន្ថែមថា៖ “ពាក់ព័ន្ធទៅនឹងវប្បធម៌ប្រពៃណីអាហ្នឹងមិនជាប់ពាក់ព័ន្ធនឹងផ្លូវច្បាប់ទេមានន័យថាទំនៀមទម្លាប់យ៉ាងម៉េច យ៉ាងច្រើនខុសប្រពៃណីខុសបញ្ហាសង្គមតែប៉ុណ្ណឹងទេ ហើយទុកឲ្យសង្គមឬក៏អ្នកដទៃហ្នឹងគេវាយតម្លៃទៅ អាហ្នឹងពាក់ព័ន្ធចំនុចទី១។ ចំនុចទី២ ទាក់ព័ន្ធនឹងវិធានការផ្លូវច្បាប់មានអំពើពុករលួយជាអាថបាទ ខ្ញុំគិតថាវិធានការផ្លូវច្បាប់គួរតែមាន ប៉ុន្តែលុះត្រាតែមានតម្រុយដែលអាចសន្មត់ថាសកម្មភាពហ្នឹងវាជាសកម្មភាពខុសច្បាប់ដែលច្បាប់ការពារ អាហ្នឹងបើសកម្មភាពឃើញអញ្ចឹងវាមិនខុសទេ ប៉ុន្តែក្លាចថាអត់មានតម្រុយអីឭតែព័ត៌មានដែលមិនគិតថាវាជាអំពើល្មើសកើតឡើង វាជារឿងខ្ញុំមិនខាំមិនទៅលើហ្នឹងទេអាហ្នឹងរឿងនយោបាយរឿងអីទុកឲ្យគេទៅ”។
អ្នកគ្រប់គ្រងបច្ចេកទេសស៊ើបអង្កេតនិងជាអ្នកប្រឹក្សាច្បាប់នៅអង្គការលីកាដូលោក អំ សំអាត លើកឡើងថាវិធានការនេះ លោកថាជារឿងនយោបាយច្រើនជាងដោយលោកអះអាងថាមានមន្ត្រីច្រើនទៀតដែលមានដីស្ទើគ្រប់ខេត្តមានវីឡារាប់មិនអស់ដែលលោកថាអង្គភាពនេះមិនបានបើកការស៊ើបអង្កេត។
មន្ត្រីសង្គមស៊ីវិលរូបនោះបន្តថាមេដឹកនាំបក្សប្រឆាំងរូបនោះនឹងមិនជាប់ពាក់ព័ន្ធនឹងបទចោទទេ បើមិនបានយកថវិកាជាតិមកប្រើប្រាស់ក្នុងករណីចោទប្រកាន់នេះ។
លោកថា៖ “អំពើពុករលួយទាល់តែកិបកេងផលប្រយោជន៍ជាតិយកលុយជាតិទៅធ្វើជាប្រយោជន៍ឯកជន។ តែបើលុយរបស់គាត់ចង់ទិញ១០០វិឡាក៏ទិញទៅវាមិនពាក់ព័ន្ធអីនឹងអំពើពុករលួយទេឲ្យតែលុយដែលគាត់ទិញហ្នឹងជាលុយស្របច្បាប់ មិនប៉ះពាល់ដល់ការកឹមកេងថវិកាជាតិយកមកទិញ”។
យ៉ាងណាក៏ដោយអ្នកតាមដានសង្គមយល់ថាវិធានការទៅលើមន្ត្រីបក្សប្រឆាំងពួកគេថាជាឆាកល្ខោននយោបាយមានអ្នកដឹកនាំរឿងជាមនុស្សដដែលៗដែលពួកគេថាដើម្បីបន្សាបឥទ្ធិពលបក្សប្រឆាំង។
ប៉ុន្តែពួកគេថាឆាកល្ខោននេះនឹងធ្វើឲ្យបក្សប្រឆាំងកើនប្រជាប្រិយភាពកាន់តែខ្លាំងបើពលរដ្ឋភាគច្រើនចេះតាមដានពីទង្វើរបស់អ្នកនយោបាយ៕