លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានថ្លែងថាប្រជាពលរដ្ឋបានទទួលផលប្រយោជន៍ពីគណបក្សប្រជាជនកម្ពុជា ក្រោមការដឹកនាំរបស់រូបលោក តែលោកថាពលរដ្ឋមិនពេញចិត្តនឹងមន្រ្តីថ្នាក់ក្រោមមួយចំនួន។
ក្នុងពិធីសម្ពោធដាក់ឲ្យប្រើប្រាស់អគាររដ្ឋបាលថ្មីរបស់សាលារាជធានីភ្នំពេញ លោក ហ៊ុន សែន បានបញ្ជាឲ្យមន្រ្តីថ្នាក់ក្រោមបំពេញសេវាតម្រូវការឲ្យបានឆាប់រហ័ស។ លោកបានបន្ទោសមន្រ្តីថ្នាក់ក្រោមថាធ្វើឲ្យប្រជាពលរដ្ឋថ្នាំថ្នាក់។ លោកបញ្ជាក់ថាប្រជាពលរដ្ឋទទួលបានផលប្រយោជន៍ពីសុខសន្តិភាព ពីហេដ្ឋារចនាសម្ព័ន្ធនិងមុខរបរដែលរដ្ឋបង្កើតបាន ប៉ុន្តែលោកថាពលរដ្ឋមិនសប្បាយនឹងមន្រ្តីមួយចំនួន។
លោកមានប្រសាសន៍ថា៖ “ប្រជាពលរដ្ឋទទួលផលប្រយោជន៍ធំណាស់ ពីការដឹកនាំរបស់គណបក្សប្រជាកម្ពុជាំ ពីការដឹកនាំរបស់រដ្ឋាភិបាល ដែលដឹកនាំដោយ ហ៊ុន សែនផ្ទាល់ ប៉ុន្តែប្រជាពលរដ្ឋមិនសប្បាយចិត្តជាមួយនឹងអំពើខ្លះដែលមន្រ្តីថ្នាក់ក្រោមរបស់យើងធ្វើមិនបានល្អ ដែលនាំទៅដល់ខឹងគោ វាយរទេះតែម្តង។ កុំបានកន្លែងធ្វើការល្អហើយ មិនព្រមទៅមើលប្រជាជន ក្រវ៉ាត់តែក ត្រង់ផ្លូវ យ៉ាងម៉េច លូស្ទះយ៉ាងម៉េច សំរាមស្ទះយ៉ាងម៉េច អញមិនដឹង អញដឹងថាអាទិត្យទីបីបើកប្រាក់ខែម្មង”។
លោក ហ៊ុន សែន បានថ្លែងបន្តថាលោកមិនបានក្តោបអំណាយក្នុងដៃតែម្នាក់ឯងហើយថាលោកក៏មិនដែលបានបំពានការងាររបស់រដ្ឋមន្រ្តីនៅក្រោមឱវាទនោះទេ។ លោកបានច្រានចោលការលើកឡើងការរិះគន់នេះ ដោយលោកថាលោកមិនដែលបំពានការងាររដ្ឋមន្រ្តីនោះទេ ប៉ុន្តែលោកថាលោកសូមឲ្យតែរដ្ឋមន្រ្តីធ្វើទៅតាមច្បាប់ដែលបានកំណត់។ លោកមានប្រសាសន៍ថា៖ “ខ្ញុំមិនដែលទៅបំពានជាមួយនឹងកិច្ចការរដ្ឋមន្រ្តីណាមួយទេ សុំតែរដ្ឋមន្រ្តីហ្នឹងធ្វើឲ្យត្រូវទៅតាមច្បាប់ដែលបានកំណត់តែប៉ុណ្ណឹង”។
លោកនាយករដ្ឋមន្រ្តីបានថ្លែងបែបនេះ ស្របពេលដែលលោកបានស្នើឲ្យមានការរុះរើគណៈរដ្ឋមន្រ្តី ហើយរដ្ឋសភាបានអនុម័តកាលពីថ្ងៃចន្ទ។ លោកបញ្ជាក់ថានៅសល់រយៈពេលប្រមាណពីរឆ្នាំកន្លះទៀត ដែលរដ្ឋមន្រ្តីត្រូវធ្វើការសម្រាប់ប្រជាពលរដ្ឋ ហើយលោកសង្ឃឹមថានឹងមិនមានការរុះរើគណៈរដ្ឋមន្រ្តីម្តងទៀតនោះទេ។
កម្ពុជាត្រូវបានជនបរទេសស្គាល់ថាឆ្លងកាត់របបសម្លាប់រង្គាលប៉ុលពតនិងដឹកនាំដោយលោក ហ៊ុន សែន ដែលគេហៅថាបុរសខ្លាំង។ លោក ហ៊ុន សែន បានកាន់អំណាចជានាយករដ្ឋមន្រ្តីជាង៣២ឆ្នាំមកហើយ។អង្គការឃ្លាំមើលសិទ្ធិមនុស្សអន្តរជាតិ(Human Rights Watch)កាលពីខែមករា ឆ្នាំ២០១៥ បានចេញរបាយការណ៍មួយកម្រាស់ជាង៧០ទំព័រដែលនិយាយពីការដឹកនាំរបស់លោកនាយករដ្ឋមន្រ្តី ហ៊ុន សែន ដោយបានចាត់ទុកការដឹកនាំ៣០ឆ្នាំរបស់លោក ហ៊ុន សែន ពោរពេញទៅដោយហិង្សា ការគាបសង្កត់ និងអំពើពុករលួយ។
កន្លងទៅ មេដឹកនាំគណបក្សប្រឆាំងបានហៅការដឹកនាំរបស់លោក ហ៊ុន សែន បែបកុម្មុយនីស្តនិងរិះគន់ថាមិនមានការគោរពសិទ្ធិមនុស្សនិងដើរតាមលទ្ធិប្រជាធិបតេយ្យ។ បញ្ហារំលោភសិទ្ធិមនុស្ស ការបណ្តេញចេញ បញ្ហាដីធ្លី ឃាតកម្មលើសកម្មជន ការបំបិទសិទ្ធិសេរីភាពអ្នកនយោបាយ សកម្មជនបក្សប្រឆាំង និងអំពើពុករលួយ ត្រូវបានចុះផ្សាយជាបន្តបន្ទាប់នៅលើទំព័រកាសែតទាំងក្នុងស្រុកនិងអន្តរជាតិមួយចំនួន៕
