រដ្ឋាភិបាលអះអាងថាការតាក់តែងក្រមបរិស្ថានដើម្បីការពារព្រៃឈើ

មន្រ្តីក្រសួងបរិស្ថានអះអាងថាការតាក់តែងក្រមបរិស្ថានគឺដើម្បីជួយទប់ស្កាត់ការ​កាប់បំផ្លាញព្រៃឈើដែលកន្លងទៅនេះមានក្រសួងច្រើនពេកជាអ្នកទទួលទទួលខុសត្រូវ។

ការលើកឡើងបែបនេះនៅក្នុងសិក្ខា​សាលាមួយស្ដីពី​សេចក្ដី​ព្រាងក្រមបរិស្ថានលើកដំបូងកាលថ្ងៃ​ទី០៦ខែមេសាដែលរៀបចំឡើងដោយក្រសួងបរិស្ថាននិងក្រុមមេធាវីវិស្ណុម។​

ទីប្រឹក្សារដ្ឋមន្រ្តីក្រសួង​បរិស្ថាននិងជាប្រធានក្រុម​ការងារ​បច្ចេកទេសតាក់តែងក្រមបរិស្ថានលោក ឯ វុឌ្ឍី មាន​ប្រសាសន៍ថា ការ​​ធ្វើ​ក្រមនេះគឺដើម្បីការពារផលប៉ះពាល់​លើ​​ធន​ធានធម្ម​ជាតិឲ្យមានប្រសិទ្ធិភាពខ្ពស់។ លោកបន្ថែមថា​ក្រមនេះគឺជា​ការប្រមូលផ្ដុំ​នូវច្បាប់​ពាក់ព័ន្ធដែលមាន​នៅក្នុង​ក្រសួងនានាដើម្បីយកមក​អនុវត្ត​ឲ្យបានតឹងរឹងជាពិសេសការការពារព្រៃឈើក្នុងតំបន់អភិរក្សទាំង៥។

លោកបន្ថែមថា៖ “ច្បាប់ខ្លះនៅក្នុងក្រសួងកសិកម្ម ច្បាប់ខ្លះជារបស់ក្រសួងបរិស្ថាន ច្បាប់ខ្លះរបស់​ក្រសួងធនធានទឹក ឧស្សាហកម្មឬក៏រ៉ែជាដើម ដល់ពេលច្បាប់ច្រើនចឹងទៅពេលខ្លះសមត្ថកិច្ចនៃការ​អនុវត្តហ្នឹងវាមានការប្រទាំងប្រទាស់គ្នាមួយចំនួន។ មានន័យថាយើងចែកអត់ដាច់ពីភារកិច្ចនិងតួនាទី​របស់ស្ថាប័ននីមួយៗអញ្ចឹងកន្លែងខ្លះធ្វើឲ្យការអនុវត្តភារកិច្ចជាក់ស្ដែងស្របតាមច្បាប់ដែលមានកន្លងមកមិនមានប្រសិទ្ធិភាព។ អញ្ចឹងគោលដៅដែលយើងធ្វើក្រមហ្នឹងប្រមូលចង់ក្រងច្បាប់ទាំងអស់ធ្វើ​សមាហរណកម្មច្បាប់ទាំងអស់ហ្នឹងប្រមូលមកក្នុងកញ្ចប់តែមួយ​”។  

ទីប្រឹក្សាច្បាប់នៃក្រុមមេធាវីវិស្ណុលោក ប្រាយអិន រ៉ូហាន មានប្រសាសន៍ថាបើទោះបីជាធនធាន​ធម្មជាតិមានការប្រឈមខ្លាំង​ ដូចជាការកាប់បំផ្លាញព្រៃឈើ ក៏ក្រមបរិស្ថាននេះមិន​យឺតពេលទេ​ក្នុងការ​ការពារ។ លោកបន្ថែមថាក្រមនេះក៏ជាយន្តការមួយសំខាន់ក្នុងការការពារព្រៃឡង់និងព្រៃផ្សេងៗ​ទៀត​ឲ្យបានគង់វង្សទៅថ្ងៃអនាគត។

លោកមានប្រសាសន៍៖ “យើងចាប់ផ្ដើមយន្តការថ្មីដើម្បីការពារព្រៃឡង់និងព្រៃផ្សេងៗដែលមាន​សារៈសំខាន់នៅស្រុកខ្មែរវាមានភាពស្មុគស្មាញនៅថ្ងៃអនាគតយើងសង្ឃឹមយ៉ាងខ្លាំងៗដើម្បីការពារ​ព្រៃឈើ​សម្រាប់កូនចៅទៀត”។

នាយកអង្គការក្រុមកិច្ចការពិសេសសិទ្ធិមនុស្សកម្ពុជាលោក អ៊ូច ឡេង សាទរចំពោះការផ្តួចផ្ដើម​បង្កើតឲ្យមានក្រមបរិស្ថាននេះឡើងដើម្បីការពារព្រៃឈើ។  ប៉ុន្តែលោកថាដើម្បីការពារព្រៃឈើ​ឲ្យបានគង់​វង្សលុះតែមានការ​ប្ដេជ្ញាចិត្តពីរដ្ឋាភិបាលនិង ភាគីពាក់ព័ន្ធក្នុងការអនុវត្តច្បាប់ទាំងនោះ។

លោកបន្ថែមថា​៖ “រឿងគិតតែច្បាប់ហើយច្បាប់មានតែនៅលើក្រដាសហើយមិនមានការអនុវត្ត​អាហ្នឹងក៏មិនមានប្រសិទ្ធភាពដែរ។ សំខាន់គឺឆន្ទៈរបស់រដ្ឋាភិបាលលោកចង់ការពារព្រៃឬយ៉ាងណាឬក៏​ចង់ធ្វើតែច្បាប់ទេយើងក៏មានច្បាប់ព្រៃឈើហើយ រហូតដល់មានបទបញ្ជាពីនាយករដ្ឋមន្រ្តីតែទី​បំផុត​ឧកញ៉ាដែលរកស៊ីឈើនៅតែបន្តការរកស៊ីដដែលហើយមិនទាន់ឃើញមា​ន​ឧកញ៉ាណាមួយត្រូវបាន​ផ្តន្ទាទោសទាល់តែសោះ”។

កាលពីពេលថ្មីៗនេះសកម្មជនការពារព្រៃឡង់បានចេញសេចក្ដីថ្លែងការណ៍ស្នើ​ឲ្យរដ្ឋា​ភិបាលបិទការទិញលក់​ឈើទាំងស្រប​ច្បាប់និង​ខុសច្បាប់នៅតំបន់ព្រៃឡង់ ហើយស្នើឲ្យស៊ើបអង្កេតអ្នក​នៅពីក្រោយ​បទល្មើស​ព្រៃឈើនិង​ស្នើ​ឲ្យរដ្ឋាភិបាលសហការជាមួយ​បណ្តាញការពារសហគមន៍ព្រៃឡង់​ដែលបានបង្កើត​ឡើងតាំងពីឆ្នាំ១៩៩៩​មកនោះ។

បើតាមសេចក្តីថ្លែងការណ៍ក្នុងយុទ្ធនាការ​បង្រ្កាបបទល្មើសព្រឈើនៅតំបន់ព្រៃឡង់ចំនួន៥លើក​នេះក្រុម​យុវជនចាប់បានរណារយន្ត៣៥គ្រឿងនិងបានឃើញគំនរឈើជាច្រើនម៉ែត្រគូបដែល​ត្រូវបាន​កាប់​បំផ្លាញ ខណៈនោះសកម្មនារីម្នាក់ដែលដើរល្បាតព្រៃឡង់ត្រូវបានជនល្មើសលបកាប់បណ្តាល​ឲ្យរបួសធ្ងន់៕