ចំនួនអ្នកស្លាប់ដោយសារបំផ្ទុះភ្នំភ្លើងនៅភាគខាងលិចនៃប្រទេសឥណ្ឌូណេស៊ីបានកើនឡើងដល់៦នាក់ហើយ ខណៈដែលមានក្ដីបារម្ភថា អាចមានមនុស្សកាន់តែច្រើននាក់ទៀតជាប់នៅក្នុងផេះភ្នំភ្លើងដ៏ក្ដៅនោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីមន្ត្រីនៃប្រទេសឥណ្ឌូណេស៊ី។
លោក Sutopo Purwo Nugroho អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយបាននិយាយថាមនុស្ស៣នាក់ ក៏កំពុងស្ថិតក្នុងសភាធ្ងន់ធ្ងរផងដែរ បន្ទាប់ពីភ្នំភ្លើង Sinabung នៅលើកោះសូម៉ាត្រាបានបញ្ចេញកំអ៊ែលថ្មីៗកាលពីរសៀលថ្ងៃសៅរ៍កន្លងមកនេះ។
មន្ត្រីរូបនេះបានឲ្យដឹងថាមនុស្ស៩នាក់បានរងគ្រោះដោយសារផេះក្ដៅ ខណៈមនុស្ស៦នាក់បានស្លាប់ ហើយមនុស្ស៣នាក់ទៀតស្ថិតក្នុងសភាពធ្ងន់ធ្ងរដោយសាររលាកភ្លើង។
ជនរងគ្រោះទាំងនោះសុទ្ធតែជាប្រជាពលរដ្ឋធ្វើស្រែចម្ការនៅតំបន់ «ក្រហម» ពោលគឺជាតំបន់ស្ថិតនៅចម្ងាយ ៤គីឡូម៉ែត្រពីភ្នំភ្លើង Sinabung។ តំបន់ក្រហមនោះគឺជាតំបន់ដែលរដ្ឋាភិបាលឥណ្ឌូណេស៊ីប្រកាសឲ្យពលរដ្ឋចាកចេញក្រោមហេតុផលសុវត្ថិភាព។
លោក Sutopo បាននិយាយថារលកហ្គាសនិងថ្មក្រៅដែលបានធ្លាក់ចុះមកយ៉ាងលឿននោះអាចមានកម្ដៅដល់ទៅ៧០០សង្សារ។
ក្រុមអ្នកស្វែងរកនិងជួយសង្គ្រោះកំពុងត្រួតពិនិត្យយ៉ាងប្រុងប្រយ័ត្នតនៅតាមលំនៅដ្ឋាននិងស្រែចម្ការនៅភូមិ Gamber ជាទីដែលអ្នកភូមិត្រូវបានគេបញ្ជាឲ្យចាកចេញកាលពីចុងឆ្នាំ២០០៤ ដោយសារតែហានិភ័យកើតចេញពីលំហូរកំអ៊ែលភ្នំភ្លើងនិងដុំថ្ម។
Sinabung គឺជាភ្នំភ្លើងមួយក្នុងចំណោមភ្នំភ្លើង១២៩ដែលកំពុងសកម្មភាពនៅឥណ្ឌូណេស៊ីតម្រៀបតគ្នាដល់មហាសមុទ្រប៉ាស៊ីហ្វិក៕