ចិន​ព្រមាន​អូបាម៉ា​កុំឲ្យផ្តើម​ផ្ទុះអាវុធនៅអាស៊ី

(រូបភាពពី washingtonpost)

ទីក្រុងប៉េកាំងកាលពីថ្ងៃអង្គារម្សិលមិញបានព្រមានប្រធានាធិបតីអាមេរិកលោក បារ៉ាក់ អូបាម៉ា កុំឲ្យចាប់ផ្តើមធ្វើឲ្យមានការផ្ទុះអាវុធនៅទ្វីបអាស៊ី បន្ទាប់ពីអាមេរិកប្រកាសលប់ចោលបំរាមលក់អាវុធឲ្យប្រទេសវៀតណាម។

កាលពីថ្ងៃចន្ទក្នុងដំណើរទស្សនកិច្ចទៅវៀតណាមលោក អូបាម៉ា បានប្រកាសជាប្រវត្តិសាស្ត្រពីការជួយឲ្យវៀតណាមរីកចម្រើននិងដកបំរាមលក់អាវុធឲ្យប្រទេសនេះ។ លោក អូបាម៉ា និងវៀតណាមបញ្ជាក់ថាការចាប់ដៃគ្នានេះគឺមិនមែនក្នុងគោលបំណងប្រឆាំងចិនទេ ប៉ុន្តែគេដឹងថាទីក្រុងវ៉ាស៊ីនតោននិងហាណូយកំពុងតែមានការព្រួយបារម្ភលើការបង្កើនកម្លាំងទ័ពរបស់ចិននៅក្នុងសមុទ្រចិនខាងត្បូង។

ទីក្រុងប៉េកាំងមិនភ្ញាក់ផ្អើលនិងមិនចាប់អារម្មណ៍ទេចំពោះទំនាក់ទំនងស្មុគស្មាញរវាងប្រទេសជិតខាងខ្លួនប្រកាន់របបកុម្មុនីស្តនិងប្រទេសលោកខាងលិចប្រកាន់របបប្រជាធិបតេយ្យ ប៉ុន្តែអ្វីជាការចាប់អារម្មណ៍របស់ចិន គឺការផ្ទុះអាវុធនៅតាមបណ្តោយព្រំដែនចិន-វៀតណាមកាលពីឆ្នាំ១៩៧៩។ បច្ចុប្បន្ននេះចិននិងវៀតណាមកំពុងមានការប្រឈមមុខដាក់គ្នាខ្លាំងទៀតលើការដណ្តើមកាន់កាប់កោះតូចនៅក្នុងសមុទ្រ។

កាសែតគណបក្សកុម្មុនីស្តចិន China Daily បានសរសេរដោយព្រមានកុំឲ្យអាមេរិកនិងវៀតណាមបង្កឲ្យមានការផ្ទុះអាវុធនៅក្នុងតំបន់។ ការព្រមានធ្វើឡើងក្នុងបទវិចារណកថាកាលពីថ្ងៃអង្គារម្សិលមិញដោយលើកឡើងពីការព្រួយករណីលោក អូបាម៉ា បង្កើនការពង្រឹងអំណាចឲ្យប្រទេសជាសត្រូវជិតខាងខ្លួន។

ចិនហៅសកម្មភាពរបស់លោក អូបាម៉ា ថាជាសញ្ញាខុសច្បាប់ បំផ្លាញសន្តិភាព និងស្ថិរភាពនៅក្នុងតំបន់។

ចំណែកសហរដ្ឋអាមេរិកបានចោទចិនថាកំពុងបង្កើនកម្លាំងទ័ពនៅសមុទ្រចិនខាងត្បូងដោយបំពានដោយរៀបចំមូលដ្ឋានទ័ពនៅលើថ្មប៉ប្រាស់ទឹកនិងដែនកោះ៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered