អូបាម៉ា​ព្រមាន​ពី​បញ្ហា​កំណើន​សេដ្ឋកិច្ច​សកល ​បន្ទាប់​ពី​អង់គ្លេស​សម្រេច​ចាក​ចេញ​ពី​ប្លុក​អឺរ៉ុប

ប្រធានាធិបតីអាមេរិក លោក បារ៉ាក់ អូបាម៉ា បានថ្លែងថាការបោះឆ្នោតសម្រេចចាកចេញពីសហភាពអឺរ៉ុបរបស់អង់គ្លេសបានបង្កឲ្យមានក្ដីបារម្ភរយៈពេលវែងចំពោះកំណើនសេដ្ឋកិច្ចសកល។

សារព័ត៌មាន BBC បានដកស្រង់សម្ដីលោក អូបាម៉ា ដែលបានថ្លែងថាការចាកចេញរបស់អង់គ្លេសនឹងធ្វើឲ្យលទ្ធភាពនៃការវិនិយោគនៅអង់គ្លេសឬនៅអឺរ៉ុបទាំងមូលត្រូវជាប់គាំង។

លោក អូបាម៉ា ក៏បានអំពាវនាវទៅនាយករដ្ឋមន្ត្រីអង់គ្លេស លោក ដេវីដ ខេមេរូន និងមេដឹកនាំអឺរ៉ុបដទៃទៀតឲ្យធានានូវដំណើរការដ៏រលូនមួយសម្រាប់ការចាកចេញរបស់អង់គ្លេស។

មេដឹកនាំប្លុកអឺរ៉ុបកាលពីប៉ុន្មានថ្ងៃមកនេះបានព្រមានថាអង់គ្លេសត្រូវតែគោរពគោលការណ៍ការធ្វើដំណើរដោយសេរីរបស់ប្រជាជន ប្រសិនបើប្រទេសនេះចង់រក្សាឱកាសចូលក្នុងទីផ្សាររួមមួយនេះ។

មេដឹកនាំនៃសហគមន៍មានសមាជិក២៧ប្រទេសមួយនេះបានជួបប្រជុំគ្នានៅទីក្រុងប៊្រុចសែលដោយមិនមានវត្តមានមេដឹកនាំអង់គ្លេសជាលើកដំបូងនៅក្នុងរយៈពេលជាង៤០ឆ្នាំចុងក្រោយនេះ។

លោក អូបាម៉ា បានលើកឡើងអំពីការចាកចេញរបស់អង់គ្លេសពីប្លុកអឺរ៉ុបនៅឯជំនួបកំពូលមេដឹកនាំកាណាដា និងម៉ិកស៊ិកនៅទីក្រុងអូតាវ៉ា។

លោកបន្តថាការប្រុងប្រៀងខ្លួនរបស់បណ្ដាធនាគារកណ្ដាលនិងក្រុមរដ្ឋមន្ត្រីហិរញ្ញវត្ថុ បង្ហាញថាសេដ្ឋកិច្ចសកលនៅក្នុងរយៈពេលខ្លីនេះនឹងនៅតែរក្សាបានភាពរឹងមាំ។

ប៉ុន្តែលោកបន្ថែមថា នឹងមានក្ដីបារម្ភរយៈពេលវែងអំពីកំណើនសេដ្ឋកិច្ចនៅចំពោះមុខបញ្ហាកំពុងកើតឡើងនៅអឺរ៉ុប៕

អង់គ្លេសបានបោះឆ្នោតប្រជាមតិសម្រេចចាកចេញពីសហភាពអឺរ៉ុបកាលពីថ្ងៃព្រហស្បតិ៍សប្ដាហ៍មុន៕