សហភាពការងារកម្ពុជា បានឲ្យដឹងថា គ្រោះថ្នាក់ចរាចរណ៍ជិត ៦ពាន់លើក បានកើតឡើងទៅលើកម្មករនៅទូទាំងប្រទេសកម្ពុជា នៅក្នុងឆ្នាំ២០១៦នេះ។
នៅលើទំព័រហ្វេសប៊ុករបស់ខ្លួន សហភាពការងារកម្ពុជា បានលើកឡើងថា បើតាមរបាយការណ៍ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត បានបង្ហាញថា កម្មករនិយោជិតមានគ្រោះថ្នាក់ ៥៦០៩លើក ដោយបានសម្លាប់កម្មករកម្មការិនី ១០៣នាក់ ហើយកម្មករ ៧៤៤៧នាក់ទៀត បានរងរបួស ក្នុងនោះរបួសធ្ងន់មានចំនួន ៩៧០នាក់។
ទោះបីមិនបានបង្ហាញពីតួលេខឆ្នាំកន្លងមក ប៉ុន្តែ សហភាពការងារកម្ពុជា បានបញ្ជាក់ថា តួលេខនៃគ្រោះថ្នាក់ចរាចរណ៍កើតឡើងទៅលើកម្មករកម្មការិនី បានថយចុះតិចតួចប៉ុណ្ណោះ បើធៀបទៅនឹងឆ្នាំ២០១៥កន្លងមក៕
