ប្រធានាធិបតីហ្វីលីពីន លោក រ៉ូឌ្រីហ្គោ ឌូតើតេ ថ្លែងកាលពីថ្ងៃព្រហស្បតិ៍ម្សិលមិញថា ករណីដែលអាមេរិកបរាជ័យក្នុងការរារាំងចិន មិនឲ្យបង្កើតកោះថ្មីៗទៀត គឺបង្ហាញថា បញ្ហានោះមិនធ្ងន់ធ្ងរទេ ហើយហ្វីលីពីនក៏មិនបារម្ភដែរ។
មេដឹកនាំដែលគេមើលឃើញថា កំពុងប្រឆាំងអាមេរិក ហើយប្តូរជំហរទៅរកចិននេះ បានថ្លែងថា លោកមិនចង់ឲ្យមានការប្រឈមមុខជាមួយចិន និង មិនត្រូវជំរុញឲ្យមានការអនុវត្តសាលដីការបស់តុលាការអន្តរជាតិ ដែលសម្រេចឲ្យហ្វីលីពីនឈ្នះក្តីលើចិន ក្នុងសមុទ្រចិនខាងត្បូងនោះទេ។
ថ្លែងក្នុងបទសម្ភាសន៍ជាមួយទូរទស្សន៍ លោក ឌូតើតេ ថ្លែងថា បញ្ហាជាមួយចិនត្រូវដោះស្រាយក្នុងអំឡុងពេលលោកដឹកនាំនេះ ប៉ុន្តែលោកថា មិនត្រូវយកមកជជែកនៅពេលឥឡូវនេះ ពីការជំរុញឲ្យអនុវត្តន៍សាដីកាតុលាការអន្តរជាតិទីក្រុងឡាអេនោះទេ។
លោក ឌូតើតេថា មិនមានអ្វីដែលជំរុញឲ្យមានភាពតានតឹងកើនឡើងនៅដែនសមុទ្រហ្វីលីពីនទៀតទេ និង ក្នុងការជំរុញឲ្យចិនមានអំណាចតែមួយក្នុងការធ្វើរឿងនេះ។ លោកថ្លែងប្រាប់ CNNថា លោក មិនអាចធ្វេសប្រហែសចំពោះជម្លោះនៅសមុទ្រចិនខាងត្បូងនេះបានទេ។ ប៉ុន្តែលោកថា ភាគីទាំងសងខាងមិនទាន់មានពេលគ្រប់គ្រាន់ក្នុងការជជែកគ្នារកដំណោះស្រាយលើបញ្ហានេះនៅឡើយទេ។